Gujarat ST: ગુજરાત રાજ્ય માર્ગ વાહન વ્યવહાર નિગમ (GSRTC) હવે ઝડપથી સંપૂર્ણ ડિજિટલ પરિવહન વ્યવસ્થા તરફ આગળ વધી રહ્યું છે. 'ડિજિટલ ઈન્ડિયા' અને 'ડિજિટલ ગુજરાત'ના વિઝનને સાકાર કરતા નિગમે મુસાફરો માટે QR કોડ પેમેન્ટ, નવા ઈલેક્ટ્રોનિક ટિકિટિંગ મશીનો (ETM) અને ઓનલાઈન રિઝર્વેશન જેવી અનેક આધુનિક સુવિધાઓ શરૂ કરી છે. આ પહેલના કારણે માત્ર એક વર્ષમાં 1.03 કરોડથી વધુ QR ટ્રાન્ઝેક્શન નોંધાયા છે અને નિગમને રૂ.112.45 કરોડથી વધુની આવક થઈ છે.
એક વર્ષમાં 1.03 કરોડથી વધુ QR ટ્રાન્ઝેક્શન
નાયબ મુખ્યમંત્રી હર્ષ સંઘવીના માર્ગદર્શન હેઠળ GSRTC દ્વારા બસોમાં ETM QR કોડ પેમેન્ટ સિસ્ટમ અમલમાં મૂકવામાં આવી છે. એપ્રિલ 2025થી મે 2026 દરમિયાન મુસાફરોએ કુલ 1.03 કરોડથી વધુ QR ટ્રાન્ઝેક્શન કર્યા છે, જેના પરિણામે નિગમને રૂ.112.45 કરોડથી વધુની આવક થઈ છે.
આંકડાઓ દર્શાવે છે કે એપ્રિલ 2025માં જ્યાં દર મહિને 4.60 લાખ જેટલા QR ટ્રાન્ઝેક્શન થતા હતા, ત્યાં મે 2026માં આ સંખ્યા વધીને 17.34 લાખથી વધુ સુધી પહોંચી ગઈ છે. એટલે કે માત્ર એક વર્ષમાં લગભગ ચાર ગણો વધારો નોંધાયો છે. હાલ દર મહિને સરેરાશ રૂ.19.37 કરોડની આવક QR પેમેન્ટ મારફતે થઈ રહી છે.
તમામ 125 ડેપોમાં 10,500 નવા ETM મશીનો ફાળવાયા
GSRTCના પી.આર.ઓ. શ્રદ્ધા ભટ્ટના જણાવ્યા મુજબ, નિગમના 16 વિભાગ અને 125 ડેપો માટે કુલ 10,500 નવા ઈ-બીટીએમ (ETM) મશીનો ફાળવવામાં આવ્યા છે.
અગાઉ QR કોડ દ્વારા ટિકિટ બુકિંગની સુવિધા મુખ્યત્વે પ્રીમિયમ બસોમાં ઉપલબ્ધ હતી, પરંતુ મુસાફરો તરફથી સારો પ્રતિસાદ મળતા હવે નિગમની તમામ બસ સેવાઓ અને તમામ ડેપોમાં આ સુવિધા શરૂ કરવામાં આવી છે.
આ પહેલના કારણે મુસાફરોને છૂટા પૈસાની સમસ્યામાંથી કાયમી રાહત મળશે. ઉપરાંત કંડક્ટરોનો સમય બચશે અને સમગ્ર વ્યવસ્થામાં વધુ પારદર્શિતા આવશે.
હવે 2,500 લોકલ ટ્રિપ્સ માટે પણ ઓનલાઈન બુકિંગ
GSRTC દ્વારા મુસાફરોની સુવિધાને વધુ વિસ્તૃત કરવામાં આવી છે. અત્યાર સુધી ઓનલાઈન રિઝર્વેશન મુખ્યત્વે લાંબા અંતરની અને પ્રીમિયમ બસ સેવાઓ માટે ઉપલબ્ધ હતું, પરંતુ હવે 100 કિલોમીટરથી વધુ અંતર કાપતી આશરે 2,500 લોકલ બસ ટ્રિપ્સને પણ ઓનલાઈન રિઝર્વેશન પ્લેટફોર્મ સાથે જોડવામાં આવી છે.
આ નિર્ણય ખાસ કરીને ગ્રામીણ અને અંતરિયાળ વિસ્તારોમાં રહેતા મુસાફરો માટે ખૂબ જ ઉપયોગી સાબિત થશે. હવે મુસાફરોને બસ સ્ટેન્ડ પર લાંબી કતારમાં ઉભા રહેવાની જરૂર નહીં પડે અને તેઓ ઘરે બેઠા જ પોતાની લોકલ બસની ટિકિટ એડવાન્સમાં બુક કરી શકશે.
વર્ષ 2026માં 39 હજારથી વધુ ટ્રિપ્સનું સંચાલન
વર્ષ 2026ના પ્રથમ છ મહિનામાં GSRTC દ્વારા પ્રીમિયમ અને નોન-પ્રીમિયમ મળીને કુલ 39,372 ટ્રિપ્સનું સફળ સંચાલન કરવામાં આવ્યું હતું. ઓનલાઈન એડવાન્સ બુકિંગ સુવિધાને પણ મુસાફરો તરફથી સારો પ્રતિસાદ મળી રહ્યો છે.
ડિજિટલ સેવાઓના વિસ્તરણથી રોકડ વ્યવહારોમાં ઘટાડો થયો છે, જેના કારણે સમગ્ર વહીવટી વ્યવસ્થામાં પારદર્શિતા વધવા સાથે કામગીરી વધુ સરળ બની છે.
વેકેશનમાં એસી અને સ્લીપર બસોની ભારે માંગ
મે 2026 દરમિયાન ઉનાળાના વેકેશનને કારણે GSRTCની પ્રીમિયમ એસી બસ સેવાઓમાં બુકિંગનો દર 78.85 ટકા સુધી પહોંચ્યો હતો.
તે ઉપરાંત વોલ્વો બસોમાં પણ મુસાફરોનો સારો પ્રતિસાદ જોવા મળ્યો હતો. એપ્રિલ મહિનામાં વોલ્વો બસોમાં 50 ટકા જ્યારે મે મહિનામાં 57.81 ટકા બુકિંગ નોંધાયું હતું.
નોન-પ્રીમિયમ સ્લીપર બસ સેવાઓમાં છેલ્લા છ મહિનામાં સરેરાશ 77.53 ટકાનો બુકિંગ દર નોંધાયો હતો, જે દર્શાવે છે કે સામાન્ય મુસાફરોમાં પણ આ સેવાઓ પ્રત્યે વિશ્વાસ અને પસંદગી વધી રહી છે.
ડિજિટલ ગુજરાત તરફ GSRTCનું વધુ એક પગલું
ગુજરાત સરકાર દ્વારા જાહેર સેવાઓને વધુ પારદર્શક અને ટેક્નોલોજી આધારિત બનાવવા માટે સતત પ્રયાસો કરવામાં આવી રહ્યા છે. GSRTCમાં QR કોડ પેમેન્ટ, નવા ETM મશીનો અને ઓનલાઈન રિઝર્વેશન જેવી સુવિધાઓનો વ્યાપ વધારવો એ ડિજિટલ ગુજરાતના લક્ષ્ય તરફનું મહત્વપૂર્ણ પગલું માનવામાં આવી રહ્યું છે.
આ પહેલના કારણે માત્ર મુસાફરોને સરળતા જ નહીં પરંતુ નિગમના વહીવટી તંત્રને પણ વધુ કાર્યક્ષમ અને પારદર્શક બનાવવામાં મદદ મળી રહી છે.
આ પણ વાંચો: રાજકોટમાં 'ઘર બચાવો'ની પોકાર : નળ કનેક્શન કાપવા માટે ખોદેલા ખાડામાં જ સૂઈ ગયા વૃદ્ધ
લોકલ ટ્રિપ્સમાં ઓનલાઈન બુકિંગની શરૂઆત એક મોટી સુવિધા
ગુજરાતમાં દરરોજ લાખો લોકો GSRTC બસ સેવાનો ઉપયોગ કરે છે. કેશલેસ પેમેન્ટ, ઓનલાઈન રિઝર્વેશન અને આધુનિક ટિકિટિંગ સિસ્ટમ જેવી સુવિધાઓના કારણે મુસાફરોને વધુ સરળ, સુરક્ષિત અને સમય બચાવતી સેવાઓ મળી રહી છે. ખાસ કરીને ગામડાં અને અંતરિયાળ વિસ્તારોના મુસાફરો માટે 2,500 લોકલ ટ્રિપ્સમાં ઓનલાઈન બુકિંગની શરૂઆત એક મોટી સુવિધા સાબિત થઈ શકે છે.
