સુરતમાં પાલિકાની મોટી બેદરકારી: નવો બનેલો રોડ બેસી જતાં સિટી બસ ધસી પડી, 7 મુસાફરો ઇજાગ્રસ્ત

સુરત: સુરત શહેરના પાંડેસરા વિસ્તારમાં આવેલા ગણેશનગર ખાતે સુરત મહાનગરપાલિકા (SMC)ની ઘોર બેદરકારી સામે આવી છે. થોડા દિવસો પહેલાં જ બનેલો નવો રોડ અચાનક ધસી પડતાં ત્યાંથી પસાર થઈ રહેલી એક સિટી બસ રોડમાં ખૂંપી ગઈ હતી. આ અકસ્માતને કારણે બસમાં સવાર ૭ મુસાફરોને ઇજા પહોંચી હતી, જેમને તાત્કાલિક સારવાર અર્થે સુરત સિવિલ હોસ્પિટલ ખસેડવામાં આવ્યા છે. નવો રોડ તૂટી પડતાં પાલિકાના કામની ગુણવત્તા અને ભ્રષ્ટાચાર સામે ગંભીર સવાલો ઊભા થયા છે, જેને પગલે સ્થાનિક રહીશોમાં તંત્ર સામે ભારે રોષ જોવા મળી રહ્યો છે.

પ્રફુલ પટેલના પત્ની ભાવનાબેન પટેલનું નિધન: વડાપ્રધાન મોદી સહિતના દિગ્ગજોએ વ્યક્ત કર્યો શોક

પૂર્વ ગૃહરાજ્ય મંત્રી પ્રફુલ પટેલના પત્ની ભાવનાબેન પટેલનું આજે દુઃખદ નિધન થયું છે. તેમના નિધનના સમાચાર મળતા જ રાજકીય ક્ષેત્રે શોકનું મોજું ફરી વળ્યું છે. વડાપ્રધાન નરેન્દ્ર મોદીએ આ દુઃખદ ઘટના પર શોક વ્યક્ત કરતા ભાવનાબેનને શ્રદ્ધાંજલિ અર્પણ કરી છે અને પરિવાર પ્રત્યે સંવેદના વ્યક્ત કરી છે. આ ઉપરાંત અન્ય અનેક રાજકીય આગેવાનો અને પક્ષના કાર્યકરોએ પણ તેમના અવસાન અંગે દુઃખ વ્યક્ત કર્યું છે. ભાવનાબેન પટેલના નિધનથી પટેલ પરિવારમાં શોકનો માહોલ છે.

ગાંધીનગર સેક્ટર-24માં 600 કિલોથી વધુ ગૌમાંસ ઝડપાયું: આરોપીઓ પ્રત્યે પોલીસની નરમાઈથી લોકોમાં ભારે રોષ

ગાંધીનગરના સેક્ટર-24 વિસ્તારમાં 600 કિલોથી વધુ શંકાસ્પદ ગૌમાંસ મળી આવતા સમગ્ર પંથકમાં ભારે ઉત્તેજના અને રોષની લાગણી ફેલાઈ ગઈ છે. આ ઘટનાની જાણ થતાં જ બજરંગ દળના કાર્યકરો, સ્થાનિક નાગરિકો અને શ્રી રામ ચેરિટેબલ ટ્રસ્ટના સભ્યો મોટી સંખ્યામાં એકઠા થઈને સેક્ટર-21 પોલીસ સ્ટેશન પહોંચ્યા હતા. પોલીસ સ્ટેશનમાં જ્યારે પ્રદર્શનકારીઓએ આરોપીઓને પોલીસ સ્ટેશનમાં જ આરામથી બેઠેલા જોયા, ત્યારે લોકોનો આક્રોશ વધુ વધ્યો હતો અને પોલીસની કામગીરી સામે ગંભીર સવાલો ઉઠાવ્યા હતા. લોકોએ આરોપીઓ સામે તાત્કાલિક અને કડક કાયદેસરની કાર્યવાહી કરવાની માંગ કરી છે. હાલ પોલીસ દ્વારા સમગ્ર મામલે તપાસ હાથ ધરવામાં આવી છે અને મામલો થાળે પાડવાના પ્રયાસો ચાલુ છે.

દક્ષિણ ગુજરાતમાં મેઘરાજાની ધમાકેદાર એન્ટ્રી: સુરત અને નવસારીમાં ભારે પવન સાથે વરસાદ

સુરત/નવસારી: દક્ષિણ ગુજરાતમાં લાંબા સમયની અસહ્ય ગરમી અને બફારા બાદ હવામાનમાં અચાનક પલટો આવ્યો છે. સુરત, નવસારી, વલસાડ અને તાપી જિલ્લામાં મેઘરાજાએ ધમાકેદાર એન્ટ્રી કરી છે. સુરતમાં ૨૦ થી ૨૫ કિમીની ઝડપે ફૂંકાયેલા તેજ પવન અને ભારે ગાજવીજ સાથે વરસાદ તૂટી પડ્યો હતો, જેના કારણે દિવસ દરમિયાન જ અંધારપટ જેવી સ્થિતિ સર્જાઈ હતી. બીજી તરફ, નવસારીના સ્ટેશન રોડ સહિતના વિસ્તારોમાં ભારે પવન સાથે વરસાદી ઝાપટાં પડતાં સમગ્ર પંથકમાં ઠંડક પ્રસરી ગઈ છે. આ વરસાદથી લોકોને ગરમીથી મોટી રાહત મળી છે, જ્યારે ખેડૂતો હવે વાવણી લાયક સારા વરસાદની આશા રાખી રહ્યા છે.

ગુજરાત માટે સારા સમાચાર: ઉપરવાસમાંથી આવક વધતાં નર્મદા ડેમની સપાટી 126.79 મીટરે પહોંચી

નર્મદા: મધ્યપ્રદેશના ઓમકારેશ્વર અને ઇન્દિરાસાગર ડેમના પાવર હાઉસ શરૂ કરાતા સરદાર સરોવર નર્મદા ડેમમાં પાણીની આવક વધી છે. ઉપરવાસમાંથી 16,755 ક્યુસેક પાણીની આવક થતાં ડેમની સપાટી 126.79 મીટરે પહોંચી ગઈ છે. હાલ નર્મદા ડેમ 57 ટકા જેટલો ભરાયેલો છે અને તેમાં 3,324 MCM લાઈવ સ્ટોરેજ પાણી ઉપલબ્ધ છે. પાણીની સારી આવકના પગલે CHPH પાવર હાઉસના 3 યુનિટ કાર્યરત કરવામાં આવ્યા છે. આ ઉપરાંત, ગુજરાતમાં સિંચાઈ અને પીવાના પાણી માટે મુખ્ય કેનાલમાં 16,223 ક્યુસેક પાણી છોડવામાં આવી રહ્યું છે.

અમદાવાદમાં આગામી 3 દિવસ હળવા વરસાદની સંભાવના: ગરમીનો પારો 40 ડિગ્રી વટાવી શકે


અમદાવાદ: શહેરમાં આગામી ત્રણ દિવસ એટલે કે 22થી 24 જૂન દરમિયાન હળવાથી મધ્યમ વરસાદી ઝાપટાં પડવાની સંભાવના હવામાન વિભાગ દ્વારા વ્યક્ત કરવામાં આવી છે. હાલમાં સાઇક્લોનિક સરક્યુલેશન અને વેસ્ટર્ન ડિસ્ટર્બન્સ એમ બે વરસાદી સિસ્ટમ એકસાથે સક્રિય થવાને કારણે વાતાવરણમાં ભેજનું પ્રમાણ વધશે અને પવન ફૂંકાશે. જોકે, વાદળછાયા વાતાવરણ છતાં અમદાવાદીઓને ગરમીથી બહુ રાહત નહીં મળે. આ દિવસો દરમિયાન મહત્તમ તાપમાન 38થી 40 ડિગ્રી સેલ્સિયસ વચ્ચે રહેવાની સંભાવના છે, જેથી બફારાનો અહેસાસ થઈ શકે છે.

ગોંડલથી 1.90 કરોડ રૂપિયાનો અખાદ્ય શંકાસ્પદ જથ્થો ઝડપાયો

રાજકોટ: રાજકોટ જિલ્લાના ગોંડલ શહેરના જામવાડી GIDC વિસ્તારમાં આવેલી 'મિસરી સ્પાઈસીસ' નામની ફેક્ટરીમાં ફૂડ એન્ડ ડ્રગ્સ વિભાગે ભેળસેળની શંકાના આધારે દરોડા પાડ્યા હતા. કાર્યવાહી દરમિયાન આશરે 79,900 કિલો મસાલા, લોટ અને પામતેલ સહિત રૂ. 1.90 કરોડનો શંકાસ્પદ જથ્થો સીઝ કરવામાં આવ્યો હતો. તપાસ દરમિયાન ધાણા પાવડર, મરચું પાવડર, હળદર, ચોખા-મકાઈનો લોટ સહિતનો જથ્થો ઝડપાયો હતો. ફેક્ટરી પાસે જરૂરી માન્ય લાયસન્સ ન હોવાનું પણ સામે આવ્યું છે. અધિકારીઓએ નમૂનાઓ લઈ લેબમાં પરીક્ષણ માટે મોકલી આપ્યા છે. રિપોર્ટના આધારે આગળની કાયદેસરની કાર્યવાહી કરવામાં આવશે. નોંધનીય છે કે બે દિવસ પહેલાં પણ જામવાડી GIDCની 'સત્યમ મસાલા' ફેક્ટરીમાં ફૂડ એન્ડ ડ્રગ્સ વિભાગે દરોડા પાડી કાર્યવાહી કરી હતી.