મહિન્દ્રાએ ગ્રાહકોને આપ્યો મોટો ઝટકો : એક જ ઝાટકે વધાર્યા SUVના ભાવ, થારથી બોલેરો સુધી જાણો નવી કિંમત

Mahindra and Mahindra : ભારતીય ઓટોમોબાઈલ બજારમાં અગ્રણી કંપની મહિન્દ્રા એન્ડ મહિન્દ્રાએ પોતાના ગ્રાહકોને મોટો ઝટકો આપતા પસંદગીની કાર અને SUVની કિંમતોમાં 2.7 ટકા સુધીનો વધારો જાહેર કર્યો છે. કંપનીની નવી કિંમતો 10 જુલાઈ 2026થી સમગ્ર દેશમાં અમલમાં આવી ગઈ છે. કંપનીના જણાવ્યા મુજબ કાચા માલ અને અન્ય કોમોડિટી ખર્ચમાં થયેલા વધારાને કારણે આ નિર્ણય લેવામાં આવ્યો છે. આ વર્ષ દરમિયાન મહિન્દ્રા દ્વારા કારોના ભાવમાં કરવામાં આવેલો આ બીજો વધારો છે. નવા દરો લાગુ થયા બાદ થાર, બોલેરો, બોલેરો નિયો, સ્કોર્પિયો ક્લાસિક અને XUV 7XO જેવી લોકપ્રિય SUV હવે પહેલા કરતાં વધુ કિંમતે ઉપલબ્ધ થશે. જોકે, સ્કોર્પિયો-એન તેમજ કંપનીની કેટલીક ઇલેક્ટ્રિક SUVના ભાવમાં કોઈ ફેરફાર કરવામાં આવ્યો નથી, જે ગ્રાહકો માટે રાહતના સમાચાર છે.

પેટ્રોલ અને ડીઝલ SUV ખરીદવી હવે પડશે વધુ મોંઘી

કંપનીએ પોતાના મોટાભાગના પેટ્રોલ અને ડીઝલ મોડલ્સના ભાવમાં વધારો કર્યો છે. સૌથી મોટો વધારો બોલેરોના બેઝ વેરિઅન્ટમાં જોવા મળ્યો છે, જ્યાં કિંમતમાં આશરે ₹49,000નો વધારો કરવામાં આવ્યો છે. લાંબા સમયથી ગ્રામ્ય અને શહેરી બંને બજારમાં લોકપ્રિય રહેલી બોલેરો હવે વધુ કિંમતે ખરીદવી પડશે. યુવાનોમાં લોકપ્રિય ઓફ-રોડ SUV થાર 3-ડોર અને થાર રોક્સની કિંમતોમાં પણ વધારો કરવામાં આવ્યો છે. હવે થાર 3-ડોરની શરૂઆતની એક્સ-શોરૂમ કિંમત ₹10.32 લાખ થઈ ગઈ છે, જ્યારે થાર રોક્સની શરૂઆતની કિંમત ₹12.52 લાખ થઈ છે. ઉપરાંત સ્કોર્પિયો ક્લાસિક અને XUV 7XOની કિંમતોમાં પણ નોંધપાત્ર વધારો કરવામાં આવ્યો છે.

આ પણ ખાસ વાંચો : R-Line કરતાં રૂ.5 લાખ સસ્તી, છતાં 204hp અને AWD સાથે Tayron Life લોન્ચ : Volkswagenની આ કારમાં મળશે જર્મન ક્લાસ, લક્ઝરી અને પાવર

સ્કોર્પિયો-એનના ગ્રાહકોને મોટી રાહત

જ્યારે કંપનીએ મોટાભાગના મોડલ્સ મોંઘા કર્યા છે ત્યારે સ્કોર્પિયો-એનના ભાવમાં કોઈ ફેરફાર કરવામાં આવ્યો નથી. આ SUVની શરૂઆતની કિંમત ₹13.49 લાખ અને ટોપ વેરિઅન્ટની કિંમત ₹24.95 લાખ જાળવી રાખવામાં આવી છે. ઓટોમોબાઈલ સેક્ટરમાં ચાલી રહેલી ચર્ચા મુજબ મહિન્દ્રા આગામી સમયમાં સ્કોર્પિયો-એનનું ફેસલિફ્ટ વર્ઝન ભારતીય બજારમાં રજૂ કરવાની તૈયારીમાં છે. હાલમાં તેનું રોડ ટેસ્ટિંગ પણ ચાલી રહ્યું હોવાનું જાણવા મળે છે. આવી સ્થિતિમાં કંપનીએ હાલના મોડલની કિંમત સ્થિર રાખીને ગ્રાહકોને આકર્ષવાનો પ્રયાસ કર્યો હોવાનું માનવામાં આવે છે.

ઇલેક્ટ્રિક કાર ખરીદનારા માટે મિશ્ર સમાચાર

મહિન્દ્રાના ઇલેક્ટ્રિક પોર્ટફોલિયોમાં આ વખતે મિશ્ર સ્થિતિ જોવા મળી છે. કંપનીએ XUV 3XO EV, BE 6 અને XEV 9Eના ભાવમાં કોઈ ફેરફાર કર્યો નથી. એટલે કે આ મોડલ્સ અગાઉની જ કિંમતે ઉપલબ્ધ રહેશે. બીજી તરફ કંપનીની ફ્લેગશિપ 7-સીટર ઇલેક્ટ્રિક SUV XEV 9Sની શરૂઆતની કિંમતમાં સીધો ₹70,000નો વધારો કરવામાં આવ્યો છે. આ સમગ્ર પ્રાઇસ હાઇકમાં સૌથી મોટો વધારો છે. કંપનીએ અન્ય ઇલેક્ટ્રિક મોડલ્સના ભાવ યથાવત રાખીને વધતી EV માંગને ધ્યાનમાં રાખી સંતુલિત વ્યૂહરચના અપનાવી હોવાનું માનવામાં આવે છે.

મહિન્દ્રાની નવી એક્સ-શોરૂમ કિંમતો

નવી કિંમતો મુજબ XUV 3XO હવે ₹7.79 લાખથી ₹15.04 લાખ વચ્ચે ઉપલબ્ધ છે. બોલેરોની કિંમત ₹8.49 લાખથી શરૂ થાય છે, જ્યારે બોલેરો નિયો ₹8.99 લાખથી ઉપલબ્ધ રહેશે. થાર 3-ડોરની કિંમત હવે ₹10.32 લાખથી શરૂ થાય છે અને થાર રોક્સ ₹12.52 લાખથી ઉપલબ્ધ છે. સ્કોર્પિયો ક્લાસિક ₹13.37 લાખથી શરૂ થાય છે, જ્યારે સ્કોર્પિયો-એનની કિંમત યથાવત ₹13.49 લાખથી શરૂ થાય છે. XUV 7XOની શરૂઆતની કિંમત હવે ₹13.99 લાખ છે. ઇલેક્ટ્રિક સેગમેન્ટમાં XUV 3XO EV ₹13.89 લાખથી, BE 6 ₹18.90 લાખથી અને XEV 9E ₹21.90 લાખથી ઉપલબ્ધ છે. જ્યારે XEV 9Sની નવી શરૂઆતની કિંમત ₹20.65 લાખ કરવામાં આવી છે.

આ પણ ખાસ વાંચો : પેટ્રોલ નહીં, હવે E85 પર પણ દોડશે Yamaha FZ! : 149cc એન્જિન, Flex-Fuel ટેક્નોલોજી અને પ્રીમિયમ ફીચર્સ સાથે ભારતમાં લોન્ચ

ગ્રાહકો પર શું પડશે અસર?

ભારતીય ઓટોમોબાઈલ બજારમાં છેલ્લા કેટલાક સમયથી સ્ટીલ, એલ્યુમિનિયમ અને અન્ય કાચા માલના ભાવમાં સતત વધારો નોંધાઈ રહ્યો છે. તેના કારણે મોટાભાગની ઓટો કંપનીઓ સમયાંતરે કિંમતોમાં સુધારો કરી રહી છે. મહિન્દ્રાનો આ નિર્ણય પણ એ જ પરિસ્થિતિનો ભાગ માનવામાં આવી રહ્યો છે. જો તમે મહિન્દ્રાની નવી SUV ખરીદવાનું આયોજન કરી રહ્યા હોવ તો હવે તમારે પહેલા કરતાં વધુ બજેટ તૈયાર રાખવું પડશે. જોકે સ્કોર્પિયો-એન અને કેટલીક ઇલેક્ટ્રિક SUVના ભાવમાં કોઈ વધારો ન થતાં આ મોડલ્સ હજુ પણ ગ્રાહકો માટે આકર્ષક વિકલ્પ બની રહે છે. આગામી મહિનાઓમાં બજારમાં વધતી સ્પર્ધા વચ્ચે અન્ય કાર ઉત્પાદકો પણ ભાવમાં ફેરફાર કરે છે કે નહીં તેના પર સમગ્ર ઓટો ઉદ્યોગની નજર રહેશે.

મહિન્દ્રા કારોની નવી અને જૂની કિંમતો (એક્સ-શોરૂમ)