Import Duty Cut : પ્રીમિયમ યુરોપિયન કાર અથવા હાઇ-એન્ડ બાઇકમાં હાઇવે પર ફરવાનું સ્વપ્ન જોનારાઓ માટે સારા સમાચાર આવ્યા છે. યુએસ ટેરિફ અને ચીનની મંદીનો સામનો કરી રહેલા યુરોપિયન કાર મેન્યુફેક્ચરર માટે ભારત નવી આશા તરીકે ઉભરી આવ્યું છે. અત્યાર સુધી, ભારે ટેક્સને કારણે કેટલીક કાર પહોંચની બહાર હતી, પરંતુ Volkswagen અને Renault જેવી બ્રાન્ડ્સને ભારતમાં વિસ્તરણ કરવાની તેમની સૌથી મોટી તક મળવાની છે. જાણો કેવી રીતે.
India-EU કરારથી કારની ઈમ્પોર્ટ ડ્યુટીમાં ઘટાડો થશે
ભારત અને EU એક વેપાર કરાર પર હસ્તાક્ષર કરવાની તૈયારી કરી રહ્યા છે, જે યુરોપિયન કાર પરની ઊંચી ઈમ્પોર્ટ ડ્યુટીમાં નોંધપાત્ર ઘટાડો કરશે. ભારતના એક સમયે સુરક્ષિત ઓટોમોબાઈલ બજારમાં વિદેશી કંપનીઓને આપવામાં આવેલી આ સૌથી મોટી છૂટ માનવામાં આવે છે. આ કરાર પછી, યુરોપથી આવતી કાર અને પ્રીમિયમ વાહનો પરની ઈમ્પોર્ટ ડ્યુટી 110% થી ઘટીને માત્ર 40% થઈ શકે છે. આનો અર્થ એ થયો કે, Audi, Mercedes અને Porsche જેવી કાર હવે ભારતીય રસ્તાઓ પર વધુ સંખ્યામાં જોવા મળશે.
ઓટો એક્સપર્ટસનું શું માનવું?
ઓટો એક્સપર્ટસના મતે, આ ઘટાડાની સૌથી વધુ અસર લક્ઝરી કાર પર પડશે. કારણ કે, જે વાહનો હવે સંપૂર્ણપણે બિલ્ટ યુનિટ તરીકે ઈમ્પોર્ટ કરવામાં આવે છે તેમની કિંમતોમાં ઘટાડો જોવા મળી શકે છે. આનાથી પ્રીમિયમ કાર પ્રેમીઓ માટે તેમાં રોકાણ કરવાનું સરળ બનશે.
પડકારો હજુ પણ ટકી રહ્યા છે
જો ટેક્સ ઘટાડવામાં આવે તો પણ, ભારતીય બજારમાં Maruti Suzuki, Tata અને Mahindra જેવી સ્થાનિક અને એશિયન દિગ્ગજોનું વર્ચસ્વ રહે છે. ભારતીય ગ્રાહકો હજુ પણ માઇલેજ, ઓછું મેન્ટેનન્સ અને મજબૂતીને પ્રાથમિકતા આપે છે. પરિણામે, યુરોપિયન બ્રાન્ડ્સને તેમની સર્વિસ અને રનિંગ કોસ્ટમાં નોંધપાત્ર સુધારો કરવો પડી શકે છે.
લક્ઝરી કાર બ્રાન્ડ્સને સૌથી વધુ ફાયદો થશે.
ઓટો ઇન્ડસ્ટ્રીના એક્સપર્ટના મતે, Audi, Porsche, Mercedes-Benz અને BMW જેવી બ્રાન્ડ્સને સૌથી વધુ ફાયદો થશે. ભાવમાં રાહત સીધી પ્રીમિયમ કાર સેગમેન્ટમાં થશે. તેની અસર મિડ-રેન્જ અને માસ-માર્કેટ સેગમેન્ટમાં મર્યાદિત રહેશે. અમેરિકામાં વધતા ટેરિફ અને ચીનમાં ધીમી ગ્રોથને કારણે, ભારતનું કાર માર્કેટ 2030 સુધીમાં 6 મિલિયન યુનિટ સુધી પહોંચવાનો અંદાજ છે. આ કારણોસર, યુરોપિયન ઓટોમેકર્સ ભારતને લોંગ-ટર્મ ગ્રોથ માર્કેટ તરીકે જોઈ રહ્યા છે. વિશ્લેષકો માને છે કે, ટૂંકા ગાળાની અસર મર્યાદિત રહેશે, પરંતુ લાંબા ગાળે યુરોપિયન કંપનીઓ ભારતમાં સ્થાનિક મેન્યુફેક્ચરિંગમાં વધારો કરી શકે છે. આનાથી કિંમતો અને સ્પર્ધાત્મકતા બંનેમાં સુધારો થશે.
India-EU ના કરારથી ભવિષ્યમાં શું ફાયદો થશે?
આ કરાર ભવિષ્યમાં માત્ર કાર માટે જ નહીં, પરંતુ પ્રીમિયમ યુરોપિયન બાઇક્સ (જેમ કે BMW Motorrad અથવા Ducati ના કેટલાક મોડલ્સ) માટે પણ માર્ગ મોકળો કરી શકે છે. જો તમને પર્વતોમાં કે હાઇવે પર લાંબી ટ્રીપનો શોખ હોય, તો આગામી વર્ષોમાં ગ્લોબલ સ્ટાન્ડર્ડના મશીનો તમારી પહોંચમાં હશે.
