પાકિસ્તાનના પૂર્વ વડાપ્રધાન ઈમરાન ખાનની મુશ્કેલીઓમાં સતત વધારો થઈ રહ્યો છે. હાલમાં જેલવાસ ભોગવી રહેલા ઈમરાન ખાનના સ્વાસ્થ્ય અંગે એક એવો ચોંકાવનારો અહેવાલ સામે આવ્યો છે જેણે સમગ્ર પાકિસ્તાન સહિત આંતરરાષ્ટ્રીય સ્તરે ચર્ચા જગાવી છે. અદિયાલા જેલમાં બંધ ઈમરાન ખાને તેમની જમણી આંખની 85 ટકા દ્રષ્ટિ ગુમાવી દીધી હોવાનું મેડિકલ રિપોર્ટમાં બહાર આવ્યું છે. આ મામલાની ગંભીરતાને જોતા પાકિસ્તાનની સુપ્રીમ કોર્ટે પણ કડક વલણ અપનાવ્યું છે અને સરકારને તેમની તાત્કાલિક મેડિકલ તપાસ કરવા માટે આદેશ આપ્યો છે. અચાનક આવેલી આ બીમારી અને જેલ પ્રશાસનની બેદરકારીને કારણે પીટીઆઈ (PTI) કાર્યકર્તાઓ અને ખાનના પરિવારમાં ભારે રોષ જોવા મળી રહ્યો છે.
ઈમરાન ખાનની જમણી આંખમાં માત્ર 15% જ દેખાય છે: સુપ્રીમ કોર્ટમાં રિપોર્ટ રજૂ
પાકિસ્તાનની સુપ્રીમ કોર્ટમાં મુખ્ય ન્યાયાધીશ યાહ્યા આફ્રિદીની બેન્ચ સમક્ષ ઈમરાન ખાનના સ્વાસ્થ્ય અંગેની સુનાવણી કરવામાં આવી હતી. કોર્ટ દ્વારા નિયુક્ત એમિકસ ક્યુરી બેરિસ્ટર સલમાન સફદરે જેલમાં મુલાકાત લીધા બાદ અહેવાલ આપ્યો કે પૂર્વ પીએમની જમણી આંખમાં હવે માત્ર 15 ટકા જ દ્રષ્ટિ બાકી છે. ઓક્ટોબર 2025 સુધી તેમની બંને આંખો સંપૂર્ણ સ્વસ્થ હતી, પરંતુ ત્યારબાદ તેમને ઝાંખું દેખાવાની ફરિયાદ શરૂ થઈ હતી. યોગ્ય સમયે સારવાર ન મળતા હવે સ્થિતિ અત્યંત નાજુક બની છે.
મેડિકલ રિપોર્ટમાં CRVO રોગનો ખુલાસો: આંખમાં લોહીના ગંઠાવા બન્યા કારણ
પાકિસ્તાન ઇન્સ્ટિટ્યૂટ ઓફ મેડિકલ સાયન્સ (PIMS) ના નિષ્ણાતોના મતે, ઈમરાન ખાનને સેન્ટ્રલ રેટિનલ વેન ઓક્લુઝન (CRVO) નામની ગંભીર સમસ્યા થઈ છે. આ રોગમાં રેટિનાની નસમાં લોહીના ગંઠાવા જામી જાય છે, જેના કારણે દ્રષ્ટિ અચાનક જતી રહે છે. ડોક્ટરોના જણાવ્યા અનુસાર, હાઈ બ્લડ પ્રેશર અથવા ડાયાબિટીસ જેવી સમસ્યાઓ આ રોગ માટે મુખ્ય જવાબદાર છે. ઈમરાન ખાનને જેલમાં આ કન્ડિશન માટે ઇન્જેક્શન આપવામાં આવ્યા હતા, પરંતુ દ્રષ્ટિમાં કોઈ નોંધપાત્ર સુધારો થયો નથી.
ઈમરાન ખાનની બહેન અલીમા ખાન કોર્ટ બહાર ધ્રુસકે-ધ્રુસકે રડી પડી
જ્યારે કોર્ટમાં ઈમરાન ખાનની દ્રષ્ટિ ગુમાવવાના સમાચાર સત્તાવાર રીતે જાહેર થયા, ત્યારે કોર્ટની બહાર ઉભેલા તેમના બહેન અલીમા ખાન પોતાની લાગણીઓ પર કાબૂ રાખી શક્યા નહીં અને રડી પડ્યા. તેમણે જેલ પ્રશાસન પર આરોપ લગાવ્યો કે પરિવારને આ ગંભીર બીમારી વિશે અંધારામાં રાખવામાં આવ્યો હતો. પીટીઆઈ નેતાઓનો દાવો છે કે ઓગસ્ટ 2025થી તેઓ મેડિકલ તપાસ માટે વિનંતી કરી રહ્યા હતા, પરંતુ સરકારે જાણીજોઈને વિલંબ કર્યો છે.
સુપ્રીમ કોર્ટનો કડક આદેશ: 16 ફેબ્રુઆરી સુધીમાં સંપૂર્ણ ચેકઅપ કરો
સુપ્રીમ કોર્ટે પાકિસ્તાન સરકારને આદેશ આપ્યો છે કે 16 ફેબ્રુઆરી પહેલા ઈમરાન ખાનની સંપૂર્ણ બોડી ચેકઅપ અને આંખના નિષ્ણાતો દ્વારા તપાસ કરાવવામાં આવે. આ ઉપરાંત, કોર્ટે માનવીય અભિગમ અપનાવીને ઈમરાન ખાનને જેલમાંથી જ તેમના પુત્રો કાસિમ અને સુલેમાન સાથે ફોન પર વાત કરવાની મંજૂરી આપી છે. મુખ્ય ન્યાયાધીશે ટિપ્પણી કરી હતી કે કોઈપણ કેદીના સ્વાસ્થ્ય અને સુરક્ષાની જવાબદારી રાજ્યની છે.
ભારતના ડાયાબિટીસ દર્દીઓ માટે પણ CRVO એક મોટો ખતરો
ભારતમાં પણ આ બીમારી અંગે ચિંતાજનક આંકડાઓ સામે આવ્યા છે. એક સંશોધન મુજબ, દર 100 ડાયાબિટીસના દર્દીઓમાંથી 3 વ્યક્તિને રેટિનાની નસોમાં અવરોધનો રોગ થાય છે. ભારતમાં ડાયાબિટીસ અને હાઈ બ્લડ પ્રેશરનું પ્રમાણ વધુ હોવાથી લોકોએ આંખની નિયમિત તપાસ કરાવવી જોઈએ, કારણ કે ઈમરાન ખાનની જેમ ઘણા દર્દીઓને ખબર પડે ત્યાં સુધીમાં ઘણી મોડું થઈ જાય છે.
3 વર્ષથી જેલમાં બંધ ઈમરાન ખાન પર 100થી વધુ કેસ
ઉલ્લેખનીય છે કે ઓગસ્ટ 2023થી ઈમરાન ખાન જેલમાં બંધ છે. તોશાખાના કેસ, ભ્રષ્ટાચાર અને સરકારી રહસ્યો લીક કરવા સહિતના 100થી વધુ કેસ તેમની સામે ચાલી રહ્યા છે. ભ્રષ્ટાચારના કેસમાં તેમને 14 વર્ષની સજા પણ સંભળાવવામાં આવી છે. જોકે, વર્તમાન પરિસ્થિતિને જોતા હવે પાકિસ્તાનના રાજકારણમાં ઈમરાન ખાનના સ્વાસ્થ્યનો મુદ્દો ફરી ગરમાયો છે.
