મધ્યપ્રદેશના ભૂતપૂર્વ મુખ્યમંત્રી દિગ્વિજય સિંહના ભાઈ લક્ષ્મણ સિંહ સામે પાર્ટીએ મોટી કાર્યવાહી કરી છે. કોંગ્રેસ પાર્ટીએ લક્ષ્મણ સિંહને 6 વર્ષ માટે પાર્ટીમાંથી હાંકી કાઢ્યા છે. જમ્મુ અને કાશ્મીરના પહેલગામમાં થયેલા હુમલા બાદ લક્ષ્મણ સિંહે રાહુલ ગાંધી, ઓમર અબ્દુલ્લા અને રોબર્ટ વાડ્રા વિશે નિવેદનો આપ્યા હતા, તેમના આ નિવેદનો હવે તેમને ભારે પડ્યા છે.
કોંગ્રેસનાં પત્રમાં કહેવામાં આવ્યું છે કે પાર્ટી લક્ષ્મણ સિંહ દ્વારા રાહુલ ગાંધી, ઓમર અબ્દુલ્લા અને રોબર્ટ વાડ્રા વિશે આપવામાં આવેલા નિવેદનોને અનુશાસનહીન માને છે. આ કારણે, તેમને હવે 6 વર્ષ માટે પાર્ટીમાંથી બહાર કાઢવામાં આવ્યા છે. વાસ્તવમાં, કોંગ્રેસ શિસ્ત સમિતિના અધ્યક્ષ સાંસદ તારિક અનવરે ટોચના નેતૃત્વને લક્ષ્મણને 6 વર્ષ માટે કોંગ્રેસ પાર્ટીમાંથી હાંકી કાઢવાની ભલામણ મોકલી હતી. સતત એવું સામે આવી રહ્યું હતું કે તેમને પાર્ટીમાંથી હાંકી કાઢવામાં આવી શકે છે, જોકે, હવે આ કાર્યવાહી કરવામાં આવી છે.
"લાગે છે કે તેમણે ભાજપમાં જોડાવાનું મન બનાવી લીધું છે"
પૂર્વ ધારાસભ્ય લક્ષ્મણ સિંહને પાર્ટીમાંથી હાંકી કાઢવા પર, કોંગ્રેસના નેતા તારિક અનવરે કહ્યું કે, "તેઓ સતત પાર્ટી વિરોધી પ્રવૃત્તિઓમાં સામેલ હતા અને પાર્ટી વિરુદ્ધ બોલી રહ્યા હતા. પાર્ટીના રાજ્ય એકમ દ્વારા તેમને ઘણી વખત ચેતવણી પણ આપવામાં આવી હતી. એમ લાગે છે કે તેમણે ભાજપમાં જોડાવાનું મન બનાવી લીધું છે."
પાર્ટીને નુકશાન પહોંચાડતા નિવેદનો આપ્યા
કોંગ્રેસના મીડિયા વિભાગના પ્રમુખ મુકેશ નાયકે કહ્યું કે અખિલ ભારતીય કોંગ્રેસ સમિતિએ લક્ષ્મણ સિંહને 6 વર્ષ માટે પાર્ટીમાંથી હાંકી કાઢ્યા છે. તેમનું પ્રાથમિક સભ્યપદ પણ રદ કરવામાં આવ્યું છે. નાયકે કહ્યું કે આ એક સંદેશ છે કે શિસ્ત દરેક માટે છે. ઘણી વખત લક્ષ્મણ સિંહે એવા નિવેદનો આપ્યા હતા જેનાથી પાર્ટી અસ્વસ્થ થઈ ગઈ હતી. છેલ્લું નિવેદન હતું કે રાહુલ ગાંધી અને સોનિયા ગાંધી આતંકવાદીઓ સાથે ઉભા છે. આ નિવેદન સહન ન થયું અને તેમને હાંકી કાઢવામાં આવ્યા છે. નાયકે કહ્યું કે કોંગ્રેસ ભાજપ જેવી નથી. મંત્રી વિજય શાહ આવા નિવેદનો આપ્યા પછી પણ જ્યાં છે ત્યાં જ બેઠા છે. ભાજપ લક્ષ્મણ સિંહને તે જ ગ્રુપમાં મૂકશે જેમાં સુરેશ પચૌરી છે. કોંગ્રેસમાં અનુશાસનહીનતા સહન કરવામાં આવશે નહીં. કોઈ પણ હોય, જો તેમાં અનુશાસનહીનતા હશે તો તેને પાર્ટીમાંથી બહારનો રસ્તો બતાવી દેવામાં આવશે.
