અમેરિકામાં ભારતીય મૂળની Google અધિકારીની ગોળી મારી હત્યા
અમેરિકાના જ્યોર્જિયા રાજ્યમાં ભારતીય મૂળની Googleની વરિષ્ઠ ટેક્નોલોજી અધિકારી શીતલ વ્રઝેસિયન (Sheetal Wrzesien)ની કથિત રીતે તેમના પતિએ ગોળી મારી હત્યા કરી હોવાની ઘટના સામે આવી છે. આ ઘટનામાં તેમના 23 વર્ષના પુત્ર જેસન વ્રઝેસિયન પણ ગોળી વાગતાં ઘાયલ થયા છે અને તેમની સારવાર ચાલી રહી છે.
ઘરેથી મળ્યા ગોળી વાગેલી હાલતમાં
સ્થાનિક પોલીસના જણાવ્યા મુજબ, મંગળવારે રાત્રે 8:00 વાગ્યા આસપાસ જ્યોર્જિયાના સ્માયર્ના શહેરમાં આવેલા તેમના ઘરમાં ગોળીબારની જાણ થતાં પોલીસ ઘટનાસ્થળે પહોંચી હતી. ત્યાં શીતલ વ્રઝેસિયન ગંભીર રીતે ઘાયલ હાલતમાં મળી આવ્યા હતા. તેમને હોસ્પિટલ લઈ જવામાં આવ્યા, પરંતુ સારવાર દરમિયાન તેમનું મોત થયું હતું. ઘરની બહાર તેમનો પુત્ર જેસન વ્રઝેસિયન પણ ગોળી વાગેલી હાલતમાં મળ્યો હતો. તાત્કાલિક તેમને હોસ્પિટલમાં ખસેડવામાં આવ્યા હતા.
પતિની ધરપકડ, અનેક ગંભીર કલમો હેઠળ કેસ
પોલીસે 56 વર્ષીય કિર્ક બી. વ્રઝેસિયન (Kirk B. Wrzesien)ની ઘટનાસ્થળેથી ધરપકડ કરી હતી. તેમની સામે ફેલોની મર્ડર, એગ્રેવેટેડ અસોલ્ટ અને ગુના દરમિયાન હથિયાર રાખવા સહિતના અનેક ગંભીર આરોપો હેઠળ કેસ નોંધવામાં આવ્યો છે. પોલીસે આ ઘટનાને ઘરેલુ હિંસાનો મામલો ગણાવ્યો છે. હાલ આરોપીને બોન્ડ વિના કોબ કાઉન્ટી એડલ્ટ ડિટેન્શન સેન્ટરમાં રાખવામાં આવ્યો છે. ઘટનાનું કારણ હજુ સુધી જાહેર કરવામાં આવ્યું નથી અને તપાસ ચાલુ છે.
Google માં વરિષ્ઠ પદ પર હતા શીતલ
શીતલ વ્રઝેસિયન Googleમાં એન્જિનિયરિંગ લીડર તરીકે કાર્યરત હતા અને તેમને ટેક્નોલોજી ક્ષેત્રમાં 20 વર્ષથી વધુનો અનુભવ હતો. Google માં જોડાયા પહેલાં તેઓ HomeDepot.comમાં મોબાઇલ અને ડિજિટલ ટ્રાન્સફોર્મેશન પ્રોજેક્ટ્સનું નેતૃત્વ કરી ચૂક્યા હતા. તેમણે હવામાન ટેક્નોલોજી, ફિનટેક, ઈ-કોમર્સ અને વેબ ટેક્નોલોજી જેવા ક્ષેત્રોમાં પણ મહત્વપૂર્ણ જવાબદારીઓ સંભાળી હતી.
અનેક ક્ષેત્રોમાં આપ્યું મહત્વપૂર્ણ યોગદાન
શીતલ વ્રઝેસિયનનો ઉછેર ઇંગ્લેન્ડ, ભારત અને ઘાનામાં થયો હતો. ત્યારબાદ તેઓ કમ્પ્યુટર સાયન્સનો અભ્યાસ કરવા અમેરિકા ગયા હતા. તેઓ Georgia Institute of Technologyના કોલેજ ઓફ કમ્પ્યુટિંગના એડવાઇઝરી બોર્ડના સભ્ય તેમજ Georgia Tech Alumni Associationના બોર્ડ ઓફ ટ્રસ્ટીઝમાં પણ જોડાયેલા હતા. તેમના નામે 2 સોફ્ટવેર પેટન્ટ પણ નોંધાયેલા હતા.
નોંધ: અમેરિકાની સ્થાનિક પોલીસ આ સમગ્ર ઘટનાની તપાસ કરી રહી છે. હાલ સુધી પોલીસે ઘટનાના ચોક્કસ કારણ અથવા સંભવિત પ્રેરણા અંગે કોઈ સત્તાવાર માહિતી જાહેર કરી નથી.
