ગુજરાત ટાઇટન્સ ઇન્ડિયન પ્રીમિયર લીગ 2025માં અત્યાર સુધી સારું પ્રદર્શન કરી રહી છે પરંતુ ટીમ હજુ પણ તેના સ્ટાર ફાસ્ટ બોલર કાગીસો રબાડાના વાપસીની રાહ જોઈ રહી છે. અનુભવી ઝડપી બોલર રબાડા અંગત કારણોસર 15 દિવસ પહેલા 3 એપ્રિલના રોજ પોતાના ઘરે પરત ફર્યો હતો. ગુજરાત ટાઇટન્સ માટે આ મોટો ફટકો હતો. દક્ષિણ આફ્રિકાનો ફાસ્ટ બોલર આ સિઝનમાં માત્ર બે જ મેચ રમી શક્યો હતો. તેણે પંજાબ કિંગ્સ સામે 41 રનમાં 1 વિકેટ જ્યારે મુંબઈ ઈન્ડિયન્સ વિરુદ્ધ 42 રનમાં 1 વિકેટ લીધી હતી. તેમ છતાં તેનું પ્રદર્શન બહુ શાનદાર ન હતું પરંતુ તેનો અનુભવ ટીમની બોલિંગને મજબૂત કરી રહ્યો હતો.
ગુજરાત ટાઇટન્સને હજુ પણ આશા
ગુજરાત ટાઇટન્સના સહાયક કોચ આશિષ કપૂરે કહ્યું "અમે તેના વાપસીની રાહ જોઈ રહ્યા છીએ કદાચ તે પાછો આવશે. તેના પરિવારમાં કોઈ સમસ્યા છે જેના માટે તે ગયો હતો. એકવાર તે તેને ઉકેલી લેશે તે પાછો આવશે. અમને ખબર નથી કે તે ક્યારે પાછો આવશે પરંતુ અમે બધા રાહ જોઈ રહ્યા છીએ." તેણે કહ્યું કે તેના સ્થાને હજુ સુધી કોઈ ખેલાડીની જાહેરાત કરવામાં આવી નથી કારણ કે ટીમને વિશ્વાસ છે કે તે ટૂંક સમયમાં પરત ફરશે.
તમને જણાવી દઈએ કે આ ટીમના ઓલરાઉન્ડર ગ્લેન ફિલિપ્સ ઈજાના કારણે આખી સિઝનમાંથી બહાર છે. તેના સ્થાને શ્રીલંકાના ઓલરાઉન્ડર દાસુન શનાકાને ટીમમાં સામેલ કરવામાં આવ્યો છે. ફિલિપ્સને આ મહિનાની શરૂઆતમાં સનરાઈઝર્સ હૈદરાબાદ સામેની મેચ દરમિયાન ફિલ્ડિંગ કરતી વખતે પીઠમાં ઈજા થઈ હતી. ઈજા એટલી ગંભીર સાબિત થઈ કે તેને આખી ટુર્નામેન્ટમાંથી બહાર થવું પડ્યું. તે 12 એપ્રિલે ન્યુઝીલેન્ડ પરત ફર્યો હતો.
જીટીના ફાસ્ટ બોલરોએ સારું પ્રદર્શન કર્યું
તમને જણાવી દઈએ કે ગુજરાત ટાઇટન્સે રબાડાની ગેરહાજરીમાં પણ સારું પ્રદર્શન કર્યું છે. ફાસ્ટ બોલર પ્રસિદ્ધ કૃષ્ણા અને મોહમ્મદ સિરાજે શાનદાર બોલિંગ કરી છે. આ બંને બોલરોએ 6 મેચમાં 10-10 વિકેટ ઝડપી છે. જ્યારે સ્પિનર સાઈ કિશોરે પણ 6 મેચમાં 10 વિકેટ ઝડપી છે. IPL 2025ના પોઈન્ટ ટેબલમાં ગુજરાત ટાઇટન્સ બીજા સ્થાને છે જ્યારે દિલ્હી કેપિટલ્સ પ્રથમ સ્થાને છે. ગુજરાત ટાઇટન્સે 6માંથી 4 મેચ જીતી છે જ્યારે દિલ્હી કેપિટલ્સે 6માંથી 5 મેચ જીતી છે.
સતત પાંચમી વખત જીત્યું ગુજરાત: હૈદરાબાદ 86 રનમાં સમેટાયું
