વર્ષ 2026નો પ્રારંભ થઈ ચૂક્યો છે અને વિશ્વના મોટાભાગના દેશોમાં લોકો ફટાકડા અને પાર્ટીઓ દ્વારા નવા વર્ષને આવકારી રહ્યા છે. જોકે દુનિયાના નકશા પર કેટલાક એવા દેશો પણ છે જ્યાં 1 જાન્યુઆરીના રોજ ઉજવણી કરવી એ માત્ર સામાજિક રીતે ખરાબ નથી ગણાતું પરંતુ તે કાયદાકીય રીતે મોટો અપરાધ છે. આ દેશોમાં પશ્ચિમી સંસ્કૃતિ મુજબ નવું વર્ષ મનાવવા બદલ નાગરિકોને જેલના સળિયા પાછળ ધકેલી દેવામાં આવે છે.
ઉત્તર કોરિયામાં વૈચારિક ભ્રષ્ટાચાર ગણાય છે ઉજવણી
ઉત્તર કોરિયામાં ગ્રેગોરિયન કેલેન્ડરને બદલે દેશની પોતાની વિચારધારા આધારિત Juche Calendar અનુસરવામાં આવે છે. આ કેલેન્ડર કિમ ઇલ સુંગના જન્મ વર્ષથી શરૂ થાય છે. અહીં 1 જાન્યુઆરીની તારીખ તો અસ્તિત્વ ધરાવે છે પરંતુ પશ્ચિમી શૈલીમાં તેનો ઉત્સવ મનાવવો એ શાસન વિરોધી કૃત્ય માનવામાં આવે છે. જો કોઈ વ્યક્તિ આ દિવસે ઉજવણી કરતા પકડાય તો તેને આકરી મજૂરી અથવા જેલની સજા ભોગવવી પડે છે.
સાઉદી અરેબિયા અને બ્રુનેઈના કડક નિયમો
સાઉદી અરેબિયા સત્તાવાર રીતે ઇસ્લામિક કેલેન્ડરને અનુસરે છે. અહીં લાંબા સમય સુધી જાહેર સ્થળો પર નવા વર્ષની પાર્ટી કે આતશબાજી પર સંપૂર્ણ રોક હતી. જોકે Vision 2030 હેઠળ નિયમોમાં થોડી છૂટછાટ મળી છે તેમ છતાં મંજૂરી વગર જાહેર જશ્ન મનાવવા બદલ ધરપકડ કે દેશનિકાલ જેવી સજા થઈ શકે છે. તેવી જ રીતે બ્રુનેઈમાં પણ શરિયા કાયદા હેઠળ મુસ્લિમ નાગરિકો માટે બિન ઇસ્લામિક તહેવારો મનાવવા પર પ્રતિબંધ છે. આ કાયદાના ઉલ્લંઘન બદલ 5 વર્ષ સુધીની જેલ અથવા ભારે આર્થિક દંડ ફટકારવામાં આવે છે.
સોમાલિયા અને તાજિકિસ્તાનમાં પ્રતિબંધિત પ્રતીકો
સોમાલિયા સરકારે ઇસ્લામિક મૂલ્યોની જાળવણી અને સુરક્ષાના કારણોસર 1 જાન્યુઆરીની ઉજવણી અને Christmas પર સત્તાવાર પ્રતિબંધ મૂક્યો છે. જો કોઈ જાહેર સભા કરવાનો પ્રયાસ કરે તો સુરક્ષા દળો દ્વારા કડક કાર્યવાહી કરવામાં આવે છે. બીજી તરફ તાજિકિસ્તાનમાં સરકારી નિયંત્રણ હેઠળ નવું વર્ષ મનાવવામાં આવે છે પરંતુ શાળાઓ કે જાહેર સ્થળો પર Christmas Tree અથવા ફાધર ફ્રોસ્ટ જેવા પ્રતીકોનો ઉપયોગ કરવાની મનાઈ છે. આ નિયમોનું ઉલ્લંઘન કરનારની સામગ્રી જપ્ત કરીને તેમને વહીવટી દંડ આપવામાં આવે છે.
આ તમામ દેશોમાં સરકારોને એવો ડર રહે છે કે પશ્ચિમી શૈલીના તહેવારોની ઉજવણી તેમની ધાર્મિક ઓળખ અને સાંસ્કૃતિક વારસાને નબળી પાડી શકે છે. તેથી શાસન દ્વારા ધર્મ અને વિચારધારાના નામે આવા પ્રતિબંધો લાદવામાં આવ્યા છે.
