US રાષ્ટ્રપતિ ડોનાલ્ડ ટ્રમ્પે "Board of Peace" ના પ્રથમ ચાર્ટરની ઔપચારિક જાહેરાત કરી છે. તેને આંતરરાષ્ટ્રીય સંઘર્ષોના ઉકેલ તરફના એક મોટા પગલા તરીકે બિરદાવવામાં આવી રહ્યું છે. ટ્રમ્પે દાવો કર્યો હતો કે દરેક વ્યક્તિ તેનો ભાગ બનવા માંગે છે. તેમણે આ નવી સંસ્થા સંયુક્ત રાષ્ટ્રનું સ્થાન લઈ શકે તેવી ચિંતાઓ પર પણ વાત કરી હતી. ટ્રમ્પે જણાવ્યું હતું કે તેઓ સંયુક્ત રાષ્ટ્ર સહિત અન્ય તમામ સંગઠનો સાથે મળીને કામ કરશે.
ટ્રમ્પે ફરી એકવાર ભારત અને પાકિસ્તાન વચ્ચેના સંઘર્ષનો ઉલ્લેખ કરતા કહ્યું કે તાજેતરના ભૂતકાળમાં, આપણે આઠ યુદ્ધો અટકાવ્યા છે. ખૂબ જ ટૂંક સમયમાં બીજું યુદ્ધ ફાટી નીકળવાની શક્યતા છે. રશિયા અને યુક્રેનનો ઉલ્લેખ કરતા તેમણે કહ્યું, "અમે વિચાર્યું હતું કે તે સૌથી સરળ યુદ્ધ હતું, પરંતુ તે કદાચ સૌથી મુશ્કેલ સાબિત થશે. ગયા મહિને, 29,000 લોકો માર્યા ગયા હતા, જેમાંથી મોટાભાગના સૈનિકો હતા. તે પહેલાના મહિનાઓમાં હજારો સૈનિકો પણ આ યુદ્ધનો ભોગ બન્યા હતા. આ ભયાનક છે."
ટ્રમ્પે કહ્યું કે યુદ્ધ અટકાવવા માટે ઘણી બેઠકો યોજાઈ છે. તેમાં સામેલ લોકોએ સારું કામ કર્યું છે. તેઓ શાંતિ સ્થાપિત કરવા માટે કામ કરી રહ્યા છે. હું તેમનો આભાર માનું છું. બોર્ડ ઓફ પીસના પ્રથમ જૂથની જાહેરાત કરતા તેમણે કહ્યું કે તેમાં સામેલ ઘણા નેતાઓ ખૂબ જ લોકપ્રિય છે, જ્યારે અન્ય ઓછા જાણીતા છે.
શાંતિ બોર્ડમાં કોનો સમાવેશ થાય છે?
ટ્રમ્પના શાંતિ બોર્ડમાં UAE, બહેરીન, મોરોક્કો, આર્જેન્ટિના, આર્મેનિયા, અઝરબૈજાન, બેલ્જિયમ, બલ્ગેરિયા ઇજિપ્ત, હંગેરી, ઇન્ડોનેશિયા, જોર્ડન કઝાકિસ્તાન, કોસોવો, મોંગોલિયા, પાકિસ્તાન, પેરાગ્વે, કતાર, સાઉદી અરેબિયા, તુર્કી, યુએઇ અને ઉઝબેકિસ્તાન નો સમાવેશ થાય છે.
શાંતિ બોર્ડની ઘોષણા દરમિયાન ઉપસ્થિત રાષ્ટ્રપ્રમુખોમાં આર્જેન્ટિનાના રાષ્ટ્રપતિ જાવિઅર મેઈલી, ઇન્ડોનેશિયાના રાષ્ટ્રપતિ પ્રબોવો સુબિયાન્ટો, રૂઢિચુસ્ત પેરાગ્વેના રાષ્ટ્રપતિ સેન્ટિયાગો પેના, ઉઝબેકિસ્તાનના રાષ્ટ્રપતિ શવકત મિર્ઝીયોયેવ, પાકિસ્તાની વડા પ્રધાન શાહબાઝ શરીફ, આર્મેનિયન વડા પ્રધાન નિકોલ પાશિન્યાન અને અઝરબૈજાનના રાષ્ટ્રપતિ ઇલ્હમ અલીયેવનો સમાવેશ થાય છે.
ટ્રમ્પે ગાઝા યુદ્ધ વિશે કહ્યું કે યુદ્ધ હવે પૂરું થઈ ગયું છે, પરંતુ હજુ પણ નાના તણખા છે જે બુઝાવવાના બાકી છે. તેમણે ચેતવણી આપી હતી કે હમાસે તેના શસ્ત્રો સોંપી દેવા પડશે નહીંતર તે તેનો અંત હશે. યુએસ રાષ્ટ્રપતિએ ઇઝરાયલને છેલ્લા બંધકના મૃતદેહને પરત કરવાની પણ હાકલ કરી હતી.
