Stock Market Crash: અમેરિકા અને ઈરાન વચ્ચે વધતા ભૂરાજકીય તણાવની સીધી અસર હવે ભારતીય શેરબજાર પર પણ જોવા મળી રહી છે. બુધવારે બજાર ખુલતાની સાથે જ રોકાણકારોમાં ગભરાટ ફેલાયો હતો અને તમામ મુખ્ય સેક્ટરમાં ભારે વેચવાલી શરૂ થઈ ગઈ હતી. દિવસ દરમિયાન વેચવાલી વધુ તેજ બનતાં BSE સેન્સેક્સ 1800થી વધુ પોઈન્ટ તૂટીને 76,000ની સપાટી નજીક પહોંચી ગયો, જ્યારે નિફ્ટી પણ 24,000ની નીચે સરકી ગયો હતો. બજાર વિશ્લેષકોનું માનવું છે કે, મધ્યપૂર્વમાં વધતી અનિશ્ચિતતા, હોર્મુઝ જળમાર્ગ નજીકના તણાવ, ક્રૂડ ઓઈલના વધતા ભાવ અને અમેરિકાના પૂર્વ રાષ્ટ્રપતિ ડોનાલ્ડ ટ્રમ્પના ઈરાન સંબંધિત નિવેદન બાદ વૈશ્વિક રોકાણકારોમાં જોખમ ટાળવાની માનસિકતા વધી છે. તેની અસર ભારતીય બજારમાં પણ સ્પષ્ટ જોવા મળી રહી છે.
દિવસ દરમિયાન સેન્સેક્સમાં 1,800થી વધુ પોઈન્ટનો ઘટાડો
બપોરે લગભગ 2:50 વાગ્યે BSE સેન્સેક્સ 1,898.55 પોઈન્ટ એટલે કે આશરે 2.43 ટકાના ઘટાડા સાથે 76,282.17ના સ્તરે ટ્રેડ થઈ રહ્યો હતો. બીજી તરફ NSE નિફ્ટી 50 પણ 588.85 પોઈન્ટ અથવા 2.41 ટકાના ઘટાડા સાથે 23,809.85 પર પહોંચ્યો હતો. બજારમાં લગભગ તમામ મુખ્ય સેક્ટરમાં વેચવાલી જોવા મળી હતી, જેના કારણે રોકાણકારોની સંપત્તિમાં પણ મોટો ઘટાડો નોંધાયો હતો.
શરૂઆતથી જ વેચવાલીનો માહોલ
બુધવારે બજારની શરૂઆત જ નકારાત્મક રહી હતી. સવારે બજાર ખુલતાની સાથે જ સેન્સેક્સ 450થી વધુ પોઈન્ટના ઘટાડા સાથે 78 હજારની નીચે સરકી ગયો હતો. નિફ્ટીમાં પણ શરૂઆતથી જ નબળાઈ જોવા મળી હતી. વૈશ્વિક બજારોમાંથી મળેલા નબળા સંકેતો અને મધ્યપૂર્વમાં વધતા તણાવને કારણે રોકાણકારોએ જોખમવાળા શેરોમાં વેચવાલી શરૂ કરી હતી.
આ પણ વાંચો: 34 કરોડ PF ખાતાધારકો માટે ખુશખબર! : સરકારે તારીખ જાહેર કરી, આ દિવસે ખાતામાં આવશે વ્યાજ
ઓઈલ, બેન્કિંગ અને ઓટો શેરોમાં ભારે દબાણ
બજારમાં સૌથી વધુ અસર ઓઈલ અને ગેસ સેક્ટર પર જોવા મળી હતી. ઓઈલ માર્કેટિંગ કંપનીઓના શેરોમાં નોંધપાત્ર ઘટાડો નોંધાયો હતો. ભારત પેટ્રોલિયમ, હિન્દુસ્તાન પેટ્રોલિયમ અને ઈન્ડિયન ઓઈલ જેવી કંપનીઓના શેરોમાં 3થી 4 ટકાનો ઘટાડો નોંધાયો હતો. તે ઉપરાંત રિયલ એસ્ટેટ, PSU બેન્ક, ઓટો, મેટલ, સિમેન્ટ અને FMCG સેક્ટરના શેરોમાં પણ ભારે દબાણ રહ્યું હતું.
ફાર્મા અને IT શેરોએ આપ્યો ટેકો
એક તરફ મોટાભાગના સેક્ટરમાં વેચવાલી હતી તો, બીજી તરફ ફાર્મા અને IT સેક્ટરના કેટલાક શેરોએ બજારને થોડો ટેકો આપ્યો હતો. સન ફાર્મા, HCL ટેક, ઈન્ફોસિસ, TCS, ટેક મહિન્દ્રા અને પાવર ગ્રિડ જેવા શેરોમાં ખરીદી જોવા મળી હતી. જોકે આ મર્યાદિત તેજી સમગ્ર બજારને સંભાળી શકી નહોતી.
એરલાઈન કંપનીઓના શેરોમાં પણ ઘટાડો
ક્રૂડ ઓઈલના ભાવ વધતાં એરલાઈન કંપનીઓના ખર્ચમાં વધારો થવાની આશંકા વચ્ચે ઈન્ટરગ્લોબ એવિએશન (ઈન્ડિગો) અને સ્પાઈસજેટ જેવા શેરોમાં પણ ઘટાડો નોંધાયો હતો. વિશ્લેષકોનું માનવું છે કે, જો ક્રૂડ ઓઈલના ભાવ વધુ વધશે તો એરલાઈન કંપનીઓના નફા પર સીધી અસર પડી શકે છે.
ક્રૂડ ઓઈલના ભાવમાં તેજીથી વધ્યો દબાણ
મધ્યપૂર્વમાં અમેરિકા અને ઈરાન વચ્ચે વધતા તણાવના કારણે આંતરરાષ્ટ્રીય બજારમાં બ્રેન્ટ ક્રૂડના ભાવમાં લગભગ 3 ટકાથી વધુનો ઉછાળો આવ્યો હતો. બ્રેન્ટ ક્રૂડ લગભગ 76 ડોલર પ્રતિ બેરલની સપાટીએ પહોંચી ગયો હતો, જ્યારે WTI ક્રૂડ પણ નોંધપાત્ર રીતે મોંઘો બન્યો હતો. ભારત પોતાની મોટાભાગની ક્રૂડ ઓઈલની જરૂરિયાત આયાત દ્વારા પૂરી કરે છે. તેથી આંતરરાષ્ટ્રીય બજારમાં તેલના ભાવ વધવાથી મોંઘવારી, કંપનીઓના ખર્ચ અને સમગ્ર અર્થતંત્ર પર તેની અસર જોવા મળી શકે છે.
રોકાણકારો માટે આગળ શું?
બજાર નિષ્ણાતોનું માનવું છે કે અમેરિકા-ઈરાન વચ્ચેનો તણાવ આગામી દિવસોમાં કેવી દિશામાં આગળ વધે છે તેના પર ભારતીય શેરબજારની ચાલ પણ નિર્ભર રહેશે. જો મધ્યપૂર્વમાં સ્થિતિ વધુ ગંભીર બનશે અથવા ક્રૂડ ઓઈલના ભાવમાં વધુ વધારો થશે તો બજારમાં અસ્થિરતા યથાવત રહી શકે છે. રોકાણકારોને ઉતાવળમાં નિર્ણય લેવાને બદલે લાંબા ગાળાના દૃષ્ટિકોણથી રોકાણ કરવાની સલાહ આપવામાં આવી રહી છે. આગામી દિવસોમાં વૈશ્વિક રાજકીય ઘટનાઓ, ક્રૂડ ઓઈલના ભાવ અને વિદેશી સંસ્થાકીય રોકાણકારોની ચાલ બજાર માટે નિર્ણાયક બની શકે છે.
