Delhi Capitals Captain 2026: વીમેન્સ પ્રીમિયર લીગ (WPL)ના ચોથા સીઝન 2026માં દિલ્હી કેપિટલ્સને નવો કેપ્ટન મળવા જઈ રહ્યો છે. ભારતની સ્ટાર બેટ્સવુમન જેમિમા રોડ્રિગ્સને ટીમની કેપ્ટનશિપ સોંપાઈ શકે છે. ક્રિકબઝના અહેવાલ મુજબ, આ અધિકૃત જાહેરાત 23 ડિસેમ્બરે થવાની છે. ત્રણ વખત ફાઇનલમાં પહોંચીને પણ ટ્રોફી ન જીતી શકનારી દિલ્હીની ટીમ આ વખતે ભારતીય કેપ્ટનના નેતૃત્વમાં ઇતિહાસ રચવા માટે તૈયાર છે.ઓક્શનમાં યુપી વોરિયર્ઝે મેગ લેનિંગને 1.9 કરોડમાં ખરીદી લીધા.
"અમારે હવે ભારતીય કપ્તાન જોઈએ છે"
ઓક્શન બાદ દિલ્હી કેપિટલ્સના સહ-માલિક પાર્થ જિંદલે સ્પષ્ટ કહ્યું હતું કે, "અમે ભારતીય કેપ્ટન જોઈએ છીએ અને અમારું મન પણ નક્કી છે." આ નિવેદન બાદ જેમિમા રોડ્રિગ્સનું નામ સૌથી આગળ આવ્યું. જેમિમા રોડ્રિગ્સે WPLમાં અત્યાર સુધી 27 મેચ રમીને 507 રન બનાવ્યા છે, જેમાં તેમનો એવરેજ 28.16 અને સ્ટ્રાઇક રેટ 139ની આસપાસ છે. તે ત્રણ અર્ધસદી પણ ફટકારી ચૂકી છે. તાજેતરમાં 2025ના વનડે વર્લ્ડ કપમાં જેમિમાએ ભારતને વર્લ્ડ ચેમ્પિયન બનાવવામાં મહત્વની ભૂમિકા ભજવી હતી.
જેમિમાની આગેવાનીમાં દિલ્હીની મોટી આશા
જેમિમા રોડ્રિગ્સે ICC WWCની સેમિફાઇનલમાં ઓસ્ટ્રેલિયા સામે અણનમ 127 રનની ઇનિંગ્સ તેમની કારકિર્દીની યાદગાર ઇનિંગ્સ ગણાઈ. ઓક્શન પહેલાં દિલ્હીએ પાંચ ખેલાડીઓને રિટેન કર્યા હતા: જેમિમા રોડ્રિગ્સ, શેફાલી વર્મા, મારિઝાન કેપ, એનાબેલ સધરલેન્ડ (દરેકને 2.22 કરોડમાં) અને અનકેપ્ડ નિકી પ્રસાદ (50 લાખમાં). ઓક્શનમાં દિલ્હીએ મજબૂત સ્ક્વોડ તૈયાર કર્યો છે, જેમાં લૌરા વુલ્વાર્ટ, ચિનેલ હેન્રી, લિઝેલ લી, સ્નેહ રાણા, શ્રી ચરણી વગેરેનો સમાવેશ થાય છે. WPL 2026ની શરૂઆત 8 જાન્યુઆરીથી થશે. જેમિમાના નેતૃત્વમાં દિલ્હી આ વખતે ટ્રોફી જીતીને ત્રણ વખતની રનર્સ-અપની નિરાશા દૂર કરવા માટે પૂરી તૈયારી કરી રહી છે. ક્રિકેટપ્રેમીઓને આ નવા અધ્યાયની આતુરતાથી રાહ જોવાઈ રહી છે!
WPL 2026 માટે દિલ્હી કેપિટલ્સનો સ્ક્વોડ:
જેમિમા રોડ્રિગ્સ, શેફાલી વર્મા, એનાબેલ સધરલેન્ડ, મારિઝાન કેપ, નિકી પ્રસાદ, લૌરા વુલ્વાર્ટ, ચિનેલ હેન્રી, શ્રી ચરણી, સ્નેહ રાણા, લિઝેલ લી, દિયા યાદવ, તાનિયા ભાટિયા, મમતા માદીવાલા, નંદિની શર્મા, લ્યુસી હેમિલ્ટન, મિન્નુ મણિ
