Asia Cup T20 Most Hundreds: એશિયા કપનું T20 ફોર્મેટ ભલે નાનું હોય, પરંતુ આ ટુર્નામેન્ટમાં સેંચુરી ફટકારવી અત્યંત મુશ્કેલ સાબિત થાય છે. આ ટુર્નામેન્ટના ઇતિહાસમાં, ફક્ત બે જ બેટ્સમેન એવા રહ્યા છે જેમણે શાનદાર બેટિંગ કરીને શતક ફટકાર્યું છે. રસપ્રદ વાત એ છે કે, બંને સદીઓ અલગ અલગ ટીમો સામે અને અલગ અલગ પરિસ્થિતિઓમાં આવી છે, પરંતુ બંને ઇનિંગ્સ ટુર્નામેન્ટની યાદગાર ઇનિંગ્સમાં ગણાય છે.
બાબર હયાત - હોંગકોંગ વિરુદ્ધ ઓમાન
હોંગકોંગના બેટ્સમેન બાબર હયાતે એશિયા કપ 2016 માં ઇતિહાસ રચ્યો હતો. 19 ફેબ્રુઆરીએ ફતુલ્લાહમાં ઓમાન સામે રમાયેલી આ મેચમાં, બાબર હયાતે 122 રનની શાનદાર ઇનિંગ રમી હતી. તેને ફક્ત 60 બોલમાં આ સદી પૂર્ણ કરી. આ ઇનિંગમાં, બાબર હયાતે 9 ચોગ્ગા અને 7 છગ્ગા ફટકાર્યા અને 203.33 ના સ્ટ્રાઇક રેટથી રન ફટકાર્યા. આ એશિયા કપ T20 ફોર્મેટની પહેલી સદી જ નહીં પરંતુ હોંગકોંગ ક્રિકેટ ઇતિહાસની સૌથી યાદગાર ઇનિંગ્સમાંની એક માનવામાં આવે છે.
વિરાટ કોહલી - ભારત વિરુદ્ધ અફઘાનિસ્તાન
આ યાદીમાં બીજું નામ ભારતીય ટીમના સ્ટાર બેટ્સમેન વિરાટ કોહલીનું છે. તેણે 8 સપ્ટેમ્બર 2022ના રોજ દુબઈમાં અફઘાનિસ્તાન સામે અણનમ 122 રન ફટકારીને એશિયા કપના T20 ફોર્મેટમાં બીજી અને T20I ફોર્મેટમાં પોતાની પ્રથમ સેંચુરી ફટકારી હતી. કોહલીની આ ઇનિંગમાં 61 બોલમાં 12 ચોગ્ગા અને 6 શાનદાર છગ્ગાઓનો સમાવેશ થતો હતો. આ દરમિયાન વિરાટ કોહલીનો સ્ટ્રાઇક રેટ 200 હતો. આ ઇનિંગ એટલા માટે પણ ખાસ હતી કારણ કે, કોહલી લાંબા સમયથી આઉટ ઓફ ફોર્મનો સામનો કરી રહ્યો હતો અને આ ઇનિંગ સાથે તેણે આંતરરાષ્ટ્રીય ક્રિકેટમાં શતક ફટકારવાની ફરી શરૂ કરી.
આંકડા મુશ્કેલી દર્શાવે છે
એશિયા કપ T20 ના ઇતિહાસમાં અત્યાર સુધી ફક્ત બે શતક જ ફટકારવામાં આવ્યા છે, એક બાબર હયાતે 2016માં અને બીજી વિરાટ કોહલીએ 2022માં ફટકારી હતી. આ આંકડા દર્શાવે છે કે, ભલે T20 ફોર્મેટ બેટ્સમેન માટે રન બનાવવાનો સૌથી ઝડપી રસ્તો માનવામાં આવે છે, પરંતુ ટુર્નામેન્ટની પરિસ્થિતિઓ અને દબાણ તેને વધુ પડકારજનક બનાવે છે. આ વખતે એશિયા કપ 2025 પણ T20 ફોર્મેટમાં રમાશે. હવે એ જોવું રસપ્રદ રહેશે કે કોઈ અન્ય ખેલાડી આ યાદીમાં પોતાનું સ્થાન બનાવી શકશે કે નહીં?
