તાજેતરમાં, આંતરરાષ્ટ્રીય ઉર્જા બજારમાંથી એક મહત્વપૂર્ણ સમાચાર સામે આવ્યા છે. અહેવાલો અનુસાર, ભારતે હવે રશિયા પાસેથી ખરીદેલા ક્રૂડ ઓઇલ માટે ચીની ચલણ યુઆનમાં ચૂકવણી કરવાનું શરૂ કર્યું છે. આનો અર્થ એ થયો કે ભારત રશિયા પાસેથી ક્રૂડ ઓઇલ ખરીદી રહ્યું છે પરંતુ રશિયાને ચીની ચલણ યુઆનમાં ચૂકવણી કરી રહ્યું છે. ડોલરના વર્ચસ્વને સમાપ્ત કરવાનો આ એક મોટો પ્રયત્ન છે.
ભારતના કુલ સોદાઓની સરખામણીમાં ચીની ચલણમાં ચુકવણી ઓછી હોવા છતાં, તે ભારતની ચુકવણી પ્રણાલીમાં પરિવર્તન દર્શાવે છે અને એ પણ સ્પષ્ટ કરે છે કે ભારત, ચીન અને રશિયાએ બ્રિક્સ ચલણ બનાવ્યા વિના ટ્રમ્પના ડોલર ગૌરવને દૂર કરવાનું શરૂ કરી દીધું છે.
નોંધનીય છે કે આંતરરાષ્ટ્રીય ચલણ બજારમાં હાલમાં એક યુઆન 12.34 ભારતીય રૂપિયા જેટલું છે. ભારતનું આ પગલું નાનું હોઈ શકે છે, પરંતુ તેના ભૂ-રાજકીય પરિણામો નોંધપાત્ર છે અને મેસેજ આપે છે. રશિયાના નાયબ વડા પ્રધાન એલેક્ઝાન્ડર નોવાકે પુષ્ટિ આપી હતી કે ભારત હજુ પણ મુખ્યત્વે રશિયન ચલણ રૂબલમાં ચુકવણી કરે છે, પરંતુ યુઆનનો ઉપયોગ પણ વધી રહ્યો છે. આ પગલું કોઈપણ BRICS ચલણ વિના ભારત, ચીન અને રશિયાના ત્રિકોણીય જોડાણને મજબૂત બનાવે છે, જે રાષ્ટ્રપતિ ડોનાલ્ડ ટ્રમ્પની "ડોલર ડિપ્લોમસી" માટે ફટકો છે.
Investing live નામની વેબસાઇટે તેના અહેવાલમાં જણાવ્યું છે કે તાજેતરમાં ભારતની સરકારી કંપની ઇન્ડિયન ઓઇલ કોર્પોરેશને બે થી ત્રણ રશિયન ઓઇલ કાર્ગો માટે યુઆનમાં ચૂકવણી કરી છે.
આ પગલું 2023 થી એક પરિવર્તન દર્શાવે છે, જ્યારે ચીન સાથેના તણાવપૂર્ણ સંબંધો દરમિયાન સરકારી અગવડતા વચ્ચે સરકારી માલિકીની રિફાઇનરીઓએ યુઆનમાં ચુકવણી બંધ કરી દીધી હતી, જ્યારે ખાનગી રિફાઇનરીઓએ ચલણનો ઉપયોગ ચાલુ રાખ્યો હતો.
ભારત દ્વારા ચીની ચલણમાં ચુકવણી ફરી શરૂ કરવી એ પણ દર્શાવે છે કે બંને દેશો (ભારત-ચીન) વચ્ચેના સંબંધો સૌહાર્દપૂર્ણ બન્યા છે.
