February 2026 Sales Reports : ભારતીય ઓટોમોબાઈલ માર્કેટ માટે ફેબ્રુઆરી 2026 નો મહિનો ખૂબ જ શાનદાર રહ્યો છે. આ મહિને પણ ગ્રાહકોમાં SUV અને કોમ્પેક્ટ કારનો ક્રેઝ જોવા મળ્યો હતો. ટાટા મોટર્સ, મારુતિ સુઝુકી, હ્યુન્ડાઇ અને મહિન્દ્રા જેવી મોટી કંપનીઓએ વેચાણમાં મજબૂત પકડ જાળવી રાખી છે. ખાસ કરીને મધ્યમ વર્ગ અને પ્રીમિયમ ફીચર્સ શોધતા ગ્રાહકોને કારણે બજારમાં તેજી જોવા મળી રહી છે.
ટાટા નેક્સનનો દબદબો
ટાટા નેક્સન ફરી એકવાર ભારતની સૌથી વધુ વેચાતી કાર બનીને ઉભરી છે. ફેબ્રુઆરીમાં નેક્સનના 19,430 યુનિટ વેચાયા હતા. શાનદાર સેફ્ટી અને આધુનિક ફીચર્સને કારણે તે ભારતીયોની પહેલી પસંદ બની રહી છે. તેની પાછળ મારુતિ સુઝુકી ડિઝાયર 19,326 યુનિટ સાથે બીજા ક્રમે રહી છે, જે સેડાન સેગમેન્ટમાં હજુ પણ બાદશાહ છે.
ટાટા પંચની મજબૂત પકડ
ટાટાની નાની SUV 'પંચ' પણ પાછળ નથી. 18,748 યુનિટ સાથે તે માર્કેટમાં ત્રીજા નંબરે અને SUV લિસ્ટમાં બીજા નંબરે રહી છે. હાલમાં આવેલા નવા અપડેટ અને સ્ટાઇલિશ ડિઝાઇનને કારણે યુવાનોમાં આ કાર ખૂબ જ લોકપ્રિય બની છે.
SUV સેગમેન્ટમાં સ્પર્ધા
મધ્યમ કદની SUV માં હ્યુન્ડાઇ ક્રેટાનું વર્ચસ્વ કાયમ છે, જેના 17,938 યુનિટ વેચાયા છે. તેની નજીક જ મારુતિ સુઝુકી બ્રેઝા 17,863 યુનિટ સાથે રહી હતી. ફેમિલી કાર તરીકે જાણીતી મારુતિ એર્ટિગા (MPV) એ પણ 17,807 યુનિટ વેચીને પોતાની લોકપ્રિયતા સાબિત કરી છે.
બજેટ અને પ્રીમિયમ હેચબેક
શહેરી વિસ્તારોમાં હજુ પણ હેચબેક કારની માંગ છે. મારુતિ વેગન આર (14,885 યુનિટ) અને મારુતિ સ્વિફ્ટ (14,833 યુનિટ) વચ્ચે જોરદાર સ્પર્ધા જોવા મળી હતી. બીજી તરફ, પ્રીમિયમ હેચબેક સેગમેન્ટમાં મારુતિ બલેનો 14,632 યુનિટ સાથે ટોપ 10 માં સ્થાન બનાવવામાં સફળ રહી છે.
મહિન્દ્રાનો પાવર
મહિન્દ્રા સ્કોર્પિયો પોતાની મજબૂત બનાવટ અને રોડ પ્રેઝન્સ માટે જાણીતી છે. ફેબ્રુઆરીમાં સ્કોર્પિયોના 14,665 યુનિટ વેચાયા હતા, જે દર્શાવે છે કે ગ્રાહકો હજુ પણ પાવરફુલ SUV તરફ આકર્ષાઈ રહ્યા છે.
કઈ કંપનીનો દબદબો રહ્યો?
ફેબ્રુઆરી 2026 ના આંકડા સ્પષ્ટ કરે છે કે, ભારતીય ગ્રાહકો હવે સુરક્ષા અને લુક્સને વધુ મહત્વ આપી રહ્યા છે, જેના કારણે ટાટાની ગાડીઓ ટોચ પર છે. જોકે, મારુતિ સુઝુકી પોતાની વિવિધ રેન્જ સાથે હજુ પણ વોલ્યુમની દ્રષ્ટિએ મજબૂત છે.
