Delhi Mumbai Expressway: દિલ્હી-મુંબઈ એક્સપ્રેસવે પર એક હૃદયદ્રાવક અકસ્માત સર્જાયો છે, જેમાં ચાલતી કાર અચાનક આગનો ગોળો બની ગઈ હતી. રાજસ્થાનના અલવર જિલ્લાના મૌજપુર પાસે બુધવારે મોડી રાત્રે બનેલી આ ઘટનામાં એક જ પરિવારના 5 સભ્યો જીવતા સળગી ગયા છે. અકસ્માત એટલો ભયાનક હતો કે આગ ઓલવ્યા બાદ બચાવ ટીમને કારમાંથી માત્ર હાડકાંના અવશેષો જ મળી આવ્યા હતા. કાર ચલાવી રહેલા ડ્રાઈવરે ચાલતી ગાડીએ કૂદીને પોતાનો જીવ બચાવ્યો હતો, પરંતુ તેની હાલત પણ અત્યંત ગંભીર હોવાનું જાણવા મળ્યું છે.
મળતી માહિતી મુજબ, કારમાં સવાર મુસાફરો મધ્યપ્રદેશના શ્યોપુરના રહેવાસી હતા અને માતા વૈષ્ણોદેવીના દર્શન કરીને પરત ફરી રહ્યા હતા. ખુશીઓ સાથે ઘરે પાછા ફરી રહેલા આ પરિવાર માટે એક્સપ્રેસવે કાળ સાબિત થયો હતો. પ્રાથમિક તપાસમાં આગ શોર્ટ સર્કિટના કારણે લાગી હોવાનું મનાય છે, જેણે જોતજોતામાં રૌદ્ર સ્વરૂપ ધારણ કરી લીધું હતું.
વૈષ્ણોદેવીથી પરત ફરતા પરિવારનો કાળમુખો અકસ્માત
આ દુર્ઘટના બુધવારે રાત્રે આશરે 11 વાગ્યે મૌજપુરમાં SSB ટ્રેનિંગ સેન્ટર પાસે સર્જાઈ હતી. કારમાં ત્રણ મહિલાઓ, એક પુરુષ અને એક માસૂમ બાળકી સવાર હતા. શ્યોપુર પાછા ફરી રહેલા આ શ્રદ્ધાળુઓને કદાચ ખ્યાલ પણ નહીં હોય કે તેમની સફરનો આટલો કરૂણ અંત આવશે. આગ લાગતાની સાથે જ કારમાં ચીસાચીસ મચી ગઈ હતી, પરંતુ સેન્ટ્રલ લોકીંગ અથવા આગની ઝડપને કારણે કોઈને બહાર નીકળવાની તક મળી ન હતી.
CNG કીટ બની શકે છે આગ ભડકવાનું કારણ
અલવર ASP પ્રિયંકા રઘુવંશીએ જણાવ્યું કે, ફાયર બ્રિગેડની ટીમે ઘટનાસ્થળે પહોંચી 15 મિનિટમાં આગ પર કાબૂ મેળવી લીધો હતો, પરંતુ ત્યાં સુધીમાં બધું જ રાખ થઈ ગયું હતું. એવી આશંકા વ્યક્ત કરવામાં આવી રહી છે કે કારમાં CNG કીટ હોવાને કારણે આગ ખૂબ જ ઝડપથી ફેલાઈ હતી. ડ્રાઈવરે બારીમાંથી કૂદીને જીવ બચાવવાનો પ્રયાસ કર્યો હતો, તેને ગંભીર હાલતમાં જયપુર રિફર કરવામાં આવ્યો છે.
ઘટનાસ્થળેથી મળ્યા માત્ર બળી ગયેલા હાડકાં
અકસ્માતની ગંભીરતાનો અંદાજ એ વાત પરથી લગાવી શકાય છે કે પોલીસ અને ફાયર વિભાગને કારમાંથી મૃતદેહોને બદલે માત્ર માનવ હાડકાંના અવશેષો જ મળ્યા છે. મોડી રાત્રે એસપી સુધીર ચૌધરીએ પણ ઘટનાસ્થળની મુલાકાત લીધી હતી. હાલમાં પોલીસે તમામ અવશેષોને કબજે કરી મોર્ચરીમાં રાખ્યા છે અને મૃતકોની સત્તાવાર ઓળખ વિધિ માટે પરિવારજનોનો સંપર્ક કરવાની તજવીજ હાથ ધરી છે.
આ પણ વાંચો: બેંગલુરુમાં હોસ્પિટલની દીવાલ ધરાશાયી : વરસાદી દુર્ઘટનામાં 2 ના મોત
એક્સપ્રેસવે પર સર્જાયો ટ્રાફિક જામ
ભીષણ આગના કારણે દિલ્હી-મુંબઈ એક્સપ્રેસવે પર થોડા સમય માટે વાહનોની લાંબી કતારો લાગી ગઈ હતી અને ટ્રાફિક જામની સ્થિતિ સર્જાઈ હતી. પોલીસે ઘટનાસ્થળે પહોંચીને ક્રેન દ્વારા બળી ગયેલી કારને રસ્તાની બાજુએ ખસેડી વાહનવ્યવહાર પૂર્વવત કરાવ્યો હતો. આ દુર્ઘટનાએ ફરી એકવાર હાઈવે પર ચાલતા વાહનોની સુરક્ષા અને મેન્ટેનન્સ સામે સવાલો ઉભા કર્યા છે.
