ફિલિપાઈન્સને ચીનથી બચાવશે ભારતનું બ્રહ્માસ્ત્ર : ભારતે મોકલી બ્રાહ્મોસ મિસાઈલની બીજી ખેપ

દક્ષિણ ચીન સાગરમાં ચીનની વધતી આક્રમકતા વચ્ચે ફિલિપાઈન્સે જડબાતોડ જવાબ આપવા માટે ભારત પાસેથી બ્રહ્મોસ સુપરસોનિક ક્રૂઝ મિસાઈલ ખરીદી હતી. 2022માં, ભારત અને ફિલિપાઇન્સ વચ્ચે આશરે 3131 કરોડ રૂપિયાના સંરક્ષણ સોદા પર હસ્તાક્ષર કરવામાં આવ્યા હતા, જે હેઠળ ત્રણ મિસાઇલ બેટરીની સપ્લાય થવાની હતી. પહેલી બેટરી એપ્રિલ 2024માં એરફોર્સ એરક્રાફ્ટ દ્વારા મોકલવામાં આવી હતી, જ્યારે બીજુ કન્સાઈનમેન્ટ હવે દરિયાઈ માર્ગે રવાના થયું છે.

વાસ્તવમાં, ફિલિપાઈન્સે વ્યૂહરચનાના ભાગરૂપે આ મિસાઈલોને મહત્વપૂર્ણ સ્થાનો પર તૈનાત કરી છે, જેથી ચીન દ્વારા કોઈપણ હુમલાનો તરત જ અને સચોટ જવાબ આપી શકાય.

ભારતની તકનીકી શક્તિ - બ્રહ્મોસ મિસાઇલ
મીડિયા રિપોર્ટ્સ અનુસાર બ્રહ્મોસ મિસાઈલની ઝડપ 2.8 Mach છે, એટલે કે તે અવાજની ગતિ કરતા લગભગ ત્રણ ગણી વધુ ઝડપી છે. તે 290 કિલોમીટર સુધીના ટાર્ગેટને હિટ કરી શકે છે અને તેને જમીન, સમુદ્ર અને હવાથી લોન્ચ કરી શકાય છે. બ્રહ્મોસ ભારત અને રશિયાનો સંયુક્ત પ્રોજેક્ટ છે, જે હવે 83% સ્વદેશી બની ગયો છે. આ મિસાઈલ માત્ર એક શસ્ત્ર નથી પરંતુ ભારતની તકનીકી આત્મનિર્ભરતા અને વૈશ્વિક વ્યૂહાત્મક ભૂમિકાનું પ્રતીક છે. ભારત હવે માત્ર પોતાના માટે જ નહીં પરંતુ તેના સહયોગી દેશો માટે પણ વિશ્વસનીય સંરક્ષણ ભાગીદાર તરીકે ઉભરી રહ્યું છે.

ફિલિપાઈન્સે ભારતનું બ્રહ્માસ્ત્ર કેમ પસંદ કર્યું?
ફિલિપાઈન્સની વસ્તી 114.6 મિલિયન છે અને તેનો વિસ્તાર ભારત કરતા લગભગ 996% નાનો છે. તેમ છતાં તેઓ ચીનના સૈન્ય જોખમોનો સામનો કરવામાં ભારતની સાથે ઉભા રહ્યા છે. દક્ષિણ ચીન સાગરમાં ચીનની કાર્યવાહીથી પરેશાન થઈને તેણે ભારત પાસેથી મદદ માંગી અને બ્રહ્મોસ ખરીદ્યું. હવે બ્રહ્મોસને વેસ્ટર્ન લુઝોનમાં તૈનાત કરવામાં આવ્યું છે, જે એક વ્યૂહાત્મક વિસ્તાર છે જ્યાંથી ચીનના યુદ્ધ જહાજો, ડ્રોન અને ફાઈટર જેટને સીધા નિશાન બનાવી શકાય છે.

તમને જણાવી દઈએ કે ફેબ્રુઆરી 2023માં ફિલિપાઈન્સ નેવીના 21 અધિકારીઓએ ભારતમાં ટ્રેનિંગ લીધી હતી. હવે ફિલિપાઈન્સમાં રિપલ એટેકની ક્ષમતા છે, એટલે કે તે એકસાથે અનેક લક્ષ્યોને નિશાન બનાવી શકે છે. આનાથી ચીનને સ્પષ્ટ સંદેશ ગયો છે કે ફિલિપાઈન્સ હવે નબળું નથી, પરંતુ વ્યૂહાત્મક રીતે તૈયાર છે.