Election Commission summons cricketer Mohammed Shami and his brother: ભારતીય ક્રિકેટ ટીમના સ્ટાર ફાસ્ટ બોલર મોહમ્મદ શમી અને તેના ભાઈ મોહમ્મદ કૈફ ફરી એકવાર ચર્ચામાં આવ્યા છે, પરંતુ આ વખતે કારણ ક્રિકેટ નથી. ચૂંટણી પંચે મતદાર લિસ્ટઓના 'Special Intensive Revision' (SIR) અભિયાન હેઠળ બંને ભાઈઓને સુનાવણી માટે હાજર થવા સમન્સ આપવામાં આવ્યું છે.
નોટિસ અને સુનાવણીની માહિતી
રાજ્યમાં મતદાર યાદી સુધારણાની પ્રક્રિયા 16 ડિસેમ્બરથી શરૂ થઈ ગઈ છે. આ પ્રક્રિયાના ભાગરૂપે દક્ષિણ કોલકાતાના જાદવપુર વિસ્તારમાં આવેલી કર્તાજુ નગર સ્કૂલને નોટિસ મોકલવામાં આવી હતી. આ નોટિસમાં શમી અને કૈફને સહાયક ચૂંટણી નોંધણી અધિકારી (AERO) સમક્ષ હાજર રહેવાનો આદેશ આપવામાં આવ્યો હતો.
શા માટે શમી અગાઉ હાજર ન રહી શક્યો?
અગાઉની નિર્ધારિત તારીખે મોહમ્મદ શમી હાજર રહી શક્યો ન હતો. તેનું કારણ એ હતું કે, તે વિજય હજારે ટ્રોફી 2025-26 માં બંગાળની ટીમ વતી રમવા માટે રાજકોટમાં હતા. જોકે, હવે નવી તારીખો મુજબ તેમણે 9 થી 11 જાન્યુઆરી દરમિયાન સુનાવણી માટે હાજર થવું પડશે.
રહેઠાણ અને મતદાર યાદીનો વિવાદ
મોહમ્મદ શમી મૂળ ઉત્તર પ્રદેશના અમરોહાનો વતની છે, પરંતુ હાલમાં તે કોલકાતા મ્યુનિસિપલ કોર્પોરેશન (KMC) ના વોર્ડ નંબર 93 માં મતદાર તરીકે નોંધાયેલ છે. આ વિસ્તાર રાસબિહારી વિધાનસભા મતવિસ્તાર હેઠળ આવે છે. તેનો જન્મસ્થળ અને વર્તમાન રહેઠાણ અલગ હોવાથી વેરિફિકેશન પ્રક્રિયા માટે તેમણે સમન્સ મોકલવામાં આવ્યું છે.
સમન્સ પાછળનું મુખ્ય કારણ
ચૂંટણી પંચના જણાવ્યા અનુસાર, વસ્તી ગણતરીના ફોર્મમાં કેટલીક ટેકનિકલ ગૂંચવણો જોવા મળી હતી. શમી અને તેના ભાઈના નામ 'બાકી રહેલી યાદી' (Pending List) માં દેખાયા હતા. આ સમસ્યા મુખ્યત્વે વંશાવળીના મેપિંગ (Genealogy Mapping) અને સેલ્ફ-મેપિંગમાં રહેલી વિસંગતતાઓને કારણે ઊભી થઈ છે. આ મામલે પશ્ચિમ બંગાળના મુખ્યમંત્રી મમતા બેનર્જીએ પણ મુખ્ય ચૂંટણી કમિશનરને પત્ર લખીને SIR અભિયાન સામે સવાલો ઉઠાવ્યા છે.
મેદાન પર શમીનો સંઘર્ષ
એક તરફ કાયદાકીય પ્રક્રિયા ચાલી રહી છે, તો બીજી તરફ શમી ભારતીય ટીમમાં કમબેક કરવા માટે સખત મહેનત કરી રહ્યો છે. તે છેલ્લે 2025 ની ચેમ્પિયન્સ ટ્રોફીમાં ભારત માટે રમ્યો હતો. ત્યારપછી ન્યૂઝીલેન્ડ સામેની વનડે સિરીઝમાં પણ તેની અવગણના કરવામાં આવી છે. જોકે, ડોમેસ્ટિક ક્રિકેટમાં તેનું પ્રદર્શન શાનદાર રહ્યું છે. તેને રણજી ટ્રોફી અને વિજય હજારે ટ્રોફી જેવી ટુર્નામેન્ટમાં 200 થી વધુ ઓવર ફેંકીને 47 વિકેટ ઝડપી છે, જે તેની ફિટનેસ અને ફોર્મની સાબિતી આપે છે.
