ભારતીય હવામાન વિભાગ (IMD)એ દેશના વિવિધ ભાગોમાં આગામી કેટલાક દિવસ દરમિયાન વરસાદને લઈને નવી આગાહી જાહેર કરી છે. વિભાગના જણાવ્યા અનુસાર, દેશના 14 રાજ્યો અને કેટલાક કેન્દ્રશાસિત પ્રદેશોમાં ભારે વરસાદની શક્યતા છે. પૂર્વ, પૂર્વોત્તર અને કેટલાક પહાડી વિસ્તારોમાં ભારે વરસાદનું એલર્ટ જાહેર કરવામાં આવ્યું છે, જ્યારે ઉત્તર ભારતના ઘણા વિસ્તારોમાં હાલ પણ ગરમી અને બફારાનો અનુભવ થઈ રહ્યો છે.
ચોમાસાની ગતિમાં થોડો ફેરફાર જોવા મળી રહ્યો છે. એક તરફ પૂર્વ અને પૂર્વોત્તર ભારતના અનેક રાજ્યોમાં સતત વરસાદ પડી રહ્યો છે, તો બીજી તરફ ઉત્તર ભારતના કેટલાક વિસ્તારોમાં વરસાદની ગતિ ધીમી પડતાં લોકો ફરીથી ઉમસ અને ગરમીનો સામનો કરી રહ્યા છે. હવામાન વિભાગે લોકોને સ્થાનિક હવામાન અપડેટ પર સતત નજર રાખવાની સલાહ આપી છે.
ગુજરાતમાં કેવું રહેશે હવામાન?
હવામાન વિભાગની આગાહી અનુસાર, ગુજરાતમાં આગામી દિવસોમાં હળવાથી મધ્યમ વરસાદની શક્યતા છે. રાજ્યના કેટલાક જિલ્લાઓમાં છૂટાછવાયા વરસાદી ઝાપટાં પડી શકે છે. જોકે, હાલ રાજ્ય માટે વ્યાપક ભારે વરસાદનું કોઈ એલર્ટ જાહેર કરવામાં આવ્યું નથી. રાજ્યના દરિયાકાંઠાના વિસ્તારોમાં પવનની ગતિ વધી શકે છે. માછીમારોને દરિયામાં જતાં પહેલાં સ્થાનિક હવામાન વિભાગની સૂચનાઓનું પાલન કરવાની સલાહ આપવામાં આવી છે.
દિલ્હી-એનસીઆરમાં ભારે વરસાદની શક્યતા ઓછી
હવામાન વિભાગના જણાવ્યા મુજબ, દિલ્હી અને એનસીઆર વિસ્તારમાં આગામી એક-બે દિવસ ભારે વરસાદની શક્યતા ઓછી છે. સવારના સમયે હળવા ઝાપટાં પડી શકે છે, પરંતુ બપોર બાદ ગરમી અને બફારો યથાવત રહેવાની શક્યતા છે. 16 જુલાઈ દરમિયાન દિલ્હીમાં મહત્તમ તાપમાન આશરે 38 ડિગ્રી સેલ્સિયસ અને લઘુત્તમ તાપમાન 28 ડિગ્રી આસપાસ રહેવાનો અંદાજ વ્યક્ત કરવામાં આવ્યો છે. સાથે જ કેટલાક વિસ્તારોમાં 25 કિલોમીટર પ્રતિ કલાકની ઝડપે પવન ફૂંકાઈ શકે છે.
દિલ્હી ઉપરાંત આસપાસના વિસ્તારોમાં પણ હાલ ભારે વરસાદના કોઈ સ્પષ્ટ સંકેતો નથી. જોકે, સ્થાનિક સ્તરે હળવા વરસાદી ઝાપટાં પડી શકે છે.
પંજાબ, હરિયાણા અને ઉત્તર પ્રદેશમાં વરસાદી માહોલ
હવામાન વિભાગે જણાવ્યું છે કે પંજાબ અને હરિયાણાના અનેક વિસ્તારોમાં આગામી દિવસોમાં વરસાદી માહોલ રહેશે. પંજાબમાં 19 જુલાઈ સુધી અને હરિયાણા તથા ચંદીગઢમાં 20 જુલાઈ સુધી વરસાદી પ્રવૃત્તિઓ ચાલુ રહેવાની સંભાવના છે.
ઉત્તર પ્રદેશમાં પણ વરસાદની આગાહી કરવામાં આવી છે. પશ્ચિમ ઉત્તર પ્રદેશમાં 17 જુલાઈ સુધી જ્યારે પૂર્વી ઉત્તર પ્રદેશમાં 21 જુલાઈ સુધી વિવિધ વિસ્તારોમાં વરસાદ પડી શકે છે. કેટલાક સ્થળોએ ગાજવીજ સાથે વરસાદની પણ શક્યતા વ્યક્ત કરવામાં આવી છે.
બિહાર, પશ્ચિમ બંગાળ અને ઝારખંડ માટે ખાસ ચેતવણી
પૂર્વ ભારતના રાજ્યોમાં ચોમાસું વધુ સક્રિય બન્યું છે. બિહારમાં 20 જુલાઈ સુધી ભારે વરસાદની આગાહી કરવામાં આવી છે, જ્યારે પશ્ચિમ બંગાળમાં 21 જુલાઈ સુધી વરસાદી માહોલ યથાવત રહેવાની શક્યતા છે. ઝારખંડમાં આ વર્ષે ચોમાસા દરમિયાન સરેરાશ કરતાં નોંધપાત્ર ઓછો વરસાદ નોંધાયો છે. વરસાદની અછતને કારણે કૃષિ ક્ષેત્ર પર અસરની ચિંતા વ્યક્ત કરવામાં આવી રહી છે. રાજ્ય સરકાર ખેડૂતોને સહાય માટે જરૂરી તૈયારીઓ કરી રહી હોવાનું પણ જાણવા મળ્યું છે.
પુરીની રથયાત્રા દરમિયાન ભારે વરસાદની આશંકા
ઓડિશાના પુરીમાં યોજાનારી ભગવાન જગન્નાથજીની ભવ્ય રથયાત્રા દરમિયાન ભારે વરસાદની શક્યતા વ્યક્ત કરવામાં આવી છે. હવામાન વિભાગના જણાવ્યા મુજબ, બંગાળની ખાડી અને બાંગ્લાદેશના દરિયાકાંઠા નજીક આગામી 24 કલાકમાં લો-પ્રેશર સિસ્ટમ (હવાનું હળવું દબાણ) સર્જાઈ શકે છે. આ સિસ્ટમના પ્રભાવને કારણે પુરી સહિત ઓડિશાના અનેક વિસ્તારોમાં ભારે વરસાદ પડી શકે છે. રથયાત્રામાં મોટી સંખ્યામાં શ્રદ્ધાળુઓ ભાગ લેવાના હોવાથી સ્થાનિક પ્રશાસન અને આપત્તિ વ્યવસ્થાપન તંત્રને સાવચેત રહેવા સૂચના આપવામાં આવી છે.
પહાડી અને પૂર્વોત્તર રાજ્યોમાં ભારે વરસાદનું એલર્ટ
જમ્મુ-કાશ્મીર, હિમાચલ પ્રદેશ અને ઉત્તરાખંડના અનેક વિસ્તારોમાં પણ આગામી દિવસોમાં વરસાદની આગાહી કરવામાં આવી છે. ભારે વરસાદને કારણે ભૂસ્ખલન અને માર્ગ અવરોધ જેવી સ્થિતિ સર્જાઈ શકે છે, તેથી પ્રવાસીઓને સાવચેતી રાખવાની સલાહ આપવામાં આવી છે. પૂર્વોત્તર ભારતના સિક્કિમ, અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં પણ ભારે વરસાદનું એલર્ટ જાહેર કરવામાં આવ્યું છે. કેટલાક વિસ્તારોમાં નદી-નાળાઓમાં પાણીનું સ્તર વધી શકે છે.
આ પણ વાંચો:સીમાંકન બિલનો રસ્તો થઈ ગયો સાફ! : શરદ પવારના સાંસદ આવ્યા સરકારની સાથે, તો શું થશે સંસદની નંબર ગેમ?
લોકોએ શું સાવચેતી રાખવી?
હવામાન વિભાગે ભારે વરસાદની આગાહી ધરાવતા વિસ્તારોના લોકોને જરૂરી સાવચેતી રાખવા અપીલ કરી છે. ભારે વરસાદ દરમિયાન નીચાણવાળા વિસ્તારોમાં જવાનું ટાળવું, વીજળી પડવાની સંભાવના હોય ત્યારે ખુલ્લા મેદાનમાં ન રહેવું અને સ્થાનિક પ્રશાસન દ્વારા જારી કરવામાં આવતી સૂચનાઓનું પાલન કરવું જરૂરી હોવાનું જણાવાયું છે.
