Farmers Protest Delhi: સંસદના ચોમાસુ સત્ર દરમિયાન દેશની રાજધાની દિલ્હીમાં રાજકીય અને સુરક્ષાની દ્રષ્ટિએ તણાવપૂર્ણ સ્થિતિ સર્જાઈ છે. એક તરફ CJP (Cockroach Janta Party)ના વિરોધ પ્રદર્શનને કારણે સંસદ અને આસપાસના વિસ્તારોમાં ભારે પોલીસ બંદોબસ્ત ગોઠવવામાં આવ્યો છે, ત્યારે બીજી તરફ પંજાબ સહિત અનેક રાજ્યોમાંથી હજારો ખેડૂતો દિલ્હી તરફ કૂચ કરી રહ્યા છે. 21 જુલાઈએ દિલ્હીના કિસાન ઘાટ ખાતે યોજાનારી મહારેલીને લઈને કેન્દ્ર સરકાર માટે વધુ એક મોટો પડકાર ઊભો થયો છે. ખેડૂત સંગઠનોનો દાવો છે કે, ભારત-અમેરિકા વચ્ચે પ્રસ્તાવિત વેપાર કરાર દેશના કૃષિ અને ડેરી ક્ષેત્ર માટે નુકસાનકારક સાબિત થઈ શકે છે. તેઓ સરકાર પાસે આ વેપાર કરાર સંબંધિત તમામ દસ્તાવેજો જાહેર કરવાની માંગ કરી રહ્યા છે. ખેડૂત નેતાઓનું કહેવું છે કે આવા મહત્વપૂર્ણ નિર્ણય પહેલાં ખેડૂતો, ડેરી ઉત્પાદકો, મજૂરો અને અન્ય હિતધારકો સાથે વ્યાપક ચર્ચા થવી જરૂરી છે.
ભારત-અમેરિકા વેપાર કરાર સામે ખેડૂતોનો વિરોધ
ખેડૂત સંગઠનોનું માનવું છે કે, ભારતની ડેરી વ્યવસ્થા કરોડો ગ્રામીણ પરિવારોની રોજીરોટીનો આધાર છે. જો વેપાર કરાર હેઠળ વિદેશી કૃષિ અને ડેરી ઉત્પાદનોને ભારતીય બજારમાં વધુ પ્રવેશ મળશે તો તેની સીધી અસર સ્થાનિક ખેડૂતો અને દૂધ ઉત્પાદકો પર પડશે. દેશ બચાવો મોરચા સહિતના સંગઠનોએ કેન્દ્ર સરકાર સમક્ષ માંગ કરી છે કે ભારત-અમેરિકા વેપાર કરાર સાથે જોડાયેલા તમામ દસ્તાવેજો જાહેર કરવામાં આવે. સાથે જ કોઈપણ અંતિમ નિર્ણય લેતા પહેલાં ખેડૂતો, મજૂરો, ડેરી ક્ષેત્રના પ્રતિનિધિઓ અને અન્ય સંબંધિત પક્ષો સાથે ચર્ચા કરવામાં આવે.
પંજાબથી દિલ્હી તરફ ખેડૂતોના કાફલા રવાના
કિસાન મજદૂર સંઘર્ષ કમિટીના વરિષ્ઠ નેતા સરવણ સિંહ પંઢેરે જણાવ્યું કે, અમૃતસર અને ગુરદાસપુર સહિત પંજાબના વિવિધ જિલ્લાઓમાંથી સેંકડો બસો, ટ્રેક્ટર અને અન્ય વાહનો દ્વારા ખેડૂતોના કાફલા દિલ્હી તરફ રવાના થયા છે. તેમણે જણાવ્યું કે, કિસાન મજદૂર મોરચા, ભારતીય કિસાન યુનિયન (એકતા સંઘર્ષ) સહિત અનેક ખેડૂત સંગઠનો આ મહારેલીમાં ભાગ લઈ રહ્યા છે. નક્કી કરાયેલા કાર્યક્રમ મુજબ તમામ કાફલાઓ રસ્તામાં અલગ-અલગ સ્થળોએ રાત્રિ રોકાણ કરીને દિલ્હી પહોંચશે.
આ પણ વાંચો: સંસદ કૂચ બાદ સરકાર સાથે CJP નેતાઓની બેઠક : જે.પી. નડ્ડાને માંગપત્ર સોંપાયું; જાણો શું છે મુખ્ય માંગણીઓ
શંભુ બોર્ડર થઈને કિસાન ઘાટ પહોંચશે મહારેલી
ખેડૂતોનો મુખ્ય કાફલો ફતેહગઢ સાહિબ-સરહિંદમાં રાત્રિ રોકાણ કર્યા બાદ શંભુ બોર્ડર મારફતે દિલ્હી પ્રવેશ કરશે. 21 જુલાઈએ દિલ્હીના કિસાન ઘાટ ખાતે યોજાનારી મહારેલીમાં પંજાબ ઉપરાંત હરિયાણા, રાજસ્થાન, ઉત્તર પ્રદેશ, ઉત્તરાખંડ, હિમાચલ પ્રદેશ, મધ્ય પ્રદેશ, મહારાષ્ટ્ર, ઓડિશા અને દિલ્હી સહિત અનેક રાજ્યોના ખેડૂતો જોડાય તેવી શક્યતા છે. ખેડૂત સંગઠનોનું કહેવું છે કે,આ મહારેલી દ્વારા કેન્દ્ર સરકાર સુધી પોતાની ચિંતાઓ પહોંચાડવાનો પ્રયાસ કરવામાં આવશે.
અમેરિકન ઉત્પાદનોને લઈને ખેડૂતોમાં ચિંતા
ખેડૂત નેતા સરવણ સિંહ પંઢેરના જણાવ્યા અનુસાર પ્રસ્તાવિત વેપાર કરારમાં કૃષિ, ડેરી, ઉદ્યોગ, ડિજિટલ વેપાર, ઈ-કોમર્સ અને રોકાણ જેવા અનેક ક્ષેત્રોનો સમાવેશ થઈ શકે છે.
તેમણે દાવો કર્યો કે અમેરિકા લાંબા સમયથી પોતાના કૃષિ અને ડેરી ઉત્પાદનો માટે ભારતીય બજારમાં વધુ પ્રવેશ મેળવવા પ્રયાસ કરી રહ્યું છે. જો સસ્તા અમેરિકન કૃષિ અને ડેરી ઉત્પાદનો મોટા પ્રમાણમાં ભારતીય બજારમાં આવશે તો તેની અસર દેશના ખેડૂતો, દૂધ ઉત્પાદકો, નાના વેપારીઓ અને કૃષિ આધારિત ઉદ્યોગો પર પડી શકે છે.
સરકાર સામે વધ્યો રાજકીય અને સુરક્ષાનો પડકાર
સંસદના ચોમાસુ સત્ર દરમિયાન પહેલાથી જ વિવિધ રાજકીય મુદ્દાઓને લઈને વિરોધ પ્રદર્શન ચાલી રહ્યા છે. CJPના પ્રદર્શન બાદ હવે ખેડૂતોના દિલ્હી કૂચને કારણે રાજધાનીમાં સુરક્ષા વધુ કડક બનાવવામાં આવી છે. આગામી દિવસોમાં ખેડૂતોની મહારેલી અને સરકાર વચ્ચેની ચર્ચા પર સૌની નજર રહેશે. વેપાર કરાર અંગે સરકાર શું સ્પષ્ટતા કરે છે અને ખેડૂતોની માંગણીઓ પર શું નિર્ણય લેવામાં આવે છે તે રાજકીય તેમજ આર્થિક રીતે મહત્વપૂર્ણ માનવામાં આવી રહ્યું છે.
