સંતને પણ નથી છોડતા સાયબર ચાંચિઆઓ : 26 દિવસ સુધી રાખ્યા ડિજિટલ એરેસ્ટ

મધ્યપ્રદેશના ગ્વાલિયરમાં રામકૃષ્ણ આશ્રમના સ્વામી સુપ્રદીપ્તાનંદ વિરુદ્ધ સાયબર ફ્રોડનો મામલો સામે આવ્યો છે. મની લોન્ડરિંગનો આરોપ લગાવીને છેતરપિંડી કરનારા સાયબર ચાંચીઆઓએ તેમને 26 દિવસ સુધી ડિજિટલ અરેસ્ટમાં રાખ્યા અને આ સમયગાળા દરમિયાન તેમના ખાતામાંથી 2 કરોડ 52 લાખ રૂપિયા તેમના ખાતામાં ટ્રાન્સફર કર્યા. શંકા જતાં મહંત સ્વામી સુપ્રદીપાનંદે પોલીસમાં ફરિયાદ નોંધાવી છે.

ફરિયાદમાં મહંતે કહ્યું છે કે તેમને 17 માર્ચે એક ફોન આવ્યો હતો. ફોન કરનારે પોતાની ઓળખ મહારાષ્ટ્રના નાસિક પોલીસના અધિકારી તરીકે આપી હતી અને કહ્યું હતું કે તેણે મની લોન્ડરિંગના આરોપી વ્યક્તિ સાથે કરોડો રૂપિયાની લેવડદેવડ કરી હતી. જ્યારે તેમણે ના પાડી તો આરોપીએ તેને વીડિયો કોલ કર્યો. આ દરમિયાન ફોન સ્ક્રીન પર પોલીસ સ્ટેશનનો નજારો જોવા મળ્યો હતો. જેમાં નાસિક પોલીસનું બોર્ડ અને પોલીસ યુનિફોર્મમાં બેઠેલા યુવકો વાતચીત કરતા જોવા મળ્યા હતા.

પૈસા પરત ન આવતા શંકા જાગી હતી
આ વાતચીત દરમિયાન આરોપીએ જણાવ્યું કે તે પણ આ મની લોન્ડરિંગ કેસમાં ફસાઈ ગયો છે. આ સાથે, છેતરપિંડી કરનારાઓએ તેમને ધમકી આપી અને તેના પરિવાર અને પરિચિતો સાથે વાત ન કરવા કહ્યું અને 26 દિવસ સુધી સતત દેખરેખમાં રાખ્યા. છેતરપિંડી કરનારાઓ દર કલાકે તેમનું લોકેશન લેતા હતા અને તેમને ધમકાવતા હતા. આ સમય દરમિયાન, છેતરપિંડી કરનારાઓએ તેના બેંક ખાતામાંથી 2 કરોડ 52 લાખ રૂપિયા તેમના ખાતામાં ટ્રાન્સફર કર્યા. આ માટે તેમને ખાતરી આપવામાં આવી હતી કે તપાસ પૂર્ણ થયા બાદ 14 એપ્રિલે આ રકમ તેમને પરત કરવામાં આવશે.

મધ્યપ્રદેશનો સૌથી મોટો કેસ
મહંતે જણાવ્યું કે જ્યારે 15 એપ્રિલ સુધી તેમના પૈસા પરત ન આવ્યા તો તેમણે છેતરપિંડી કરનારાઓના નંબર પર ફોન કર્યો. આ દરમિયાન તમામ નંબર સ્વીચ ઓફ આવ્યા હતા. જેના કારણે તેને શંકા ગઈ અને તેણે પોલીસમાં ફરિયાદ નોંધાવી. પોલીસે ફરિયાદના આધારે ગુનો નોંધી તપાસ શરૂ કરી છે. પોલીસ અધિકારીઓના જણાવ્યા અનુસાર ડિજિટલ એરેસ્ટનો આ મામલો મધ્યપ્રદેશનો સૌથી મોટો મામલો છે. પોલીસે છેતરપિંડી કરનારાઓના તમામ બેંક ખાતા જપ્ત કરી લીધા છે. સાથે જ મોબાઈલ નંબરના આધારે તેમને શોધવાના પ્રયાસો કરવામાં આવી રહ્યા છે.