Delhi Violence Investigation: દિલ્હીમાં તાજેતરમાં થયેલા હિંસક વિરોધ પ્રદર્શન બાદ રાજધાનીમાં કાયદો અને વ્યવસ્થા જાળવવા માટે દિલ્હી પોલીસે મોટા પાયે તપાસ અભિયાન શરૂ કર્યું છે. વિરોધ દરમિયાન જાહેર સંપત્તિને થયેલા નુકસાન, પોલીસ સાથે થયેલી અથડામણ અને કાયદો-વ્યવસ્થાના ભંગ સંબંધિત તમામ ઘટનાઓને ગંભીરતાથી લઈ પોલીસે હવે હિંસા પાછળના જવાબદારો સુધી પહોંચવાનો પ્રયાસ શરૂ કર્યો છે. તપાસ એજન્સીઓ હવે માત્ર સ્થળ પરથી મળેલા પુરાવા પર જ નહીં પરંતુ આધુનિક ટેક્નોલોજીની મદદથી પણ આરોપીઓ સુધી પહોંચવાનો પ્રયાસ કરી રહી છે. પોલીસનું કહેવું છે કે, હિંસા ફેલાવનાર કે તેમાં સીધી રીતે સામેલ કોઈપણ વ્યક્તિને કાયદા મુજબની કાર્યવાહીમાંથી બચાવવામાં આવશે નહીં. હિંસામાં સામેલ લોકોની ઓળખ માટે AI આધારિત ફોરેન્સિક સિસ્ટમ, ફેશિયલ રેકગ્નિશન સોફ્ટવેર અને ડિજિટલ પુરાવાનો વ્યાપક ઉપયોગ કરવામાં આવી રહ્યો છે.
દિલ્હીના પાંચ પોલીસ સ્ટેશનમાં કુલ 10 FIR નોંધાઈ
દિલ્હી પોલીસના જણાવ્યા અનુસાર, વિરોધ પ્રદર્શન દરમિયાન બનેલી વિવિધ ઘટનાઓ અને કાયદો-વ્યવસ્થા ભંગના કેસોમાં અત્યાર સુધી કુલ 10 FIR નોંધવામાં આવી છે. આ FIR દિલ્હીના પાંચ અલગ-અલગ પોલીસ સ્ટેશનોમાં નોંધાઈ છે. જેમાં સંસદ માર્ગ પોલીસ સ્ટેશનમાં 4, કનોટ પ્લેસ (CP) પોલીસ સ્ટેશનમાં 3, મંદિર માર્ગ પોલીસ સ્ટેશનમાં 1, બારાખંભા રોડ પોલીસ સ્ટેશનમાં 1 અને કર્તવ્ય પથ પોલીસ સ્ટેશનમાં 1 FIRનો સમાવેશ થાય છે.
પોલીસનું કહેવું છે કે દરેક કેસની અલગથી તપાસ ચાલી રહી છે અને તમામ ડિજિટલ તથા ફોરેન્સિક પુરાવાઓનું વિશ્લેષણ કરવામાં આવી રહ્યું છે.
CCTV, ડ્રોન અને સોશિયલ મીડિયા વીડિયોની તપાસ
હિંસા દરમિયાન જંતર-મંતર, સંસદ માર્ગ, આઉટર સર્કલ અને આસપાસના વિસ્તારોમાં લગાવવામાં આવેલા સેંકડો CCTV કેમેરાની ફૂટેજ એકત્ર કરવામાં આવી રહી છે. તે ઉપરાંત પોલીસના બોડી કેમેરા, ડ્રોન દ્વારા રેકોર્ડ કરાયેલા વીડિયો અને સોશિયલ મીડિયા પ્લેટફોર્મ પર વાયરલ થયેલા વીડિયો પણ તપાસનો મહત્વપૂર્ણ ભાગ બન્યા છે. તમામ ફૂટેજમાંથી શંકાસ્પદ વ્યક્તિઓની ઓળખ કરવાની પ્રક્રિયા શરૂ કરવામાં આવી છે.
આ પણ વાંચો: આ TMC સાંસદ સમગ્ર ચોમાસુ સત્ર માટે સસ્પેન્ડ : લોકસભામાં મહિલા સાંસદો અંગે અપશબ્દો બોલ્યાનો આરોપ
ફેશિયલ રેકગ્નિશન સિસ્ટમથી ઓળખની પ્રક્રિયા
દિલ્હી પોલીસ આધુનિક ફેશિયલ રેકગ્નિશન સિસ્ટમ (FRS)નો ઉપયોગ કરીને વીડિયોમાં દેખાતા ચહેરાઓને પોતાના ઉપલબ્ધ ડેટાબેઝ સાથે મેચ કરી રહી છે. તપાસ એજન્સીઓનો પ્રયાસ છે કે, હિંસા દરમિયાન હાજર રહેલા અને કાયદો-વ્યવસ્થા ભંગમાં સામેલ વ્યક્તિઓની ચોક્કસ ઓળખ થઈ શકે. જો કોઈ વ્યક્તિ અગાઉના ગુનાહિત રેકોર્ડ અથવા અન્ય સત્તાવાર ડેટાબેઝમાં નોંધાયેલ હશે તો તેની ઓળખ વધુ સરળ બની શકે છે.
હિંસા પૂર્વનિયોજિત હતી કે નહીં?
પોલીસ માત્ર આરોપીઓની ઓળખ સુધી મર્યાદિત નથી રહી, પરંતુ હિંસા અગાઉથી આયોજિત હતી કે અચાનક ભડકી હતી તેની પણ તપાસ કરી રહી છે. તપાસ દરમિયાન એ પણ જાણી શકાય તેવા પ્રયાસો થઈ રહ્યા છે કે, હિંસા પાછળ કોઈ સંગઠન, ગઠબંધન અથવા રાજકીય કાવતરું તો જવાબદાર નથી ને. ડિજિટલ પુરાવા, મોબાઇલ વીડિયો અને અન્ય ટેક્નિકલ માહિતીના આધારે સમગ્ર ઘટનાક્રમને ફરીથી તૈયાર કરવામાં આવી રહ્યો છે.
ડિજિટલ પુરાવા આધારે થશે કાર્યવાહી
સૂત્રોના જણાવ્યા અનુસાર અત્યાર સુધી નોંધાયેલી FIRના આધારે તમામ વીડિયો અને અન્ય ડિજિટલ પુરાવાની વિગતવાર તપાસ ચાલી રહી છે. જે લોકોની ઓળખ થશે તેમની સામે ભારતીય કાયદા મુજબ કાર્યવાહી કરવામાં આવશે. પોલીસનું સ્પષ્ટ કહેવું છે કે, હિંસા ફેલાવવામાં સામેલ કોઈપણ વ્યક્તિને તેની ઓળખ અથવા રાજકીય જોડાણના આધારે કોઈ રાહત આપવામાં આવશે નહીં.
તપાસ હજુ ચાલુ, વધુ કાર્યવાહી શક્ય
દિલ્હી પોલીસનું કહેવું છે કે, તપાસ હજુ પ્રાથમિક તબક્કામાં છે અને આગામી દિવસોમાં વધુ પુરાવા સામે આવી શકે છે. તપાસ આગળ વધતા વધુ લોકોની ઓળખ થવાની અને જરૂરી હોય ત્યાં વધુ FIR અથવા કાનૂની કાર્યવાહી થવાની શક્યતા પણ વ્યક્ત કરવામાં આવી રહી છે. રાજધાનીમાં કાયદો અને વ્યવસ્થા જાળવવા માટે પોલીસે તમામ ઉપલબ્ધ ટેક્નોલોજીનો ઉપયોગ શરૂ કર્યો છે, જેથી હિંસામાં સામેલ દરેક વ્યક્તિ સુધી પહોંચી શકાય અને કાયદા મુજબ કાર્યવાહી સુનિશ્ચિત કરી શકાય.
