Ishan Kishan : ન્યૂઝીલેન્ડ સામે ચોથી T20I માં ભારતીય ટીમની 50 રનથી હાર પછી, ભારતીય ટીમના નબળા બેટિંગ પર્ફોમન્સ સાથે ઈશાન કિશનની ફિટનેસ અંગે એક નવો વિવાદ ઉભો થયો છે. કેપ્ટન સૂર્યકુમાર યાદવએ મેચ પહેલા કહ્યું હતું કે, ઈશાન કિશનને ઈજાના કારણે પ્લેઈંગ ઈલેવનમાંથી બહાર રાખવામાં આવશે, પરંતુ મેચ દરમિયાન બનેલી એક ઘટનાએ ચાહકોને પ્રશ્નો ઉઠાવવા મજબૂર કર્યા.
ઈશાન કિશનના મેદાન પર દોડવાનું સત્ય શું?
આ વિવાદ ત્યારે શરૂ થયો જ્યારે ભારતીય ઇનિંગ્સ મુશ્કેલીમાં હતી અને શિવમ દુબે એકલા હાથે ભારતીય ટીમની ઇનિંગ્સ સંભાળી રહ્યો હતો. હેડ કોચ ગૌતમ ગંભીરએ ઈશાન કિશનને મેસેજ આપવા માટે મેદાન પર મોકલ્યો. ઈશાન કિશન જે સ્પીડથી મેદાન પર દોડ્યો અને જે સ્પીડથી તે પાછો ફર્યો તેનાથી ફેન્સમાં ચર્ચા શરૂ થઈ. સોશિયલ મીડિયા પર ફેન્સ પૂછી રહ્યા છે કે, જો ઈશાન કિશનને 'નિગલ ઇન્જરી' (Niggle injury) હોત તો તે આટલી સ્પીડથી કેવી રીતે દોડી શક્યો.
ફેન્સએ ટીમ મેનેજમેન્ટ પર ઉઠાવ્યા સવાલો
ફેન્સએ નારાજગી વ્યક્ત કરી છે, તેઓને આશ્ચર્ય થયું છે કે, શું ટીમ મેનેજમેન્ટે ઈશાન કિશનની ઈજા અંગે ખોટું બોલ્યું છે. ઘણા લોકોએ આનો ઉપયોગ પ્લેઇંગ ઇલેવનની પસંદગી પર પ્રશ્ન ઉઠાવવા માટે કર્યો છે. તેઓ દલીલ કરે છે કે, જો ઈશાન કિશન ફિટ હતો, તો તેને શા માટે બહાર રાખવામાં આવ્યો, ખાસ કરીને જ્યારે ટીમને મજબૂત બેટિંગ શરૂઆતની જરૂર હતી. આ હાર છતાં, ભારત સિરીઝમાં 3-1 થી આગળ છે, પરંતુ ઈશાન કિશનની ફિટનેસને લગતો વિવાદ આગામી અને અંતિમ T20I પહેલા ટીમ મેનેજમેન્ટ માટે માથાનો દુખાવો બની શકે છે.
