Diljit Dosanjh Supports Students Protest: દિલ્હીમાં NEET પરીક્ષામાં કથિત ગેરરીતિઓ અને શિક્ષણ વ્યવસ્થામાં સુધારાની માંગ સાથે ચાલી રહેલા વિદ્યાર્થીઓના વિરોધ પ્રદર્શન પર થયેલી પોલીસ કાર્યવાહીને લઈને હવે રાજકીય વર્તુળો ઉપરાંત મનોરંજન જગતમાં પણ તીવ્ર પ્રતિક્રિયાઓ જોવા મળી રહી છે. જાણીતા પંજાબી ગાયક અને અભિનેતા દિલજીત દોસાંઝે સોશિયલ મીડિયા મારફતે વિદ્યાર્થીઓના સમર્થનમાં ખુલ્લેઆમ અવાજ ઉઠાવતા કહ્યું કે વિદ્યાર્થીઓ સાથે જે રીતે વર્તન કરવામાં આવ્યું તે યોગ્ય નથી અને તેમની માંગણીઓ ગંભીરતાથી સાંભળવી જોઈએ. દિલજીત દોસાંઝ ઉપરાંત અનેક જાણીતા ફિલ્મ કલાકારો અને સર્જકોએ પણ વિદ્યાર્થીઓના સમર્થનમાં નિવેદનો આપ્યા છે. સોશિયલ મીડિયા પર આ મુદ્દે સતત ચર્ચા ચાલી રહી છે, જ્યારે પોલીસ કાર્યવાહી અને વિદ્યાર્થીઓના વિરોધ પ્રદર્શનને લઈને દેશભરમાં અલગ-અલગ પ્રકારની પ્રતિક્રિયાઓ સામે આવી રહી છે.
'સત્ય બોલીશ તો ફરી દેશદ્રોહી કહેવાઈશ' – દિલજીત દોસાંઝ
દિલજીત દોસાંઝે પોતાની ઇન્સ્ટાગ્રામ સ્ટોરીમાં લખ્યું કે વિદ્યાર્થીઓ સાથે જે બન્યું તે અત્યંત દુઃખદ છે અને કોઈપણ પરિસ્થિતિમાં વિદ્યાર્થીઓ સાથે આવો વ્યવહાર ન થવો જોઈએ. તેમણે સત્તાધીશોને અપીલ કરી કે તેઓ વિદ્યાર્થીઓની વાત ધ્યાનથી સાંભળે અને તેમની ચિંતાઓનો યોગ્ય ઉકેલ લાવે. દિલજીતે પોતાના અગાઉના અનુભવનો ઉલ્લેખ કરતાં લખ્યું કે ખેડૂત આંદોલન દરમિયાન પણ તેમને 'દેશદ્રોહી' તરીકે દર્શાવવાનો પ્રયાસ કરવામાં આવ્યો હતો. તેમણે જણાવ્યું કે સત્ય બોલવા બદલ ફરીથી તેમની ટીકા થશે અને તેમને દેશદ્રોહી કહેવામાં આવશે, છતાં તેઓ પોતાની વાત કહેવાનું બંધ નહીં કરે. તેમણે એમ પણ જણાવ્યું કે ખેડૂત આંદોલન બાદ તેમને અનેક કાનૂની મુશ્કેલીઓનો સામનો કરવો પડ્યો હતો, જેના વિશે તેઓ હજુ ખુલ્લેઆમ વાત કરી શકતા નથી.
અન્ય કલાકારો પણ વિદ્યાર્થીઓના સમર્થનમાં આવ્યા
દિલજીત દોસાંઝ સિવાય બોલિવૂડના અનેક જાણીતા ચહેરાઓએ પણ વિદ્યાર્થીઓ પ્રત્યે સમર્થન વ્યક્ત કર્યું છે. અભિનેતા રિતેશ દેશમુખ અને અભિનેત્રી જેનિલિયા દેશમુખે પોતાના નિવેદનમાં કહ્યું કે લોકશાહીમાં યુવાનોના અવાજને દબાવવાને બદલે તેને સાંભળવો જોઈએ. તેમણે વિદ્યાર્થીઓની વાતને ગંભીરતાથી લેવા પર ભાર મૂક્યો. વરિષ્ઠ અભિનેત્રી શબાના આઝમી વિરોધ પ્રદર્શનના સ્થળે પહોંચી હતી. મીડિયા અહેવાલો મુજબ ત્યાં તેમની તબિયત લથડતા પ્રદર્શનકારીઓ અને સુરક્ષાકર્મીઓએ તેમને તાત્કાલિક મદદ કરી હતી. ફિલ્મ નિર્માતા નંદિતા દાસે પણ વિદ્યાર્થીઓની માંગણીઓને લઈને સંવેદનશીલ અભિગમ અપનાવવાની અપીલ કરી હતી.
લેખિકા સુતાપા સિકદરની લાગણીસભર પોસ્ટ
લેખિકા સુતાપા સિકદરે સોશિયલ મીડિયા પર ભાવુક પોસ્ટ શેર કરતાં લખ્યું કે આ વિદ્યાર્થીઓ કોઈ મોટા પરિવાર કે પ્રભાવશાળી વર્ગમાંથી આવતા નથી. તેઓ પોતાના મર્યાદિત સાધનો સાથે ન્યાયની આશા લઈને રસ્તા પર ઉતર્યા છે અને તેમની માંગણીઓને અવગણવી યોગ્ય નથી. તેમણે વિદ્યાર્થીઓની આર્થિક અને સામાજિક પરિસ્થિતિનો ઉલ્લેખ કરતાં કહ્યું કે આવા યુવાનો માત્ર પોતાના ભવિષ્યને સુરક્ષિત બનાવવા માટે અવાજ ઉઠાવી રહ્યા છે.
આ પણ વાંચો: દિલ્હીમાં ફરી તણાવની આશંકા! : આજે પણ સંસદ તરફ કૂચ કરશે CJP, જંતર-મંતર પર મોડી રાતથી ફરી ધરણાં શરૂ
NEET મુદ્દે વિરોધ પ્રદર્શન યથાવત
ઉલ્લેખનીય છે કે, દિલ્હીમાં CJPના નેતૃત્વ હેઠળ વિદ્યાર્થીઓ NEET પરીક્ષામાં કથિત ગેરરીતિઓ, પેપર લીકના આરોપો અને શિક્ષણ વ્યવસ્થામાં સુધારાની માંગ સાથે વિરોધ પ્રદર્શન કરી રહ્યા છે. પોલીસ કાર્યવાહી બાદ આ મુદ્દો વધુ ચર્ચામાં આવ્યો છે અને સોશિયલ મીડિયા પર પણ તેને લઈને વ્યાપક ચર્ચા ચાલી રહી છે. વિદ્યાર્થી સંગઠનોનું કહેવું છે કે, તેમની માંગણીઓ શિક્ષણ વ્યવસ્થામાં પારદર્શિતા અને જવાબદારી સુનિશ્ચિત કરવા માટે છે. બીજી તરફ, આ સમગ્ર ઘટનાક્રમને લઈને રાજકીય અને સામાજિક સ્તરે અલગ-અલગ મંતવ્યો સામે આવી રહ્યા છે.
