Doug Bracewell Retirement: ન્યૂઝીલેન્ડના ફાસ્ટ બોલિંગ ઓલરાઉન્ડર ડગ બ્રેસવેલે ક્રિકેટના તમામ ફોર્મેટમાંથી સંન્યાસ લઈ લીધો છે. 35 વર્ષીય આ ખેલાડીએ 18 વર્ષના લાંબા કારકિર્દીમાં ઘણી યાદગાર પર્ફોર્મન્સ આપ્યા હતા. તેમના કારકિર્દીની શરૂઆત 2008માં ડોમેસ્ટિક ક્રિકેટથી થઈ હતી અને આંતરરાષ્ટ્રીય ડેબ્યુ 2011 માં થયું હતું. તાજેતરની રિબ ઇન્જરીને કારણે તેઓ આ સિઝનમાં રમી શક્યા નહોતા, જેના કારણે સંન્યાસનો નિર્ણય લીધો.
ડગ બ્રેસવેલે ક્રિકેટમાંથી લીધો સંન્યાસ
ન્યૂઝીલેન્ડ ક્રિકેટ બોર્ડ અને સેન્ટ્રલ ડિસ્ટ્રિક્ટ્સ તરફથી ડગ બ્રેસવેલના સંન્યાસની જાહેરાત કરવામાં આવી છે. તેમણે પોતાના નિવેદનમાં કહ્યું કે, “ક્રિકેટ મારા જીવનનો ગર્વનો ભાગ રહ્યું છે અને બાળપણથી જ હું આની આકાંક્ષા રાખતો હતો. દેશ અને સેન્ટ્રલ ડિસ્ટ્રિક્ટ્સ માટે રમવાની તક મળી તેના માટે હું આભારી છું.” તેમની કારકિર્દીમાં 28 ટેસ્ટ, 21 વનડે અને 20 T-20 આંતરરાષ્ટ્રીય મેચો સામેલ છે. તેમની સૌથી મોટી ઉપલબ્ધિ 2011માં હોબાર્ટમાં ઓસ્ટ્રેલિયા સામેની ટેસ્ટ જીત હતી, જ્યાં તેમણે 9 વિકેટ ઝડપીને ન્યૂઝીલેન્ડને 26 વર્ષ પછી ઓસ્ટ્રેલિયામાં જીત અપાવી હતી.
ડગ બ્રેસવેલનો કારકિર્દી રેકોર્ડ
ડગ બ્રેસવેલે આંતરરાષ્ટ્રીય કારકિર્દીમાં 69 મેચોમાં 120 વિકેટ લીધી અને 915 રન બનાવ્યા. ટેસ્ટમાં 74 વિકેટ અને વ્હાઇટ બોલ ક્રિકેટમાં 46 વિકેટ તેમના નામે છે. ડોમેસ્ટિક અને ફર્સ્ટ ક્લાસ ક્રિકેટમાં તેમણે 400થી વધુ વિકેટ અને 4000થી વધુ રન બનાવ્યા, જે ન્યૂઝીલેન્ડમાં ડબલ છે. સેન્ટ્રલ ડિસ્ટ્રિક્ટ્સ માટે તેમનો રેકોર્ડ સૌથી શ્રેષ્ઠ ઓલરાઉન્ડર તરીકે નોંધાયો છે. તેમણે ઈંગ્લેન્ડના કાઉન્ટી ક્રિકેટમાં પણ રમ્યું હતું. ક્રિકેટ તેમને વારસામાં મળ્યું હતું. ડગ બ્રેસવેલની સૌથી ખાસ વાત એ છે કે ક્રિકેટ તેમના લોહીમાં છે. તેમના પિતા બ્રેન્ડન બ્રેસવેલ અને કાકા જ્હોન બ્રેસવેલ બંને ન્યૂઝીલેન્ડ માટે ટેસ્ટ ક્રિકેટ રમી ચૂક્યા છે. જ્હોન તો કોચ પણ રહી ચૂક્યા છે. અન્ય કાકાઓ ડગ્લાસ અને માર્ક પણ ફર્સ્ટ ક્લાસ ક્રિકેટ રમ્યા હતા. તેમના કઝીન માઇકલ બ્રેસવેલ હાલમાં ન્યૂઝીલેન્ડ ટીમમાં છે અને તેમની સાથે પણ ડગે કેટલીક મેચો રમી હતી.
IPLમાં ડેબ્યુ મેચ જ આખરી બની
ડગ બ્રેસવેલે IPLમાં દિલ્હી ડેરડેવિલ્સ (હવે કેપિટલ્સ) તરફથી 2012માં એક જ મેચ રમી હતી, જે તેમની ડેબ્યુ અને આખરી મેચ બની. તે મેચમાં તેમણે 3 વિકેટ લીધી હતી. આ ઉપરાંત તેમણે સાઉથ આફ્રિકાની SA T-20 લીગમાં જોબર્ગ સુપર કિંગ્સ તરફથી અને અન્ય લીગમાં પણ રમ્યું હતું. તેમની કારકિર્દી ઈજાઓથી પણ પ્રભાવિત રહી, પરંતુ તેમણે હંમેશા પાછા ફરવાની હિંમત બતાવી. ડગ બ્રેસવેલના સંન્યાસથી ન્યૂઝીલેન્ડ ક્રિકેટને એક સારા ઓલરાઉન્ડરનું યોગદાન ખૂટશે. તેમના ચાહકો તેમને તેમની આક્રમક બોલિંગ અને ઉપયોગી બેટિંગ માટે હંમેશા યાદ રાખશે
