અમદાવાદ: રાજ્યમાં સતત વરસી રહેલા ભારે વરસાદને કારણે અનેક જિલ્લાઓમાં પૂર જેવી સ્થિતિ સર્જાઈ છે. અમદાવાદ જિલ્લાના ધોળકા તાલુકામાં પણ નીચાણવાળા વિસ્તારોમાં પાણી ભરાતા અનેક લોકો ફસાઈ ગયા હતા. પરિસ્થિતિની ગંભીરતાને ધ્યાનમાં રાખીને અમદાવાદ જિલ્લા વહીવટીતંત્રે તાત્કાલિક નેશનલ ડિઝાસ્ટર રિસ્પોન્સ ફોર્સ (NDRF)ને બચાવ કામગીરી માટે તૈનાત કરી હતી. સૂચના મળતાં જ 06 બટાલિયન NDRFની વિશેષ ટીમ જરૂરી સાધનો સાથે ઘટનાસ્થળે પહોંચી ગઈ હતી. NDRFની ટીમે સ્થળ પર પહોંચીને પાણીથી ઘેરાયેલા વિસ્તારોનું મૂલ્યાંકન કર્યું અને બોટ સહિતના બચાવ સાધનોની મદદથી ફસાયેલા લોકોને સુરક્ષિત સ્થળે પહોંચાડવાની કામગીરી શરૂ કરી હતી. વરસાદ અને પાણીના તેજ પ્રવાહ વચ્ચે પણ જવાનોએ સતત કામગીરી કરીને અનેક પરિવારોને સલામત રીતે બહાર કાઢ્યા હતા.
103 લોકોને સુરક્ષિત સ્થળે ખસેડાયા
NDRF દ્વારા હાથ ધરાયેલા આ રેસ્ક્યુ ઓપરેશન દરમિયાન કુલ 103 લોકોને સુરક્ષિત સ્થળે સ્થળાંતર કરવામાં આવ્યા હતા. બચાવાયેલા લોકોમાં 22 પુરુષો, 44 મહિલાઓ અને 37 બાળકોનો સમાવેશ થાય છે. વૃદ્ધો, મહિલાઓ અને બાળકોને પ્રાથમિકતા આપીને સલામત સ્થળે ખસેડવામાં આવ્યા હતા. બચાવ કામગીરી દરમિયાન સ્થાનિક વહીવટી તંત્ર, પોલીસ, ફાયર વિભાગ અને અન્ય બચાવ એજન્સીઓએ પણ NDRF સાથે સંકલન સાધીને કામગીરીને વધુ ઝડપી અને અસરકારક બનાવી હતી. સ્થળાંતર કરાયેલા લોકોને જરૂરી પ્રાથમિક સુવિધાઓ અને તાત્કાલિક સહાય પણ ઉપલબ્ધ કરાવવામાં આવી હતી.
સતત વરસાદને કારણે તંત્ર એલર્ટ મોડમાં
હવામાન વિભાગ દ્વારા રાજ્યમાં ભારેથી અતિભારે વરસાદની આગાહી વચ્ચે અમદાવાદ જિલ્લા વહીવટીતંત્ર સંપૂર્ણ એલર્ટ પર છે. ધોળકા સહિત નીચાણવાળા વિસ્તારોમાં પાણીનું સ્તર સતત મોનીટર કરવામાં આવી રહ્યું છે અને જરૂરિયાત મુજબ વધારાની બચાવ ટીમો પણ તૈયાર રાખવામાં આવી છે. અધિકારીઓએ નાગરિકોને નદી, તળાવ, કોઝવે અને પાણી ભરાયેલા રસ્તાઓ પરથી પસાર ન થવાની અપીલ કરી છે. ખાસ કરીને ભારે વરસાદ દરમિયાન બિનજરૂરી બહાર ન નીકળવા અને વહીવટી તંત્ર દ્વારા જાહેર કરવામાં આવતી સૂચનાઓનું પાલન કરવા અનુરોધ કરવામાં આવ્યો છે.
આ પણ વાંચો: પૂર બાદ નવસારીમાં રોગચાળો અટકાવવા વહીવટીતંત્ર સજ્જ : આરોગ્ય મંત્રી પ્રફુલ પાનશેરીયાની સિવિલ હોસ્પિટલમાં સરપ્રાઈઝ મુલાકાત લઈ સમીક્ષા કરી
રાહત અને બચાવ કામગીરી યથાવત
રાજ્ય સરકારના માર્ગદર્શન હેઠળ NDRF, SDRF, સ્થાનિક વહીવટી તંત્ર અને અન્ય બચાવ એજન્સીઓ સતત અસરગ્રસ્ત વિસ્તારોમાં કામગીરી કરી રહી છે. જ્યાં પણ લોકો ફસાયેલા હોવાની માહિતી મળી રહી છે ત્યાં તાત્કાલિક રેસ્ક્યુ ટીમોને મોકલીને સલામત સ્થળે ખસેડવાની કામગીરી હાથ ધરવામાં આવી રહી છે. વહીવટી તંત્રે જણાવ્યું છે કે વરસાદની સ્થિતિને ધ્યાનમાં રાખીને આગામી કલાકોમાં પણ બચાવ અને રાહત કામગીરી ચાલુ રહેશે. નાગરિકોને કોઈપણ પ્રકારની ઇમરજન્સીમાં જિલ્લા કંટ્રોલ રૂમ અથવા આપત્તિ વ્યવસ્થાપન વિભાગનો સંપર્ક કરવા સૂચના આપવામાં આવી છે.
