ભારત સરકારે લીધો વધુ એક નિર્ણય : પાકિસ્તાની હાઇ કમિશનના વધુ એક અધિકારીને દેશમાંથી હાંકી કાઢ્યા, 24 કલાકનો સમય આપ્યો

ભારત સરકારે વધુ એક પાકિસ્તાની અધિકારી સામે કાર્યવાહી કરી છે અને તેમને દેશ છોડી દેવાનું કહ્યું છે. ભારતે દિલ્હી સ્થિત પાકિસ્તાન હાઈ કમિશનમાં કામ કરતા એક અધિકારીને પર્સોના નોન ગ્રેટા જાહેર કર્યા છે. આ પહેલા પણ ભારત સરકારે દાનિશ નામના અધિકારીને અનિચ્છનીય વ્યક્તિ જાહેર કરીને 24 કલાકમાં દેશની બહાર જવાનો રસ્તો બતાવ્યો હતો.

હાઈ કમિશનના ઇન્ચાર્જને પણ નોટિસ આપવામાં આવી હતી
આ ઉપરાંત વિદેશ મંત્રાલયે આવા મામલાઓના સંદર્ભમાં પાકિસ્તાની હાઈ કમિશનના ચાર્જ ડી અફેર્સને એક ડિમાર્ચ પણ જારી કર્યું છે જેમાં તેમને ચેતવણી આપવામાં આવી છે કે કોઈપણ પાકિસ્તાની રાજદ્વારી કે અધિકારીએ ભારતમાં તેમના વિશેષાધિકારોનો દુરુપયોગ ન કરવો જોઈએ.

પ્રેસ રિલીઝમાં શું કહેવામાં આવ્યું હતું?
વિદેશ મંત્રાલય દ્વારા જારી કરાયેલી એક પ્રેસ રિલીઝમાં કહેવામાં આવ્યું છે કે ભારત સરકારે આજે નવી દિલ્હીમાં પાકિસ્તાન હાઈ કમિશનમાં તૈનાત એક પાકિસ્તાની અધિકારીને દેશમાં તેમના સત્તાવાર દરજ્જા સાથે અસંગત પ્રવૃત્તિઓમાં સંડોવાયેલા જણાતા પર્સોના નોન ગ્રેટા જાહેર કર્યા છે. ભારત સરકારે અધિકારીને 24 કલાકની અંદર ભારત છોડી દેવાનું કહ્યું છે.

ઉપરાંત આ સંદર્ભમાં આજે પાકિસ્તાન હાઈ કમિશનના ચાર્જ ડી'અફેર્સને એક ડિમાર્ચ જારી કરવામાં આવ્યું હતું. તેમને ખાતરી કરવા માટે કહેવામાં આવ્યું હતું કે ભારતમાં કોઈપણ પાકિસ્તાની રાજદ્વારી કે અધિકારી તેમના વિશેષાધિકારો અને દરજ્જાનો કોઈપણ રીતે દુરુપયોગ ન કરે. અગાઉ ભારત સરકારે અહેસાન-ઉર-રહીમ ઉર્ફે દાનિશને પર્સોના નોન ગ્રેટા જાહેર કર્યો હતો અને તેને દેશ છોડી દેવાનું કહ્યું હતું. ૧૩ મેના રોજ ભારત સરકારે દાનિશને ભારતમાં તેના પદ અને વિશેષાધિકારો વિરુદ્ધ જાસૂસી કરવાના આરોપસર દેશ છોડવાનો આદેશ આપ્યો હતો.