વડોદરા શહેરના ભાયલી વિસ્તારમાં આવેલી એક ખાનગી શાળા સામે જિલ્લા શિક્ષણ અધિકારીની કચેરી દ્વારા કડક કાર્યવાહી કરવામાં આવી છે. સરકારી નિયમોના ઉલ્લંઘન બદલ જિલ્લા શિક્ષણ અધિકારી મહેશ પાંડે દ્વારા આ શાળાને રૂપિયા 30 હજારનો દંડ ફટકારવામાં આવ્યો છે.
'...કોઈ પણ પ્રકારની બેદરકારી ચલાવી લેવામાં નહીં આવે'
આ મામલે જિલ્લા શિક્ષણ અધિકારી મહેશ પાંડેએ જણાવ્યું હતું કે, શાળાએ સરકાર દ્વારા નક્કી કરાયેલા નિયમોનું યોગ્ય રીતે પાલન કર્યું ન હોવાથી આ દંડાત્મક કાર્યવાહી કરવામાં આવી છે. તેમણે સ્પષ્ટ કર્યું કે 'શિક્ષણ ક્ષેત્રમાં નિયમોનું પાલન કરવું અનિવાર્ય છે અને તેમાં કોઈ પણ પ્રકારની બેદરકારી ચલાવી લેવામાં નહીં આવે'.
'નિયમોનું ઉલ્લંઘન કરવામાં આવશે તો તેની સામે કડક કાર્યવાહી કરાશે'
જિલ્લા શિક્ષણ અધિકારીએ વધુમાં ચેતવણી આપતા જણાવ્યું હતું કે, ભવિષ્યમાં પણ જો કોઈ ખાનગી શાળા દ્વારા સરકારી નિયમોનું ઉલ્લંઘન કરવામાં આવશે તો તેની સામે કડક કાર્યવાહી કરવામાં આવશે. આ પગલાથી અન્ય શાળાઓ માટે પણ સ્પષ્ટ સંદેશો ગયો છે કે શિક્ષણ વ્યવસ્થામાં નિયમો અને શિસ્તનું પાલન અનિવાર્ય છે.
