નવી દિલ્હી: દેશની રાજધાની દિલ્હીમાં સુરક્ષા વ્યવસ્થાને લઈને ફરી એકવાર ચિંતાજનક સમાચાર સામે આવ્યા છે. દિલ્હી વિધાનસભામાં ચાલી રહેલા બજેટ સત્ર દરમિયાન બુધવારે, 25 માર્ચના રોજ ફરી એકવાર બોમ્બ હોવાની ધમકી મળતા સનસનાટી મચી ગઈ છે. વિધાનસભાના અધ્યક્ષ વિજેન્દ્ર ગુપ્તાના સત્તાવાર ઈમેલ આઈડી પર વહેલી સવારે એક ઈમેલ મોકલવામાં આવ્યો હતો, જેમાં દાવો કરવામાં આવ્યો હતો કે વિધાનસભા પરિસરની અંદર વિસ્ફોટકો પ્લાન્ટ કરવામાં આવ્યા છે. આ ધમકી એવા સમયે મળી છે જ્યારે સદનમાં કાર્યવાહી ચાલી રહી હતી, જેના કારણે સુરક્ષા એજન્સીઓ તાત્કાલિક એક્શન મોડમાં આવી ગઈ છે.
નોંધનીય છે કે, દિલ્હી વિધાનસભામાં ધમકી મળવાનો આ સતત બીજો દિવસ છે. આ પહેલા મંગળવારે પણ મુખ્યમંત્રી રેખા ગુપ્તા દ્વારા દિલ્હીનું બજેટ રજૂ કરવામાં આવે તે પહેલા જ બે સમાન ઈમેલ મળ્યા હતા. સુરક્ષા એજન્સીઓ હાલમાં સમગ્ર વિધાનસભા સંકુલમાં સર્ચ ઓપરેશન ચલાવી રહી છે. બોમ્બ ડિસ્પોઝલ સ્ક્વોડ અને ડોગ સ્ક્વોડ દ્વારા ઝીણવટભરી તપાસ હાથ ધરવામાં આવી છે. પોલીસ અધિકારીઓના જણાવ્યા અનુસાર, આ ઈમેલમાં કેટલીક ઉશ્કેરણીજનક ટિપ્પણીઓ પણ કરવામાં આવી છે, જેની ગંભીરતાથી તપાસ કરવામાં આવી રહી છે.
24 કલાકમાં ત્રીજી ધમકી: સુરક્ષા એજન્સીઓ એલર્ટ પર
દિલ્હી વિધાનસભાની સુરક્ષામાં ગાબડું પાડવાના પ્રયાસ રૂપે છેલ્લા ૨૪ કલાકમાં આ ત્રીજો ધમકીભર્યો ઈમેલ છે. મંગળવાર, 24 માર્ચના રોજ સવારે 07:28 અને 07:49 વાગ્યે બે અલગ-અલગ ઈમેલ આવ્યા હતા. બુધવારે મળેલી નવી ધમકી બાદ દિલ્હી પોલીસે વિધાનસભાની અંદર અને બહાર સુરક્ષાનો લોખંડી બંદોબસ્ત ગોઠવી દીધો છે. એન્ટ્રી પોઈન્ટ્સ પર કડક ચેકિંગ કરવામાં આવી રહ્યું છે અને કોઈપણ અનિચ્છનીય ઘટનાને રોકવા માટે એન્ટી-સેબોટેજ ઈન્સ્પેક્શન (Anti-sabotage inspection) કરવામાં આવી રહ્યું છે.
સાયબર એક્સપર્ટ્સ દ્વારા ઈમેલ ટ્રેસિંગ શરૂ
દિલ્હી પોલીસના વરિષ્ઠ અધિકારીઓએ જણાવ્યું છે કે, તેઓ દરેક ધમકીને ખૂબ જ ગંભીરતાથી લઈ રહ્યા છે. સાયબર સેલના નિષ્ણાતો હાલમાં આ ઈમેલ ક્યાંથી મોકલવામાં આવ્યો છે તે શોધવા માટે 'IP ટ્રેકિંગ' અને 'ઈમેલ હેડર એનાલિસિસ' જેવા ટેકનિકલ ટૂલ્સનો ઉપયોગ કરી રહ્યા છે. પ્રાથમિક તપાસમાં આ કોઈની અટકચાળો હોઈ શકે છે, પરંતુ સુરક્ષામાં કોઈ પણ પ્રકારની બાંધછોડ ન થાય તે માટે સંપૂર્ણ તપાસ કરવામાં આવી રહી છે.
