યે સબ દોગલાપન હૈ : સલાહ આપતા ચીનને અજીત ડોભાલની લપડાક

શનિવાર 10 મે 2025ના રોજ ભારત અને પાકિસ્તાન વચ્ચે જાહેર કરાયેલા યુદ્ધવિરામના થોડા કલાકો પછી, જમ્મુ અને કાશ્મીરમાં ડ્રોન પ્રવૃત્તિઓ અને વિસ્ફોટોએ બધાને ચોંકાવી દીધા ત્યારે પરિસ્થિતિ ફરી તંગ બની ગઈ. ભારતે તેને પાકિસ્તાન દ્વારા યુદ્ધવિરામ ઉલ્લંઘન ગણાવ્યું હતું અને વિદેશ સચિવ વિક્રમ મિશ્રીએ આકરી પ્રતિક્રિયા આપતા કહ્યું હતું કે સુરક્ષા દળોને કોઈપણ ઉલ્લંઘનનો કડક જવાબ આપવા માટે કડક સૂચનાઓ આપવામાં આવી છે.

આ દરમિયાન, ચીનના વિદેશ મંત્રી વાંગ યીએ ભારતના રાષ્ટ્રીય સુરક્ષા સલાહકાર અજિત ડોભાલ સાથે વાત કરી અને સંયમ જાળવવા અને પરિસ્થિતિ વધુ ખરાબ ન કરવા અપીલ કરી. ચીની સમાચાર એજન્સી શિન્હુઆ અનુસાર, વાંગે કહ્યું કે ચીન બંને દેશો વચ્ચે કાયમી શાંતિ વાટાઘાટોમાં રચનાત્મક ભૂમિકા ભજવવા તૈયાર છે.

ચીને ભારત અને પાકિસ્તાનને સંયમ રાખવાની સલાહ આપી

બેઇજિંગ તરફથી આપવામાં આવેલા નિવેદનમાં કહેવામાં આવ્યું છે કે ચીન પહેલગામ હુમલાની નિંદા કરે છે અને તમામ પ્રકારના આતંકવાદનો વિરોધ કરે છે. વાંગ યીએ કહ્યું કે ભારત અને પાકિસ્તાન બંને ચીનના પડોશી છે અને એશિયાની સ્થિરતા જાળવવા માટે શાંતિ જરૂરી છે. અજિત ડોભાલે વાતચીતમાં સ્પષ્ટતા કરી કે યુદ્ધ ભારતની પસંદગી નથી, પરંતુ દેશની સુરક્ષા અને નાગરિકોની સુરક્ષા માટે આતંકવાદ સામે કાર્યવાહી જરૂરી છે.