તાપમાન વધવાની સાથે સ્માર્ટફોન ગરમ થવાની સમસ્યા વધી, મોટી નુકસાનીથી બચવા માટે ટેક પ્રોફેસર્સે આપી સલાહ
ઉનાળાની ઋતુમાં માત્ર માણસો જ નહીં, પરંતુ આપણા ડિજિટલ સાથી એટલે કે સ્માર્ટફોન પણ ભારે ગરમીનો શિકાર બને છે. આજકાલ તાપમાન 40 ડિગ્રી સેલ્સિયસને પાર કરી રહ્યું છે, જેના કારણે મોબાઈલ ઓવરહીટ (Overheat) થવાની ઘટનાઓ ઝડપથી વધી રહી છે. ફોન વધુ પડતો ગરમ થવાને કારણે તેની બેટરી ખરાબ થઈ શકે છે અને ક્યારેક બ્લાસ્ટ થવાનું જોખમ પણ રહે છે. ટેક નિષ્ણાતોના મતે, કેટલીક નાની પણ મહત્વની વાતોનું ધ્યાન રાખીને તમે તમારા ફોનને સુરક્ષિત રાખી શકો છો.
૧. સીધા સૂર્યપ્રકાશ (Direct Sunlight) થી ફોનને દૂર રાખો
મોબાઈલ ગરમ થવાનું સૌથી મોટું કારણ તેને સીધા તડકામાં રાખવાનું છે. જ્યારે તમે કાર ચલાવતા હોવ ત્યારે ડેશબોર્ડ પર અથવા બારી પાસે ફોન ન મૂકો. સૂર્યના સીધા કિરણો ફોનની સ્ક્રીન અને પ્રોસેસરને ઝડપથી ગરમ કરે છે. જો ફોન તડકામાં રહી ગયો હોય, તો તેને તરત જ કોઈ છાંયડાવાળી જગ્યાએ લઈ જાઓ.
૨. ચાર્જિંગ કરતી વખતે ફોન કવર હટાવી દો
ઘણા લોકો મોબાઈલ પર જાડા અને ફેન્સી કવર લગાવી રાખે છે. ચાર્જિંગ દરમિયાન બેટરીમાંથી કુદરતી રીતે ગરમી બહાર નીકળે છે. જો કવર લગાવેલું હશે, તો એ ગરમી બહાર નીકળી શકશે નહીં અને ફોન અંદરથી ગરમ થઈ જશે. તેથી, ખાસ કરીને ઉનાળામાં ચાર્જિંગ કરતી વખતે બેક કવર કાઢી નાખવું હિતાવહ છે.
૩. કારની અંદર ક્યારેય ફોન મૂકીને ન જાવ
ઉનાળામાં બંધ કાર એક ગ્રીનહાઉસ જેવી બની જાય છે, જેમાં અંદરનું તાપમાન બહાર કરતાં ખૂબ જ ઝડપથી વધી જાય છે. જો તમે આવી બંધ કારમાં તમારો ફોન ભૂલી જશો, તો તેની બેટરી ફાટવાનો અથવા ડિસ્પ્લે ડેમેજ થવાનો મોટો ખતરો રહે છે. કારમાંથી બહાર નીકળતી વખતે હંમેશાં ફોન સાથે રાખો.
આ પણ વાંચો: ગુજરાતના બેસ્ટ પ્રવાસન સ્થળો | વેકેશનમાં માણવા જેવી ગુજરાતની અદ્ભુત અને જોવાલાયક જગ્યાઓ | Offbeat Stories
૪. ભારે એપ્સ અને ગેમિંગ પર નિયંત્રણ રાખો
જ્યારે આસપાસનું તાપમાન પહેલેથી જ વધારે હોય, ત્યારે ફોનમાં મોટી ગેમ્સ રમવી અથવા હાઈ-રિઝોલ્યુશન વીડિયો શૂટ કરવાથી પ્રોસેસર પર બમણું દબાણ આવે છે. તેનાથી બચવા માટે બેકગ્રાઉન્ડમાં ચાલતી બિનજરૂરી એપ્સને બંધ કરો. બ્રાઇટનેસ (Brightness) ઓછી રાખો અને જરૂર પડે ત્યારે થોડીવાર માટે ફોનને એરપ્લેન મોડ પર મૂકી દો જેથી તેને આરામ મળે.
૫. ગરમ ફોનને ભૂલથી પણ ફ્રિજ કે બરફ નજીક ન રાખો
ફોન વધુ પડતો ગરમ થઈ જાય ત્યારે તેને ઝડપથી ઠંડો કરવા માટે ફ્રિજમાં મૂકવાની ભૂલ ક્યારેય ન કરવી. તાપમાનમાં અચાનક આવતા આ મોટા ફેરફારને કારણે ફોનની અંદર મોઇશ્ચર (ભેજ) જમા થઈ શકે છે, જે ફોનને હંમેશાં માટે ડેડ (શોર્ટ-સર્કિટ) કરી શકે છે. તેના બદલે ફોનને પંખાની હવા નીચે રાખવો વધુ સુરક્ષિત છે.
