What is PPF for Cars : નવી કાર ખરીદ્યા પછી મોટાભાગના માલિકોની સૌથી મોટી ચિંતા તેની ચમક અને ઓરિજિનલ પેઇન્ટ જાળવી રાખવાની હોય છે. રસ્તા પર ઉડતા પથ્થરો, સ્ક્રેચ, ધૂળ, કડક તડકો અને રોજિંદા વપરાશને કારણે કારના પેઇન્ટ પર અસર થવી સ્વાભાવિક છે. આવી સ્થિતિમાં પેઇન્ટ પ્રોટેક્શન ફિલ્મ (PPF) કારના પેઇન્ટને લાંબા સમય સુધી સુરક્ષિત રાખવાનો એક લોકપ્રિય વિકલ્પ બની રહી છે. જોકે, યોગ્ય બ્રાન્ડ અને વિશ્વસનીય ડિટેલિંગ સ્ટુડિયો પસંદ કરવો એટલો જ મહત્વનો છે. નવી કાર ખરીદવી દરેક વ્યક્તિ માટે ખાસ ક્ષણ હોય છે. પરંતુ કારને વર્ષો સુધી નવી જેવી જ દેખાતી રાખવી સહેલી વાત નથી. ભારતમાં રસ્તાઓની સ્થિતિ, ધૂળ-માટી, ટ્રાફિક, નાના પથ્થરો અને સૂર્યપ્રકાશના સતત સંપર્કને કારણે કારના પેઇન્ટ પર ધીમે-ધીમે અસર થવા લાગે છે. પરિણામે કારની ચમક ઘટે છે અને રીસેલ વેલ્યુ પર પણ અસર પડી શકે છે. આ જ કારણ છે કે છેલ્લા કેટલાક વર્ષોમાં કાર PPF એટલે કે Paint Protection Filmની માંગ ઝડપથી વધી છે. ખાસ કરીને નવી કાર ખરીદનાર ગ્રાહકોમાં PPF હવે એક લોકપ્રિય પ્રીમિયમ એસેસરી તરીકે જોવામાં આવે છે. જો યોગ્ય ગુણવત્તાની ફિલ્મ અને અનુભવી ટેક્નિશિયન દ્વારા તેનું ઇન્સ્ટોલેશન કરવામાં આવે તો તે વર્ષો સુધી કારના પેઇન્ટને સુરક્ષિત રાખવામાં મદદરૂપ બની શકે છે.
કાર PPF શું છે?
PPF એટલે Paint Protection Film. આ એક પારદર્શક અને મજબૂત થર્મોપ્લાસ્ટિક પોલીયુરેથીન (TPU) ફિલ્મ છે, જેને કારની બહારની બોડી પર ખાસ ટેક્નિકથી લગાવવામાં આવે છે. તેનું મુખ્ય કામ કારના ઓરિજિનલ પેઇન્ટને બાહ્ય નુકસાનથી બચાવવાનું છે. આ ફિલ્મ નાના-મોટા સ્ક્રેચ, રસ્તા પર ઉડતા પથ્થરોના ટુકડા, કીડા-મકોડાના ડાઘ, પક્ષીઓના મળમૂત્ર, ઝાડની ડાળીઓથી થતા ઘર્ષણ અને રોજિંદા વપરાશ દરમિયાન થતી નાની નુકસાની સામે વધારાનું રક્ષણ આપે છે. ઘણી પ્રીમિયમ PPF ફિલ્મોમાં સ્વ-રીપેર (Self-healing) ટેક્નોલોજી પણ હોય છે, જેમાં હળવા સ્ક્રેચ ગરમીના સંપર્કમાં આવ્યા બાદ ઘણી હદ સુધી ગાયબ થઈ શકે છે.
આ પણ ખાસ વાંચો : Nissan Tekton vs Renault Duster vs Hyundai Creta : દરરોજ ઓફિસ જવા-આવવા માટે કઈ SUV છે બેસ્ટ?
PPF માટે કેટલો ખર્ચ થઈ શકે?
PPF કરાવતાં પહેલાં બજેટ નક્કી કરવું જરૂરી છે. સામાન્ય રીતે તેની શરૂઆતની કિંમત લગભગ ₹40,000થી શરૂ થાય છે, જ્યારે પ્રીમિયમ ગુણવત્તાની ફિલ્મ માટે ખર્ચ ₹2.5 લાખ સુધી પહોંચી શકે છે. રિપોર્ટ્સ મુજબ પ્રીમિયમ હેચબેક અથવા સેડાન માટે PPFનો ખર્ચ સામાન્ય રીતે ₹50,000થી ₹1.5 લાખ વચ્ચે હોઈ શકે છે. જ્યારે મોટી SUV અથવા લક્ઝરી કાર માટે આ ખર્ચ ₹70,000થી ₹2.5 લાખ સુધી જઈ શકે છે. કિંમત કારના કદ, ફિલ્મની ગુણવત્તા, વોરંટી અને ઇન્સ્ટોલેશનની ગુણવત્તા પર આધારિત હોય છે. જો તમારી કારનો રંગ સફેદ હોય તો Anti-Yellowing ટેક્નોલોજી ધરાવતી PPF પસંદ કરવી વધુ યોગ્ય ગણાય છે. આવી ફિલ્મ લાંબા સમય સુધી પારદર્શક રહેવામાં મદદ કરે છે અને સમય જતાં પીળાશ આવવાની શક્યતા ઘટાડે છે.
ભારતમાં લોકપ્રિય PPF બ્રાન્ડ્સ
ભારતીય બજારમાં અનેક સ્થાનિક અને આંતરરાષ્ટ્રીય બ્રાન્ડ્સ ઉપલબ્ધ છે, પરંતુ લાંબા ગાળાની ગુણવત્તા અને વેચાણ પછીની સર્વિસને ધ્યાનમાં રાખીને જાણીતી બ્રાન્ડ પસંદ કરવી વધુ યોગ્ય રહે છે.
3M PPF : અમેરિકાની સૌથી જાણીતી અને લાંબા સમયથી વિશ્વાસ મેળવનારી બ્રાન્ડ્સમાંની એક છે.
Saint-Gobain PPF : પોતાની પ્રીમિયમ ગુણવત્તા અને વિશ્વસનીયતા માટે ઓળખાય છે.
Rodim PPF : જર્મનીની BASF સાથે સંકળાયેલ TPU મટિરિયલ માટે જાણીતી બ્રાન્ડ છે.
Garware PPF : ભારતીય બ્રાન્ડ છે અને સ્થાનિક બજારમાં તેની સારી હાજરી છે.
આ ઉપરાંત Paint-Guard PPF, Nippon PPF અને Cosmo PPF પણ ભારતીય બજારમાં ઝડપથી લોકપ્રિય બની રહી છે. જોકે, કોઈપણ બ્રાન્ડ પસંદ કરતા પહેલાં તેની વોરંટી, ઓરિજિનાલિટી અને સર્વિસ નેટવર્ક અંગે માહિતી મેળવી લેવી જોઈએ.
આ પણ ખાસ વાંચો : મહિન્દ્રાએ ગ્રાહકોને આપ્યો મોટો ઝટકો : એક જ ઝાટકે વધાર્યા SUVના ભાવ, થારથી બોલેરો સુધી જાણો નવી કિંમત
યોગ્ય કાર ડિટેલિંગ સ્ટુડિયો કેવી રીતે પસંદ કરવો?
PPFની ગુણવત્તા જેટલી મહત્વની છે, એટલું જ મહત્વ તેનું યોગ્ય ઇન્સ્ટોલેશન પણ ધરાવે છે. સારી ફિલ્મ પણ જો યોગ્ય રીતે ન લગાવવામાં આવે તો તેનું પરિણામ સંતોષજનક રહેતું નથી. હંમેશા તેવા સ્ટુડિયોની પસંદગી કરો જે સંબંધિત બ્રાન્ડ દ્વારા Authorized હોય અને જેનો સારો ટ્રેક રેકોર્ડ હોય. શક્ય હોય તો મલ્ટી-બ્રાન્ડ ડિટેલિંગ સ્ટુડિયો પસંદ કરો, જેથી વિવિધ બ્રાન્ડની ફિલ્મોની સરખામણી કરી શકાય. સ્ટુડિયો પસંદ કરતા પહેલાં Google Reviews વાંચવા, અગાઉના ગ્રાહકોના અનુભવ જાણવા અને સ્ટુડિયો કેટલા વર્ષોથી આ ક્ષેત્રમાં કાર્યરત છે તેની માહિતી મેળવવી પણ મહત્વપૂર્ણ છે. જે સ્ટુડિયો કિંમત અંગે સંપૂર્ણ પારદર્શિતા રાખે છે અને ફિક્સ્ડ પ્રાઇસ પર કામ કરે છે તે સામાન્ય રીતે વધુ વિશ્વસનીય ગણાય છે. જો કોઈ સ્ટુડિયો અસામાન્ય ડિસ્કાઉન્ટ અથવા અનેક મફત ભેટોની લાલચ આપે તો સાવચેતી રાખવી જોઈએ, કારણ કે કેટલાક કિસ્સામાં બ્રાન્ડેડના નામે ઓછી ગુણવત્તાની ફિલ્મ લગાવવાની ફરિયાદો પણ સામે આવતી હોય છે.
ઓરિજિનલ PPFની ઓળખ કેવી રીતે કરવી?
PPF કરાવતા પહેલાં ફિલ્મના બોક્સ અથવા રોલ પર દર્શાવેલો Roll Number અથવા પ્રોડક્ટ કોડ નોંધવો જોઈએ. શક્ય હોય તો તેને સંબંધિત બ્રાન્ડની અધિકૃત વેબસાઇટ અથવા ગ્રાહક સેવા મારફતે વેરિફાય કરવો. આ ઉપરાંત ઇન્સ્ટોલેશન દરમિયાન શક્ય હોય ત્યાં સુધી હાજર રહેવું વધુ સારું રહે છે. તેનાથી વપરાતી ફિલ્મ, તેની ગુણવત્તા અને સમગ્ર પ્રક્રિયા અંગે વિશ્વાસ જળવાઈ રહે છે. યોગ્ય બ્રાન્ડ, અનુભવી ડિટેલિંગ સ્ટુડિયો અને ઓરિજિનલ PPFની ખાતરી સાથે કરાવેલું ઇન્સ્ટોલેશન તમારી કારના પેઇન્ટને વર્ષો સુધી સુરક્ષિત રાખવામાં મદદ કરી શકે છે અને વાહનની દેખાવ તેમજ રીસેલ વેલ્યુ બંને જાળવવામાં ઉપયોગી સાબિત થઈ શકે છે.
