રાજ્ય પોલીસ વડા જી.એસ. મલિકે ઉચ્ચસ્તરીય બેઠકમાં આપ્યા કડક નિર્દેશો; કાયદો અને વ્યવસ્થા જળવાઈ રહે તે માટે તમામ જિલ્લાઓને સતર્ક રહેવા સૂચના
આગામી મહોરમ તહેવારને લઈને ગુજરાત પોલીસ સંપૂર્ણ એક્શન મોડમાં આવી ગઈ છે. રાજ્યમાં શાંતિપૂર્ણ અને સુવ્યવસ્થિત રીતે તહેવાર ઉજવાય તે માટે રાજ્ય પોલીસ વડા G.S. Malikની અધ્યક્ષતામાં ઉચ્ચસ્તરીય સમીક્ષા બેઠક યોજાઈ હતી. વીડિયો કોન્ફરન્સના માધ્યમથી યોજાયેલી આ બેઠકમાં રાજ્યના વિવિધ શહેરોના પોલીસ કમિશનરો, રેન્જ આઈજી, ડીઆઈજી તેમજ જિલ્લા પોલીસ અધિક્ષકો જોડાયા હતા. બેઠક દરમિયાન રાજ્યમાં કાયદો અને વ્યવસ્થાની સ્થિતિની વિસ્તૃત સમીક્ષા કરવામાં આવી હતી. ખાસ કરીને મહોરમના જુલૂસો, ધાર્મિક કાર્યક્રમો અને સંવેદનશીલ વિસ્તારોમાં સુરક્ષા વ્યવસ્થાને વધુ મજબૂત બનાવવા માટે જરૂરી સૂચનાઓ આપવામાં આવી હતી.
સંવેદનશીલ વિસ્તારોમાં વધારાની તકેદારી
પોલીસ વડાએ તમામ અધિકારીઓને પોતાના વિસ્તારમાં સંવેદનશીલ સ્થળો પર વિશેષ ધ્યાન કેન્દ્રિત કરવા જણાવ્યું હતું. રાજ્યભરમાં ઓળખાયેલા 919 સંવેદનશીલ સ્થળો પર વધારાની વિજિલન્સ રાખવા, સતત ફૂટ પેટ્રોલિંગ વધારવા અને સ્થાનિક સ્તરે ગુપ્તચર માહિતી એકત્ર કરવાની સૂચના આપવામાં આવી છે.
તહેવાર દરમિયાન કોઈ અનિચ્છનીય ઘટના ન બને અને સામાજિક સૌહાર્દ જળવાઈ રહે તે માટે પોલીસ તંત્ર દ્વારા અગાઉથી જ વ્યૂહાત્મક આયોજન હાથ ધરવામાં આવ્યું છે. તમામ જિલ્લાઓમાં ક્વિક રિસ્પોન્સ ટીમો તથા કંટ્રોલ રૂમને પણ સક્રિય રાખવાના નિર્દેશ આપવામાં આવ્યા છે.
ટેક્નોલોજીની મદદથી રહેશે ચાંપતી નજર
આ વર્ષે સુરક્ષા વ્યવસ્થામાં આધુનિક ટેક્નોલોજીનો પણ વ્યાપક ઉપયોગ કરવામાં આવશે. પોલીસ દ્વારા ડ્રોન કેમેરા, CCTV નેટવર્ક અને બોડી-વોર્ન કેમેરાની મદદથી મહત્વપૂર્ણ વિસ્તારો પર સતત નજર રાખવામાં આવશે.
ખાસ કરીને મોટા શહેરો, સંવેદનશીલ વિસ્તારો અને ધાર્મિક જુલૂસોના રૂટ પર ડ્રોન સર્વેલન્સ વધારવામાં આવશે. ઉપરાંત સોશિયલ મીડિયા પર પણ પોલીસની વિશેષ નજર રહેશે જેથી કોઈ ભ્રામક માહિતી, અફવા અથવા ઉશ્કેરણીજનક સામગ્રીના પ્રસારને સમયસર રોકી શકાય.
શાંતિપૂર્ણ ઉજવણી માટે અપીલ
રાજ્ય પોલીસ તંત્ર દ્વારા નાગરિકોને પણ તહેવાર દરમિયાન શાંતિ અને સંયમ જાળવવાની અપીલ કરવામાં આવી છે. સ્થાનિક આગેવાનો અને વિવિધ સમાજના પ્રતિનિધિઓ સાથે સંકલન કરીને સામાજિક સમરસતા જાળવવા પ્રયાસો હાથ ધરવામાં આવ્યા છે. ગુજરાત પોલીસનું માનવું છે કે અગાઉની જેમ આ વર્ષે પણ લોકોના સહકારથી મહોરમનો તહેવાર શાંતિપૂર્ણ વાતાવરણમાં ઉજવાશે. રાજ્યભરમાં સુરક્ષાને લઈને તમામ જરૂરી તૈયારીઓ પૂર્ણ કરી દેવામાં આવી હોવાનું અધિકારીઓએ જણાવ્યું છે.
