દિલ્હી પોલીસના સ્પેશિયલ સેલની SWAT કમાન્ડો કાજલની નિર્મમ હત્યાએ સમગ્ર દેશને આઘાતમાં મુકી દીધો છે. રાજધાની દિલ્હીમાં બનેલી આ ઘટનાએ માત્ર કાયદા-વ્યવસ્થાને નહીં, પરંતુ સમાજના અંતરાત્માને પણ હચમચાવી નાખ્યો છે. દુઃખદ વાત એ છે કે કાજલની હત્યા કોઈ અજાણ્યા ગુનેગારે નહીં, પરંતુ તેના પોતાના પતિ અંકુરે કરી છે, જેને તેણે જીવનસાથી તરીકે પસંદ કર્યો હતો.
27 વર્ષીય કાજલ હરિયાણાના સોનીપત જિલ્લાના ગણૌરના બડે ગામની રહેવાસી હતી. 2022 માં દિલ્હી પોલીસમાં ભરતી થયા બાદ તેણે પોતાની ક્ષમતા અને શિસ્તના આધારે SWAT યુનિટમાં સ્થાન મેળવ્યું હતું. પરંતુ ગુનાહિત તત્વો સામે લડવા માટે તાલીમ પામેલી કાજલ પોતાના જ ઘરમાં હિંસાનો ભોગ બની.
2023 માં થયા હતા પ્રેમલગ્ન
કાજલ અને અંકુર વચ્ચે 2023 માં પ્રેમલગ્ન થયા હતા. શરૂઆતમાં સંબંધ સામાન્ય લાગ્યા, પરંતુ લગ્નના થોડા જ દિવસોમાં દહેજ માટે ત્રાસ શરૂ થયો હોવાનો પરિવારનો આરોપ છે. કાર અને પૈસાની માંગ સાથે કાજલને માનસિક અને શારીરિક રીતે પીડવામાં આવતી હતી. પરિસ્થિતિ બગડતા કાજલે 2024 માં અલગ રહેવાનું શરૂ કર્યું, છતાં ત્રાસ બંધ થયો નહોતો. આ દરમિયાન કાજલ ચાર મહિનાની ગર્ભવતી હતી.
22 જાન્યુઆરી સૌથી ભયાનક રાત!
22 જાન્યુઆરી 2026 ની રાતે અંકુરે કાજલ પર અત્યંત ક્રૂર હુમલો કર્યો. તેણે પહેલા માથું દરવાજા સાથે અથડાવ્યું અને બાદમાં લોખંડના ડમ્બલથી હુમલો કર્યો. ગંભીર રીતે ઘાયલ કાજલને હોસ્પિટલમાં ખસેડવામાં આવી, પરંતુ ઘણા દિવસોની જંગ બાદ 27 જાન્યુઆરીએ તેનું મોત થયું. આ સાથે ગર્ભસ્થ બાળકનું જીવન પણ સમાપ્ત થયું.
દિલ્હી પોલીસે ફોરેન્સિક પુરાવાના આધારે તપાસ કરી અંકુરની ધરપકડ કરી છે. કાજલના ગામ ગણૌરમાં શોકનો માહોલ છે. ત્રિરંગામાં લપેટાયેલી કાજલને સંપૂર્ણ રાજ્ય સન્માન સાથે અંતિમ વિદાય આપવામાં આવી.
