ભારતીય ઓટોમોબાઈલ માર્કેટમાં માઇક્રો SUV સેગમેન્ટ પ્રત્યે ગ્રાહકોનો લગાવ સતત વધી રહ્યો છે. ખાસ કરીને ઓછી કિંમતે વધુ માઇલેજની ઈચ્છા રાખતા ગ્રાહકો માટે હ્યુન્ડાઈ એક્સટર CNG અને ટાટા પંચ CNG વચ્ચે સીધી સ્પર્ધા જોવા મળે છે. જો તમે પણ 10 લાખ રૂપિયાથી ઓછા બજેટમાં આ બંને ગાડીઓમાંથી કઈ પસંદ કરવી તેને લઈને મૂંઝવણમાં હોવ, તો આ અહેવાલ તમને સાચો નિર્ણય લેવામાં મદદરૂપ થશે.
કિંમતમાં કોણ છે આગળ?
કિંમતની દ્રષ્ટિએ જોવામાં આવે તો ટાટા પંચ CNG વધુ આકર્ષક સાબિત થાય છે. તેનું બેઝ મોડલ 6.68 લાખ રૂપિયાથી શરૂ થાય છે. બીજી તરફ હ્યુન્ડાઈ એક્સટર CNG ના પ્રારંભિક મોડલની કિંમત 7.51 લાખ રૂપિયા છે અને તેનું ટોપ વેરિઅન્ટ 8.77 લાખ રૂપિયા સુધી જાય છે. ઓછું બજેટ ધરાવતા ગ્રાહકો માટે ટાટા પંચ CNG એક ઉત્તમ વેલ્યુ ફોર મની વિકલ્પ પૂરો પાડે છે.
ડિઝાઇન અને આંતરિક સુવિધાઓ
બાહ્ય દેખાવની વાત કરીએ તો બંને કારમાં હેલોજન હેડલાઇટ્સ મળે છે, પરંતુ હ્યુન્ડાઈ એક્સટર તેની LED ટેલ લેમ્પ્સ સાથે વધુ મોર્ડન લુક આપે છે. એક્સટરમાં ડ્રાઈવર સીટ હાઈટ એડજસ્ટમેન્ટ જેવું ખાસ ફીચર છે, જે પંચમાં જોવા મળતું નથી. જોકે ટાટા પંચના દરવાજા 90 ડિગ્રી સુધી ખૂલતા હોવાથી તેમાં બેસવું અને ઉતરવું વધુ અનુકૂળ રહે છે, જે તેને પ્રેક્ટિકલ કાર બનાવે છે.
સલામતીના ધોરણોમાં કોણ મજબૂત?
સેફ્ટી ફીચર્સમાં હ્યુન્ડાઈ એક્સટર CNG બાજી મારી જાય છે કારણ કે તેમાં તમામ વેરિઅન્ટમાં 6 એરબેગ્સ સ્ટાન્ડર્ડ તરીકે મળે છે. ટાટા પંચમાં હાલમાં 2 એરબેગ્સ ઉપલબ્ધ છે, પરંતુ પંચમાં ઇલેક્ટ્રોનિક સ્ટેબિલિટી કંટ્રોલ (ESC) જેવી સુવિધા આપવામાં આવી છે જે એક્સટરમાં મળતી નથી. ABS+EBD અને રિયર પાર્કિંગ સેન્સર જેવી પ્રાથમિક સુવિધાઓ બંને ગાડીઓમાં સમાન છે.
એન્જિન પર્ફોર્મન્સ અને આર્થિક કાર્યક્ષમતા
એન્જિનની વાત કરીએ તો એક્સટરમાં 4 સિલિન્ડર એન્જિન છે, જ્યારે પંચમાં 3 સિલિન્ડર એન્જિન મળે છે. પાવરના આંકડામાં ટાટા પંચ આગળ છે, તે 72.4 BHP પાવર અને 103 Nm ટોર્ક જનરેટ કરે છે, જે એક્સટર કરતા વધુ છે. માઇલેજની સરખામણીમાં એક્સટર 27.1 km/kg ની ક્ષમતા ધરાવે છે, જ્યારે પંચ 26.99 km/kg ની માઇલેજ આપે છે. બંને વચ્ચે તફાવત બહુ ઓછો છે, પરંતુ લાંબા ગાળે એક્સટર થોડી વધુ કરકસરયુક્ત સાબિત થઈ શકે છે.
