Elon Musk ની સ્ટારલિંકને ભારતે લાઇસન્સ આપ્યું : સેટેલાઇટ ઇન્ટરનેટ હવે ટૂંક સમયમાં થશે લૉન્ચ

ભારતમાં સેટેલાઇટ ઇન્ટરનેટ સેવા ટૂંક સમયમાં શરૂ થવા જઈ રહી છે. એલોન મસ્કની સ્ટારલિંકને ભારત સરકાર દ્વારા લાઇસન્સ આપવામાં આવ્યું છે. સ્ટારલિંકને લાઇસન્સ મળ્યા પછી, હવે એવું કહી શકાય કે સેટેલાઇટ ઇન્ટરનેટની ભારતમાં શરૂઆત હવે તેના અંતિમ તબક્કામાં છે. ગયા મહિને મસ્કની કંપનીને લેટર ઓફ ઇન્ટેન્ટ મળ્યો. અને હવે સરકાર તરફથી GMPCS લાઇસન્સ પણ મળી ગયું છે.

સ્ટારલિંક મંજૂરી મેળવનાર ત્રીજી કંપની

ભારત સરકાર તરફથી સ્ટારલિંકને લાઇસન્સ મળવું એ કંપની માટે મોટી સિદ્ધિ છે. તમને જણાવી દઈએ કે સ્ટારલિંક ભારત સરકાર પાસેથી સેટેલાઇટ ઇન્ટરનેટ સેવા માટે મંજૂરી મેળવનારી ત્રીજી કંપની છે. સરકારે આ પહેલા Jio અને Airtel ને પણ લાઇસન્સ આપ્યું છે.

ભારતમાં સેટેલાઇટ ઇન્ટરનેટ સેવા શરૂ કરવા માટે કંપનીને IN-SPACE પાસેથી અંતિમ મંજૂરી મેળવવી પડશે. આ મંજૂરી મળ્યા પછી, વપરાશકર્તાઓ સેટેલાઇટ આધારિત ઇન્ટરનેટ સેવાનો ઉપયોગ કરી શકશે. જોકે, આ અંતિમ મંજૂરી મેળવવામાં કેટલો સમય લાગશે તે અંગે હજુ સુધી કોઈ માહિતી આપવામાં આવી નથી.

નોંધનીય છે કે એલોન મસ્ક ભારતમાં સ્ટારલિંકના પ્રવેશ માટે 2022 થી સતત પ્રયાસ કરી રહ્યા છે. આખરે, તેમને મંજૂરી મળી ગઈ છે. જ્યારે એમેઝોનની કુઇપર કંપની પણ ભારતમાં સેટેલાઇટ ઇન્ટરનેટ માટે પ્રયાસ કરી રહી છે. અને કંપનીએ આ માટે ભારત સરકારને અરજી કરી છે.