જૂનાગઢ: મજેવડી પાસે ગમખ્વાર અકસ્માત, અસ્થિ વિસર્જન માટે જઈ રહેલા પરિવારની કાર ટ્રકમાં ઘૂસતા 4ના કરુણ મોત

જૂનાગઢના મજેવડી ગામ નજીક ફોર-લેન હાઈવે પર આજે વહેલી સવારે એક અત્યંત કરુણ અકસ્માત સર્જાયો. બનાસકાંઠાથી સોમનાથ તરફ અસ્થિ વિસર્જન માટે જઈ રહેલા એક પરિવારની અર્ટિગા કાર રસ્તા પર બંધ હાલતમાં ઉભેલા ટ્રકની પાછળ ધડાકાભેર અથડાતા 4 વ્યક્તિઓના ઘટનાસ્થળે જ મોત નિપજ્યા. પ્રાપ્ત માહિતી અનુસાર, કારમાં સવાર અન્ય 4 વ્યક્તિઓ ગંભીર રીતે ઇજાગ્રસ્ત થયા છે, જેમાંથી બેની હાલત નાજુક હોવાથી તેમને ICUમાં ખસેડવામાં આવ્યા છે. સદનસીબે, આ અકસ્માતમાં એક બાળકનો આબાદ બચાવ થયો છે. અકસ્માતની જાણ થતાં જ પોલીસ અને 108ની ટીમ તાત્કાલિક ઘટનાસ્થળે દોડી ગઈ હતી અને ઇજાગ્રસ્તોને તાત્કાલિક સારવાર માટે સિવિલ હોસ્પિટલ પહોંચાડ્યા હતા. અસ્થિ વિસર્જન માટે નીકળેલા પરિવાર પર આવી પડેલી આ આફતને પગલે સમગ્ર પંથકમાં શોક.

પાદરા: ગીતાંજલિ સ્કૂલમાં શિક્ષણ જગતને શર્મસાર કરતી ઘટના, શિક્ષકની છેડતી બાદ વાઈસ પ્રિન્સિપાલે વિદ્યાર્થીનીને અમાનવીય સજા આપતા રોષ

પાદરાની ગીતાંજલિ સ્કૂલમાંથી અત્યંત ગંભીર અને માનવતાને શર્મસાર કરતી ઘટના સામે આવી છે. ધોરણ-11ની એક સગીર વિદ્યાર્થીની સાથે શાળાના જ શિક્ષકે છેડતી કરી અશોભનીય વર્તન કર્યું હોવાનો સનસનાટીભર્યો આક્ષેપ થયો છે. આ મામલે ન્યાય ન મળતા છેવટે પીડિતાએ 'મુખ્યમંત્રી સ્વાગત ઓનલાઈન કાર્યક્રમ'માં સીધી રજૂઆત કરી હતી, ત્યારબાદ સમગ્ર વહીવટી તંત્ર દોડતું થઈ ગયું. પીડિતાનો આરોપ છે કે, જ્યારે તેણે અને તેના પરિવારે આ અન્યાયનો વિરોધ કર્યો, ત્યારે તેમને ધમકાવીને મામલો દબાવવાનો પ્રયાસ કરવામાં આવ્યો હતો. આટલું જ નહીં, આ અન્યાય સામે અવાજ ઉઠાવનાર વિદ્યાર્થીનીને શાળાના વાઈસ પ્રિન્સિપાલે ક્રૂરતાપૂર્વક માસિકધર્મ દરમિયાન પરાણે 40 ઊઠબેસ કરવાની અમાનવીય સજા આપી હતી. પીડિતાએ પ્રિન્સિપાલ, ટ્રસ્ટીઓ અને સ્થાનિક અધિકારીઓની ભૂમિકા સામે પણ ગંભીર સવાલો ઉઠાવ્યા.

જૂનાગઢ: મજેવડી રોડ પર બે કાર વચ્ચે ગમખ્વાર અકસ્માત, 4 લોકોના ઘટનાસ્થળે જ કરુણ મોત

જૂનાગઢના મજેવડી રોડ પર આજે એક અત્યંત કરુણ અને ગંભીર અકસ્માત સર્જાયો છે. બે કાર વચ્ચે થયેલી આ સામસામેની ટક્કર એટલી જોરદાર હતી કે, જેમાં સવાર 4 વ્યક્તિઓના ઘટનાસ્થળે જ કમકમાટીભર્યા મોત નીપજ્યા છે. અકસ્માતના સમાચાર મળતા જ આસપાસના લોકોમાં દોડધામ મચી ગઈ હતી. સ્થાનિક પોલીસનો કાફલો તાત્કાલિક ઘટનાસ્થળે પહોંચી ગયો છે. ઈજાગ્રસ્તો અને મૃતદેહોને બહાર કાઢીને 108 એમ્બ્યુલન્સ મારફતે જૂનાગઢની સિવિલ હોસ્પિટલ ખાતે ખસેડવામાં આવ્યા છે. અકસ્માતને પગલે રસ્તા પર ટ્રાફિક જામ થઈ ગયો હતો, જેને દૂર કરવાની કામગીરી હાલ પોલીસ દ્વારા હાથ ધરવામાં આવી છે. આ દુર્ઘટનાને પગલે સમગ્ર પંથકમાં શોકનું મોજું ફરી વળ્યું છે.

વડોદરા: મંજલપુર પેટાચૂંટણીની તૈયારીઓનો ધમધમાટ, ઓબ્ઝર્વર્સની મહત્વની રિવ્યુ મીટિંગ યોજાઈ

વડોદરાની મંજલપુર બેઠક પર આગામી સમયમાં યોજાનારી પેટાચૂંટણીને લઈને વહીવટી તંત્ર સક્રિય થયું છે. આજે યોજાયેલી મહત્વની રિવ્યુ મીટિંગમાં ચૂંટણી પંચ દ્વારા નિયુક્ત ઓબ્ઝર્વર્સ અને સ્થાનિક ચૂંટણી અધિકારીઓ વચ્ચે મંથન કરવામાં આવ્યું હતું. આ બેઠકમાં ચૂંટણી પ્રક્રિયા, મતદાન મથકોની વ્યવસ્થા, સુરક્ષા વ્યવસ્થા અને આદર્શ આચારસંહિતાના અમલીકરણ અંગે વિગતવાર ચર્ચા કરવામાં આવી હતી. અધિકારીઓએ તમામ મતદાન મથકો પર શાંતિપૂર્ણ અને પારદર્શક મતદાન થાય તે માટેની તૈયારીઓની સમીક્ષા કરી છે. આગામી દિવસોમાં ચૂંટણી પ્રક્રિયાને વધુ વેગ આપવા અને મતદારોમાં જાગૃતિ લાવવા માટેના કાર્યક્રમો અંગે પણ આયોજન કરવામાં આવ્યું છે. ચૂંટણી તંત્ર દ્વારા તમામ તૈયારીઓ સમયસર પૂર્ણ કરવાના આદેશ આપવામાં આવ્યા છે, જેથી મંજલપુર પેટાચૂંટણી મુક્ત અને ન્યાયી વાતાવરણમાં સંપન્ન થઈ શકે.

ગુજરાત: SGST વિભાગની મોટી કાર્યવાહી, તમાકુ, સોપારી અને સિગારેટના વેપારીઓ પર દરોડા | કરોડોની કરચોરીનો પર્દાફાશ

ગુજરાતમાં કરચોરી ડામવા માટે સ્ટેટ ગુડ્સ એન્ડ સર્વિસ ટેક્સ (SGST) વિભાગ દ્વારા આકરા પાણીએ કાર્યવાહી શરૂ કરવામાં આવી છે. રાજ્યભરમાં તમાકુ, સોપારી અને સિગારેટના મોટા વેપારીઓના સંકુલો પર SGSTની ટીમોએ દરોડા પાડ્યા છે. પ્રાથમિક તપાસમાં કરોડો રૂપિયાની ટેક્સચોરી કરવામાં આવી હોવાનું સામે આવ્યું છે. સૂત્રોના જણાવ્યા અનુસાર, વેપારીઓ દ્વારા મોટા પાયે બિનહિસાબી વ્યવહારો કરવામાં આવતા હતા અને ટેક્સ ભરવામાં ગેરરીતિ આચરવામાં આવતી હતી. આ દરોડા દરમિયાન વેપારીઓની ઓફિસો અને ગોડાઉનમાંથી મોટી માત્રામાં દસ્તાવેજો અને ડિજિટલ ડેટા જપ્ત કરવામાં આવ્યા છે. SGST વિભાગની આ કાર્યવાહીથી વેપારી આલમમાં ફફડાટ ફેલાઈ ગયો છે. હાલ દસ્તાવેજોની ચકાસણી ચાલુ છે અને આગામી દિવસોમાં ટેક્સચોરીનો આંકડો વધુ વધી શકે છે તેવી શક્યતા છે.

જૂનાગઢ: ગિરનાર પર્વત પર સિંહનો આતંક, 11 વર્ષના બાળકને મોઢામાં દબોચી જંગલમાં ખેંચી ગયો, પરિવારમાં માતમ

પવિત્ર યાત્રાધામ ગિરનાર પર એક અત્યંત હૃદયદ્રાવક અને કાળજું કંપાવી દે તેવી ઘટના સામે આવી છે. મહેમદાવાદથી ગિરનારની યાત્રાએ આવેલા એક પરિવારના 12 વર્ષના બાળક મયૂરસિંહ ચૌહાણ પર સિંહે જીવલેણ હુમલો કર્યો. પરિવાર જ્યારે મુખ્ય ગેટથી આશરે 50 પગથિયાં ઉપર પહોંચ્યો હતો, ત્યારે અંધારામાં છુપાયેલા સિંહે અચાનક તરાપ મારી હતી અને બાળકને મોઢામાં દબોચીને જંગલ તરફ ભાગી ગયો હતો. પરિવારજનોની ચીસાચીસ અને ભારે દોડધામ બાદ વન વિભાગ અને પોલીસ દ્વારા હાથ ધરવામાં આવેલી શોધખોળમાં બાળકના કપડાં, બૂટ અને શરીરના અવશેષો મળી આવ્યા છે, જે ઘટનાની ગંભીરતા દર્શાવે છે.

આ દુર્ઘટના બાદ ગિરનારની મુખ્ય સીડી પર સામાન્ય અવરજવર તત્કાલ અસરથી બંધ કરી દેવામાં આવી છે અને શ્રદ્ધાળુઓને અન્ય વૈકલ્પિક માર્ગનો ઉપયોગ કરવા સૂચના આપવામાં આવી છે. આ ઘટનાને પગલે ગિરનાર પર લાઇટિંગની અપૂરતી વ્યવસ્થા અંગે પરિવારજનોએ વહીવટી તંત્ર સામે ભારે આક્રોશ વ્યક્ત કર્યો છે. હાલ વન વિભાગ દ્વારા સિંહને પકડવા માટે ઘટનાસ્થળે પાંજરા ગોઠવી સઘન તપાસ શરૂ કરવામાં આવી છે.