H-1B વીઝા અને ગ્રીન કાર્ડ છે છતાં : હંમેશા સાથે રાખવા પડશે ડોક્યુમેન્ટ્સ, જાણો ટ્રમ્પનો નવો નિયમ

ડોનાલ્ડ ટ્રમ્પ અમેરિકી રાષ્ટ્રપતિ બન્યા બાદ દરરોજ નિયમોમાં ફેરફાર કરવામાં આવી રહ્યા છે. તાજેતરમાં ટ્રમ્પ વહિવટીતંત્રએ તમામ ઇમિગ્રન્ટ્સ માટે તેમના ઓળખ કાર્ડ હંમેશા સાથે રાખવાનું ફરજિયાત બનાવ્યું છે, પછી ભલે તેઓ કાયદેસર રીતે રહેતા હોય કે કામદારો કે વિદ્યાર્થીઓ.

મીડિયા રિપોર્ટ્સ અનુસાર ડિપાર્ટમેન્ટ ઓફ હોમલેન્ડ સિક્યુરિટી (DHS) દ્વારા જાહેર કરાયેલ નિર્ણય તાજેતરમાં કોર્ટના ચુકાદા પછી આવ્યો છે જેણે ટ્રમ્પ-યુગના ઇમિગ્રન્ટ રજિસ્ટ્રેશન નિયમને ચાલુ રાખવાની મંજૂરી આપી હતી, જેમાં યુ.એસ.માં ગેરકાયદેસર ઇમિગ્રન્ટ્સને સરકાર સાથે નોંધણી કરાવવાની જરૂર હતી.

'તમારે દરેક સમયે દસ્તાવેજો તમારી સાથે રાખવા પડશે'

"18 વર્ષ અને તેથી વધુ ઉંમરના તમામ બિન-નાગરિકોએ હંમેશા આ દસ્તાવેજ સાથે રાખવા આવશ્યક છે. વહિવટીતંત્રએ DHSને અમલીકરણને પ્રાથમિકતા આપવાનો નિર્દેશ આપ્યો છે અને જેઓ પાલન કરવામાં નિષ્ફળ જાય છે તેમને બક્ષશે નહીં," DHSએ શુક્રવારે જાહેર કરેલા એક નિવેદનમાં જણાવ્યું હતું. આ નિયમ 11 એપ્રિલ, 2025થી લાગુ થશે.

ટ્રમ્પે 20 જાન્યુઆરીના રોજ "પ્રોટેક્ટીંગ ધ અમેરિકન પીપલ અગેઇન્સ્ટ ઇન્વેઝન" પર હસ્તાક્ષર કર્યાના એક દિવસ બાદ આ વિકાસ થયો છે, જેમાં લાંબા સમયથી અવગણવામાં આવેલા એલિયન રજીસ્ટ્રેશન એક્ટને લાગુ કરવા DHSને નિર્દેશ આપવામાં આવ્યો હતો.

શું છે નવો નિયમ?

મીડિયા અહેવાલો અનુસાર, નવા નિયમો ખાસ કરીને ગેરકાયદેસર અથવા બિનદસ્તાવેજીકૃત ઇમિગ્રન્ટ્સને અસર કરે છે. 14 વર્ષથી વધુ ઉંમરના તમામ બિન-નાગરિકો કે જેઓ યુ.એસ.માં 30 દિવસ કે તેથી વધુ સમય માટે રહે છે તેઓએ ફોર્મ G-325R ભરીને સરકારમાં નોંધણી કરાવવી આવશ્યક છે. વસાહતીઓના બાળકોએ પણ ફરીથી નોંધણી કરાવવી પડશે અને 14 વર્ષના થયાના 30 દિવસની અંદર ફિંગરપ્રિન્ટ્સ સબમિટ કરવી પડશે.

આ સિવાય 11 એપ્રિલ અથવા તે પછી દેશમાં આવનારા લોકોએ પણ આગમનના 30 દિવસની અંદર નોંધણી કરાવવી પડશે. જેઓ તેમનું સરનામું બદલતા હોય તેમણે પણ 10 દિવસની અંદર જાણ કરવી આવશ્યક છે, જે નિષ્ફળ જાય તો તેમને $5,000 સુધીનો દંડ થઈ શકે છે.

H-1B વિઝા અને ગ્રીન કાર્ડ ધારકો માટે શું નિયમો છે?

દરમિયાન, જે લોકો માન્ય વિઝા (અભ્યાસ, કાર્ય, મુસાફરી) પર યુ.એસ.માં પ્રવેશ્યા છે અને ગ્રીન કાર્ડ, રોજગાર દસ્તાવેજ, બોર્ડર ક્રોસિંગ કાર્ડ અથવા I-94 એન્ટ્રી રેકોર્ડ ધરાવે છે તેઓને અસર થશે નહીં કારણ કે તેઓ પહેલેથી જ નોંધાયેલ માનવામાં આવશે. માન્ય વિઝા અથવા ગ્રીન કાર્ડ ધરાવતા ભારતીય નાગરિકોએ નોંધણી કરવાની જરૂર નથી. જો કે, તેઓએ હંમેશા તેમના ઓળખ કાર્ડ સાથે રાખવાનું રહેશે અને સત્તાવાળાઓ દ્વારા પૂછવામાં આવે ત્યારે તે બતાવવાનું રહેશે.