EPFO PF Interest Credit: દેશના કરોડો કર્મચારીઓ માટે ખુશખબર છે. કર્મચારી ભવિષ્ય નિધિ સંગઠન (EPFO) ટૂંક સમયમાં નાણાકીય વર્ષ 2025-26 માટેનું PF વ્યાજ ખાતાધારકોના ખાતામાં જમા કરવાની પ્રક્રિયા શરૂ કરવા જઈ રહ્યું છે. કેન્દ્રીય શ્રમ અને રોજગાર મંત્રી મનસુખ માંડવિયાના જણાવ્યા મુજબ, 15 જુલાઈ સુધીમાં EPFO દ્વારા કરોડો PF ખાતાધારકોના ખાતામાં વ્યાજની રકમ ક્રેડિટ કરવામાં આવશે. આ વખતે કુલ અંદાજે રૂ.1.44 લાખ કરોડનું વ્યાજ સીધું સભ્યોના ખાતામાં ટ્રાન્સફર કરવામાં આવશે.
EPFOના આ નિર્ણયથી દેશભરના કરોડો કર્મચારીઓને સીધો લાભ મળશે. PF ખાતામાં વ્યાજ જમા થયા બાદ ખાતાધારકો ઘર બેઠા UMANG એપ, EPFO પોર્ટલ, મિસ્ડ કોલ અથવા SMS દ્વારા પોતાનું બેલેન્સ સરળતાથી ચકાસી શકશે. છેલ્લા કેટલાક વર્ષોથી EPFO સતત આકર્ષક વ્યાજદર જાળવી રાખવામાં સફળ રહ્યું છે, જેના કારણે PF હજુ પણ લાંબા ગાળાના રોકાણ માટે સૌથી વિશ્વસનીય વિકલ્પોમાંથી એક માનવામાં આવે છે.
15 જુલાઈ સુધીમાં ખાતામાં આવશે વ્યાજ
કેન્દ્રીય શ્રમ મંત્રી મનસુખ માંડવિયાના જણાવ્યા અનુસાર, EPFO દ્વારા નાણાકીય વર્ષ 2025-26 માટેનું 8.25 ટકા વાર્ષિક વ્યાજ 15 જુલાઈ સુધીમાં સભ્યોના ખાતામાં જમા કરવાની પ્રક્રિયા પૂર્ણ કરવામાં આવશે. કેન્દ્રિય ટ્રસ્ટી બોર્ડ (CBT)ની બેઠકમાં પણ ચાલુ વર્ષ માટે 8.25 ટકા વ્યાજદર યથાવત રાખવાની ભલામણ કરવામાં આવી હતી. નાણાં મંત્રાલયની મંજૂરી મળ્યા બાદ હવે વ્યાજની રકમ સીધી ખાતામાં જમા કરવામાં આવી રહી છે. નોંધનીય છે કે, સતત ત્રીજા વર્ષે PF પર 8.25 ટકા વ્યાજદર જાળવી રાખવામાં આવ્યો છે.
રૂ.1.44 લાખ કરોડથી વધુ વ્યાજ થશે ટ્રાન્સફર
આ વર્ષે EPFO દેશભરના કરોડો PF ખાતાધારકોને મળીને અંદાજે રૂ.1.44 લાખ કરોડનું વ્યાજ ચૂકવશે. આ રકમ સીધી ખાતાધારકોના PF ખાતામાં જમા થશે. EPFOના જણાવ્યા મુજબ, વૈશ્વિક આર્થિક અનિશ્ચિતતા અને બજારમાં ઉતાર-ચઢાવ હોવા છતાં વ્યાજદરમાં કોઈ ઘટાડો કરવામાં આવ્યો નથી. ETF અને અન્ય રોકાણોમાંથી મળેલા સારા વળતરના કારણે EPFO આ વ્યાજદર જાળવી રાખવામાં સફળ રહ્યું છે.
નવી ડિજિટલ સિસ્ટમથી ઝડપથી મળશે વ્યાજ
આ વર્ષે EPFOએ પોતાની ટેક્નિકલ સિસ્ટમમાં પણ મહત્વપૂર્ણ સુધારા કર્યા છે. હવે સરકારની મંજૂરી મળતાની સાથે જ વ્યાજની રકમ આપોઆપ સભ્યોના ખાતામાં જમા થવા લાગશે. અગાઉ PF ખાતાધારકોને વ્યાજ ખાતામાં દેખાવા માટે ઘણી વખત મહિનાઓ સુધી રાહ જોવી પડતી હતી, પરંતુ નવી ડિજિટલ વ્યવસ્થાના કારણે સમગ્ર પ્રક્રિયા વધુ ઝડપી અને પારદર્શક બની ગઈ છે.
આ રીતે ઘરે બેઠા ચેક કરો PF બેલેન્સ
વ્યાજ જમા થયા બાદ ખાતાધારકો અનેક સરળ માધ્યમથી પોતાનું PF બેલેન્સ જાણી શકે છે.
મિસ્ડ કોલ દ્વારા
જો તમારો મોબાઇલ નંબર UAN સાથે રજિસ્ટર્ડ છે તો માત્ર 9966044425 નંબર પર મિસ્ડ કોલ આપવાથી થોડા જ સમયમાં SMS દ્વારા PF બેલેન્સ અને છેલ્લા યોગદાનની માહિતી મળી જશે.
આ પણ વાંચો: PF ખાતાધારકો ધ્યાન આપો : EPFOની આ મહત્વની સેવાઓ થઈ બંધ, જાણો ક્યારે મળશે રાહત
SMS દ્વારા
રજિસ્ટર્ડ મોબાઇલ નંબર પરથી EPFOHO UAN ENG લખીને 7738299899 નંબર પર SMS મોકલી શકો છો. જો માહિતી હિન્દીમાં જોઈએ તો EPFOHO UAN HIN લખીને SMS મોકલી શકાય છે.
UMANG App દ્વારા
સ્માર્ટફોનમાં UMANG એપ્લિકેશન દ્વારા પણ UAN નંબરની મદદથી PF બેલેન્સ, પાસબુક અને વ્યાજની માહિતી સરળતાથી મેળવી શકાય છે.
EPFO પોર્ટલ પર
ખાતાધારકો EPFOની સત્તાવાર પાસબુક વેબસાઇટ પર UAN અને પાસવર્ડથી લોગિન કરીને પણ પોતાના PF ખાતાની સંપૂર્ણ વિગતો જોઈ શકે છે.
PF હજુ પણ રોકાણ માટે શ્રેષ્ઠ વિકલ્પોમાંનું એક
બેંક FD સહિતના ઘણા રોકાણ વિકલ્પોની સરખામણીએ EPF પર મળતું 8.25 ટકા વ્યાજ હજુ પણ આકર્ષક માનવામાં આવે છે. કર્મચારીઓ માટે નિવૃત્તિ બાદની આર્થિક સુરક્ષા સુનિશ્ચિત કરવામાં PF મહત્વપૂર્ણ ભૂમિકા ભજવે છે. EPFOએ નિષ્ક્રિય અને લાંબા સમયથી બિનઉપયોગી પડેલા ખાતાઓમાં રહેલી નાની રકમોના નિકાલ માટે પણ પાયલોટ પ્રોજેક્ટ શરૂ કરવાની મંજૂરી આપી છે. જેના કારણે આગામી સમયમાં PF સેવાઓ વધુ સરળ, ઝડપી અને પારદર્શક બનવાની શક્યતા છે.
