અમેરિકા સાથે સીધી વાતચીત માટે હમાસ તૈયાર : ડોનાલ્ડ ટ્રમ્પ પર લગાવ્યા ગંભીર આરોપ

ઈઝરાયેલ હમાસના યુદ્ધને પણ હવે લાંબો સમય થઈ ગયો છે. રોજે રોજ આ અંગે પણ અલગ અલગ સમાચાર સામે આવતા રહે છે. તેવામાં હવે હમાસના વરિષ્ઠ અધિકારી મુશીર અલ-મસરીએ ગાઝામાં બંધકોની મુક્તિ અંગે ટ્રમ્પ પર 'ડબલ સ્ટાન્ડર્ડ્સ' અપનાવવાનો આરોપ લગાવ્યો હતો. વ્હાઇટ હાઉસે બંધકોની મુક્તિ સુરક્ષિત કરવા માટે હમાસ સાથે સીધી વાટાઘાટની પુષ્ટિ કર્યા પછી અલ-મસરીની ટિપ્પણી આવી છે.

અલ-મસરીએ મીડિયાને જણાવ્યું કે હમાસ અને અમેરિકા વચ્ચેની વાટાઘાટોનો ઉદ્દેશ પ્રદેશમાં સ્થિરતા હાંસલ કરવાનો છે. જો કે, ગાઝા યુદ્ધવિરામ હજુ પણ અનિશ્ચિત છે, કારણ કે ઇઝરાયેલે યુદ્ધવિરામ લંબાવવા માટે હમાસ પર દબાણ લાવવા માટે નિર્ણાયક સહાય અટકાવી દીધી છે. 7 ઓક્ટોબરના આતંકવાદી હુમલા પછી ઇઝરાયેલે હમાસ સાથે સીધી વાતચીત કરવાનો ઇનકાર કર્યો છે.

'હમાસ બંધકનો મુદ્દો ઉકેલવા માગે છે'
અલ-મસરીએ ભારપૂર્વક જણાવ્યું હતું કે હમાસ યુદ્ધવિરામના બીજા તબક્કાની વાટાઘાટોના બદલામાં બંધકનો મુદ્દો ઉકેલવા માગે છે. આમાં લડાઈના કાયમી અંતના બદલામાં બાકી બંધકોને મુક્ત કરવાનો સમાવેશ થાય છે. ચાર મૃત અમેરિકનો અને ઓછામાં ઓછા 12 અમેરિકન-ઇઝરાયેલી કેદીઓ સાથે ગાઝામાં માત્ર એક જીવિત અમેરિકન બંધક, એડન એલેક્ઝાન્ડર બાકી હોવાનું માનવામાં આવે છે.

અલ-મસરીએ ઇઝરાયેલી જેલોમાં રાખવામાં આવેલા લગભગ 10,000 પેલેસ્ટિનિયન કેદીઓની અવગણના કરતી વખતે ઇઝરાયેલી કેદીઓ પર ધ્યાન કેન્દ્રિત કરવા બદલ ટ્રમ્પની ટીકા કરી હતી. તેમણે યુ. એસ. વહિવટીતંત્ર પર ઇઝરાયેલ પ્રત્યે પક્ષપાતી હોવાનો પણ આરોપ મૂક્યો હતો, જેણે પોતાને મધ્યસ્થીને બદલે સંઘર્ષમાં એક પક્ષ તરીકે રજૂ કર્યો હતો.

ટ્રમ્પે હમાસને આપી ચેતવણી
વાટાઘાટો છતાં ટ્રમ્પે હમાસને ચેતવણી આપી છે. તેમણે કહ્યું કે તેઓએ તમામ બંધકોને તાત્કાલિક મુક્ત કરવા જોઈએ નહીં તો પરિણામ ભોગવવા પડશે. મધ્ય પૂર્વમાં અમેરિકી રાજદૂત સ્ટીવ વિટકોફે સંકેત આપ્યો હતો કે જો હમાસ અમેરિકાની માંગણીઓનું પાલન કરવામાં નિષ્ફળ જાય તો ગાઝામાં અમેરિકી સૈન્ય કાર્યવાહી શક્ય છે.