ભારત સહિત વિશ્વના અનેક દેશોમાં હોળીનો તહેવાર ધામધૂમથી ઉજવવામાં આવે છે. રંગોના આ પર્વ પર લોકો એકબીજાને ગુલાલ લગાવી, ભેટીને મનભેદ ભૂલી જતા હોય છે. ભારતમાં ગલીએ-ગલીએ અને જાહેર રસ્તાઓ પર હોળીનો હુડદંગ જોવા મળે છે, પરંતુ જો તમે સાઉદી અરેબિયામાં રહેતા હોવ અથવા ત્યાં જવાનું વિચારી રહ્યા હોવ, તો સાવધાન રહેવાની જરૂર છે. સાઉદી અરેબિયામાં જાહેર સ્થળોએ હોળી રમવા પર કાયદેસરનો પ્રતિબંધ છે. જો કોઈ વ્યક્તિ રસ્તા પર રંગો ઉડાડતા કે ધાર્મિક પરંપરાનું જાહેરમાં પ્રદર્શન કરતા પકડાય, તો તેણે જેલની હવા ખાવાનો વારો આવી શકે છે. 99 ટકા લોકો આ દેશના કડક શરિયા કાયદા અને ધાર્મિક ઉજવણી અંગેના નિયમોથી અજાણ હોય છે, જે તેમના માટે મુશ્કેલી ઉભી કરી શકે છે.
સાઉદી અરેબિયા એક ઇસ્લામિક રાષ્ટ્ર છે અને તેની કાનૂની વ્યવસ્થા શરિયા કાયદા પર આધારિત છે. અહીં બિન-ઇસ્લામિક ધાર્મિક કાર્યક્રમોની જાહેર ઉજવણી પર સખત મનાઈ છે. જોકે, સાઉદીમાં રહેતા બિન-મુસ્લિમ સમુદાયો તેમના તહેવારો ઉજવી શકે છે, પરંતુ તેના માટે કેટલીક મર્યાદાઓ નક્કી કરવામાં આવી છે.
જાહેરમાં હોળી રમવા પર કેમ છે પ્રતિબંધ?
સાઉદી અરેબિયાના કાયદા મુજબ, જાહેર સ્થળોએ બિન-ઇસ્લામિક ધાર્મિક પ્રતીકોનું પ્રદર્શન કે સરઘસ કાઢવું ગેરકાયદેસર ગણાય છે. રસ્તાઓ પર રંગો ફેંકવા કે ભીડ એકઠી કરવી એ જાહેર વ્યવસ્થામાં ખલેલ પહોંચાડવા સમાન માનવામાં આવે છે. સાઉદી સરકારનું માનવું છે કે આવા કૃત્યોથી ધાર્મિક લાગણીઓ દુભાઈ શકે છે, તેથી ત્યાં હોળી જેવો તહેવાર જાહેરમાં ઉજવી શકાતો નથી.
ધરપકડ અને દેશનિકાલની થઈ શકે છે સજા
સાઉદી અરેબિયામાં જો કોઈ વ્યક્તિ નિયમોનું ઉલ્લંઘન કરીને જાહેર સ્થળોએ હોળી રમતા પકડાય, તો તેની સામે અત્યંત કડક કાનૂની કાર્યવાહી કરવામાં આવે છે. સૌ પ્રથમ, આવી પ્રવૃત્તિમાં સામેલ વ્યક્તિની પોલીસ દ્વારા તાત્કાલિક ધોરણે અટકાયત કરવામાં આવી શકે છે. ગુનાની ગંભીરતાને આધારે તે વ્યક્તિને ભારે દંડ અથવા જેલની સજા પણ થઈ શકે છે. વધુ ગંભીર કિસ્સાઓમાં, સત્તાવાળાઓ દ્વારા વ્યક્તિનો પાસપોર્ટ જપ્ત કરી લેવાની જોગવાઈ પણ છે. આટલું જ નહીં, જો કાયદાનું ઉલ્લંઘન મોટું હોય અને તેને જાહેર વ્યવસ્થા માટે જોખમી માનવામાં આવે, તો તે વ્યક્તિને દેશનિકાલ (Deport) કરીને સાઉદી અરેબિયામાં પ્રવેશવા માટે કાયમ માટે પ્રતિબંધિત પણ કરવામાં આવી શકે છે.
ક્યાં ઉજવી શકાય છે હોળી?
સાઉદીમાં રહેતા ભારતીયો કે અન્ય બિન-મુસ્લિમ લોકો હોળીની ઉજવણી કરી શકે છે, પરંતુ તે માત્ર ખાનગી જગ્યાઓ (Private Premises) જેવી કે પોતાના ઘરની અંદર અથવા દૂતાવાસો (Embassies) દ્વારા નિર્ધારિત કરાયેલા મર્યાદિત પરિસરમાં જ શક્ય છે. અહીં પણ એવી કાળજી રાખવી પડે છે કે બહારના કોઈ વ્યક્તિને તેનાથી ખલેલ ન પહોંચે.
સાઉદી અરેબિયાનો કડક કાયદો શું કહે છે?
સાઉદીમાં માત્ર ધર્મ જ નહીં, પણ વ્યક્તિગત વર્તન અને કપડાં બાબતે પણ સ્પષ્ટ નિયમો છે. જાહેરમાં ધર્મનો પ્રચાર કરવો, અન્ય ધર્મના પ્રતીકો દેખાડવા કે શાસક પરિવાર વિરુદ્ધ ટિપ્પણી કરવી એ મોટા ગુનાની શ્રેણીમાં આવે છે. આ ઉપરાંત દારૂ અને ડ્રગ્સ પરના પ્રતિબંધો પણ અત્યંત કડક છે, જે હોળીના સેલિબ્રેશન દરમિયાન સામાન્ય રીતે જોવા મળતા હોય છે, પરંતુ સાઉદીમાં તે ભારે પડી શકે છે.
