જજના ઘરમાંથી મળી મોટી રોકડ રકમ : દિલ્હીથી અલ્હાબાદ હાઈકોર્ટમાં બદલી

સુપ્રીમ કોર્ટના કોલેજિયમે દિલ્હી હાઈકોર્ટના જજ યશવંત વર્માને અલ્હાબાદ હાઈકોર્ટમાં ટ્રાન્સફર કરવાની ભલામણ કરી છે. આ પાછળનું કારણ જસ્ટિસ વર્માના નિવાસસ્થાને મોટી માત્રામાં રોકડ મળી આવી છે, જે ફાયર બ્રિગેડ અને પોલીસ કર્મચારીઓએ જપ્ત કરી હતી.

તાજેતરમાં જ જસ્ટિસ યશવંત વર્માના ઘરે આગ લાગી હતી. તે સમયે ન્યાયાધીશ ઘરે નહોતા. સ્થાનિકોએ પોલીસ અને ફાયર વિભાગને જાણ કરી હતી. આગને કાબૂમાં લીધા બાદ નુકસાનનું મૂલ્યાંકન કરતી વખતે સ્ટાફને એક રૂમમાં મોટી માત્રામાં રોકડ મળી આવી હતી. આ માહિતી પોલીસને આપવામાં આવી હતી. તેમણે કેન્દ્રીય ગૃહ મંત્રાલયને આ માહિતી આપી હતી.

તાત્કાલિક અલ્હાબાદ હાઈકોર્ટમાં બદલી
ભારતના મુખ્ય ન્યાયાધીશ સંજીવ ખન્નાને આ ઘટના અંગે માહિતગાર કરવામાં આવ્યા છે. આ અંગે મુખ્ય ન્યાયાધીશે તાત્કાલિક પોતાના સહિત 5 સૌથી વરિષ્ઠ ન્યાયાધીશોની કોલેજિયમની બેઠક બોલાવી હતી. સુપ્રીમ કોર્ટના કોલેજિયમે જસ્ટિસ યશવંત વર્માને અલ્હાબાદ હાઈકોર્ટમાં ટ્રાન્સફર કરવાનો નિર્ણય લીધો છે. કોલેજિયમ એ વાત પર પણ સહમત થયું હતું કે માત્ર જસ્ટિસ વર્માની બદલી પૂરતી નથી. આ કેસમાં આગળની કાર્યવાહી ચાલી રહી છે.

શું જસ્ટિસ વર્મા રાજીનામું આપશે?
આવી સ્થિતિમાં જસ્ટિસ વર્માને રાજીનામું આપવા માટે કહેવામાં આવે તેવી શક્યતા છે. જો તે આમ નહીં કરે તો તેની સામે આંતરિક તપાસ શરૂ કરી શકાય છે. આવી તપાસ સુપ્રીમ કોર્ટના એક ન્યાયાધીશ અને 2 જુદી જુદી ઉચ્ચ અદાલતોના મુખ્ય ન્યાયાધીશની સમિતિ દ્વારા કરવામાં આવે છે. જો ન્યાયાધીશ તપાસમાં દોષિત સાબિત થાય છે, તો અહેવાલ આગળની કાર્યવાહી માટે સંસદને મોકલવામાં આવે છે.

જસ્ટિસ યશવંત વર્માને 2014માં અલ્હાબાદ હાઈકોર્ટના જજ તરીકે બઢતી આપવામાં આવી હતી. 2021માં તેમની દિલ્હી હાઈકોર્ટમાં બદલી કરવામાં આવી હતી. તેઓ હાલમાં દિલ્હી હાઈકોર્ટના સૌથી વરિષ્ઠ ન્યાયાધીશ છે.