Gandhinagar News: છેલ્લા થોડા દિવસોથી ગુજરાતમાં પેટ્રોલ અને ડીઝલની અછત હોવાની વાતો વહેતી થઈ છે, જેના કારણે અનેક શહેરોમાં પેટ્રોલ પંપ પર વાહનોની લાંબી કતારો જોવા મળી રહી છે. આ પરિસ્થિતિને જોતા રાજ્ય સરકાર એક્શન મોડમાં આવી છે. રાજ્યના ગૃહ રાજ્યમંત્રી (અને ડેપ્યુટી સીએમ તરીકે કાર્યરત) હર્ષ સંઘવીએ સ્પષ્ટતા કરી છે કે આ માત્ર પાયાવિહોણી અફવાઓ છે.
સપ્લાય ચેઇન સંપૂર્ણ સુરક્ષિત છે
હર્ષ સંઘવીએ મીડિયા સાથેની વાતચીતમાં જણાવ્યું હતું કે, ગુજરાતમાં પેટ્રોલ અને ડીઝલનો પૂરતો જથ્થો ઉપલબ્ધ છે. સોશિયલ મીડિયા પર જે રીતે અછત હોવાના મેસેજ વાયરલ થઈ રહ્યા છે તેમાં કોઈ સત્ય નથી. રાજ્યના ડેપોમાં ઈંધણનો પર્યાપ્ત જથ્થો છે. ઓઈલ કંપનીઓ દ્વારા પેટ્રોલ પંપ સુધી ઈંધણ પહોંચાડવાની પ્રક્રિયા રાબેતા મુજબ ચાલુ છે. કેન્દ્રીય પેટ્રોલિયમ મંત્રાલયે પણ પુષ્ટિ કરી છે કે દેશ સ્તરે ઈંધણ પુરવઠો સતત અને પૂરતો છે.
અફવા ફેલાવનારાઓ સામે થશે કાયદેસરની કાર્યવાહી
રાજ્ય સરકારે આ બાબતને ગંભીરતાથી લીધી છે. હર્ષ સંઘવીએ કડક શબ્દોમાં ચેતવણી આપતા કહ્યું છે કે, "જે લોકો સોશિયલ મીડિયા કે અન્ય માધ્યમો દ્વારા ખોટી માહિતી ફેલાવી જનતામાં ગભરાટ (Panic) ઉભો કરી રહ્યા છે, તેમની સામે કડક કાયદેસરની કાર્યવાહી કરવામાં આવશે." ખોટી અફવા ફેલાવવી એ ગુનો છે અને પોલીસ આ બાબતે સતર્ક છે.
જનતાને અપીલ: ગભરાશો નહીં
સરકાર દ્વારા લોકોને ખાસ અપીલ કરવામાં આવી છે કે સોશિયલ મીડિયા પર આવતા વણચકાસાયેલા મેસેજ પર વિશ્વાસ ન કરવો. જરૂરિયાત કરતા વધુ ઈંધણનો સંગ્રહ કરવાનો પ્રયાસ ન કરવો, કારણ કે સપ્લાય સામાન્ય છે. માત્ર સત્તાવાર સરકારી નિવેદનો કે વિશ્વસનીય સમાચાર માધ્યમો પર જ ભરોસો રાખવો.
