IndiGo Flight Emergency Landing : હૈદરાબાદથી કુવૈત જઈ રહેલી ઇન્ડિગોની ફ્લાઇટનું મુંબઈમાં ઈમરજન્સી લેન્ડિંગ કરવામાં આવ્યું હતું. એવું જાણવા મળ્યું છે કે બોર્ડમાં બોમ્બની ધમકીવાળો ઈમેલ મળ્યો હતો, જેના કારણે સુરક્ષા એજન્સીઓએ તાત્કાલિક કાર્યવાહી કરી અને ફ્લાઇટને મુંબઈમાં લેન્ડ કરવાની ફરજ પાડી. સુરક્ષા એજન્સીઓ આ મામલાની તપાસ કરી રહી છે. વિમાનને એરપોર્ટના આઈસોલેશન બેમાં ખસેડવામાં આવ્યું છે.
મળતી માહિતી અનુસાર, મંગળવારે સવારે હૈદરાબાદના રાજીવ ગાંધી આંતરરાષ્ટ્રીય એરપોર્ટથી કુવૈત માટે ઇન્ડિગોની એક ફ્લાઇટ રવાના થઈ હતી. ફ્લાઇટ ઉડાન ભર્યા પછી, હૈદરાબાદ એરપોર્ટને એક ધમકીભર્યો ઇમેઇલ મળ્યો જેમાં વિમાનમાં બોમ્બ હોવાની ધમકી આપવામાં આવી હતી.
એર ટ્રાફિક કંટ્રોલ (ATC) એ તાત્કાલિક ફ્લાઇટને મુંબઈ તરફ વાળી , જ્યાં તેનું સુરક્ષિત ઉતરાણ થયું અને બધા મુસાફરોને બહાર કાઢવામાં આવ્યા. મુસાફરો માટે વૈકલ્પિક વ્યવસ્થા કરવામાં આવી રહી છે.
અધિકારીઓએ જણાવ્યું હતું કે, ઉતરાણ પછી, વિમાનને એક અલગ પાર્કિંગ લોટમાં લઈ જવામાં આવ્યું હતું, જ્યાં બોમ્બ ડિસ્પોઝલ સ્ક્વોડ, સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF) અને અન્ય સુરક્ષા ટીમોએ સંપૂર્ણ તપાસ શરૂ કરી હતી. પ્રાથમિક અહેવાલો અનુસાર, અત્યાર સુધી કોઈ શંકાસ્પદ વસ્તુ કે વિસ્ફોટક મળી આવ્યા નથી.
