આજના સમયમાં જ્યારે આખી દુનિયા હાઈ-સ્પીડ બુલેટ ટ્રેન અને મેગલેવ ટ્રેનો પાછળ દોડી રહી છે, ત્યારે યુરોપના એક દેશમાં એવી ટ્રેન છે જે તેની ધીમી ગતિ માટે વિશ્વભરમાં પ્રખ્યાત છે. સામાન્ય રીતે ટ્રેન મોડી પડે તો મુસાફરો ગુસ્સે થતા હોય છે, પરંતુ સ્વિટ્ઝરલેન્ડની 'ગ્લેશિયર એક્સપ્રેસ' (Glacier Express) એક એવી ટ્રેન છે જેમાં મુસાફરો ઈચ્છે છે કે સફર ક્યારેય પૂરી જ ન થાય! માત્ર 290 કિલોમીટરનું અંતર કાપવા માટે આ ટ્રેન પૂરા 8 કલાકનો સમય લે છે. એટલે કે તેની સરેરાશ ઝડપ માત્ર 36 કિમી પ્રતિ કલાક છે. આમ છતાં, આ ટ્રેનમાં મુસાફરી કરવા માટે પ્રવાસીઓ મહિનાઓ અગાઉથી ટિકિટ બુક કરાવે છે અને પડાપડી કરે છે. આ ટ્રેનની ધીમી ગતિ પાછળ કોઈ ટેકનિકલ ખામી નહીં, પરંતુ કુદરતની સુંદરતા અને સુરક્ષાનું એક મોટું કારણ છુપાયેલું છે.
આલ્પ્સની પહાડીઓ વચ્ચેની સુંદર સફર
ગ્લેશિયર એક્સપ્રેસ સ્વિટ્ઝરલેન્ડના બે પ્રખ્યાત પહાડી વિસ્તારો 'જર્મેટ' (Zermatt) અને 'સેન્ટ મોરિટ્ઝ' (St. Moritz) ને એકબીજા સાથે જોડે છે. આ ટ્રેનનો મુખ્ય ઉદ્દેશ્ય મુસાફરોને ઝડપથી પહોંચાડવાનો નથી, પરંતુ તેમને સ્વિસ આલ્પ્સની અદભૂત ગિરિમાળાઓ, બરફથી ઢંકાયેલા પહાડો અને લીલાછમ મેદાનોની સફર કરાવવાનો છે. આ જ કારણ છે કે તેને વિશ્વની સૌથી ધીમી એક્સપ્રેસ ટ્રેનનું બિરુદ મળ્યું છે.
બારીઓ જ નહીં, છત પણ છે કાચની!
આ ટ્રેનની સૌથી મોટી વિશેષતા તેની ડિઝાઈન છે. ટ્રેનમાં મુસાફરો માટે પેનોરોમિક કાચની મોટી બારીઓ અને અર્ધ-કાચની છત બનાવવામાં આવી છે. જેના કારણે મુસાફરો ટ્રેનની અંદર બેસીને આજુબાજુની સુંદરતાનો 360-ડિગ્રી વ્યુ માણી શકે છે. 8 કલાકની આ લાંબી સફર દરમિયાન મુસાફરોને એક સેકન્ડ માટે પણ કંટાળો આવતો નથી.
91 ટનલ અને 291 બ્રિજનો રોમાંચક અનુભવ
ગ્લેશિયર એક્સપ્રેસનો રૂટ જેટલો સુંદર છે તેટલો જ પડકારજનક પણ છે. પોતાની એક સફર દરમિયાન આ ટ્રેન 91 ટનલ (બનાવટી ગુફાઓ) અને 291 બ્રિજ પરથી પસાર થાય છે. પહાડોના અત્યંત જોખમી વળાંકો અને નેરો-ગેજ ટ્રેક હોવાને કારણે અહીં સ્પીડ વધારવી જોખમી સાબિત થઈ શકે છે. સુરક્ષાના કારણોસર અને મુસાફરો દરેક દ્રશ્યને કેમેરામાં કેદ કરી શકે તે માટે તેની સ્પીડ જાણીજોઈને ધીમી રાખવામાં આવે છે.
5-સ્ટાર હોટલ જેવી સુવિધાઓ
આ ટ્રેન માત્ર સુંદરતા જ નહીં, પણ લક્ઝરી માટે પણ જાણીતી છે. ટ્રેનમાં ફર્સ્ટ ક્લાસ, સેકન્ડ ક્લાસ અને પ્રીમિયમ 'એક્સિલન્સ ક્લાસ' (Excellence Class) હોય છે. એક્સિલન્સ ક્લાસમાં મુસાફરોને 5-સ્ટાર હોટલ જેવી સુવિધાઓ, લક્ઝરી ભોજન અને પર્સનલ સર્વિસ આપવામાં આવે છે. સ્વિસ એન્જિનિયરિંગનો આ એક અદભૂત નમૂનો છે જે પ્રકૃતિ અને વિજ્ઞાનનો મેળાપ કરાવે છે.
