અમદાવાદ શહેરના વટવા વિસ્તારમાં વહેલી સવારે એક ગંભીર કાર અકસ્માતની ઘટના સામે આવી છે. જોગણી માતાના મંદિર નજીક એક કારચાલકે ગાયને અડફેટે લેતા ગાયનું ઘટનાસ્થળે જ મોત નીપજ્યું હતું. ઘટનાને કારણે વિસ્તારમાં ચકચાર મચી ગઈ હતી અને સ્થાનિક લોકોમાં રોષ ફેલાયો હતો.
ગાયને અડફેટે લેતા મોત
માહિતી મુજબ, વહેલી સવારે એક કાર તેજ ગતિએ પસાર થઈ રહી હતી ત્યારે જોગણી માતાના મંદિર પાસે રસ્તા પર ઉભેલી ગાયને જોરદાર ટક્કર મારી હતી. ટક્કર એટલી જોરદાર હતી કે ગાયનું સ્થળ પર જ મૃત્યુ થયું હતું. અકસ્માત બાદ કાર થોડી દૂર જઈ અટકી હતી.
ડ્રાઈવર નશામાં હોવાનો આરોપ
ઘટનાની જાણ થતાં જ આસપાસના લોકો મોટી સંખ્યામાં સ્થળ પર એકત્ર થઈ ગયા હતા. લોકોએ કારચાલક યુવકને પકડી પાડ્યો હતો. સ્થાનિક લોકોમાં ચર્ચા ચાલી રહી હતી કે કારચાલક નશાની હાલતમાં હતો. લોકોમાં ભારે રોષ જોવા મળ્યો હતો અને ઘટનાને લઈને આક્રોશ વ્યક્ત કરવામાં આવ્યો હતો. કારની તપાસ દરમિયાન સીટ પરથી ખાલી દારૂની બોટલ મળી આવી હોવાનું જાણવા મળ્યું છે. જેના કારણે ડ્રાઈવર નશામાં હોવાનો આરોપ વધુ ગાઢ બન્યો છે.
કડક કાર્યવાહી કરવાની માંગ
ઘટનાની જાણ પોલીસને કરવામાં આવી હતી અને પોલીસે સ્થળ પર પહોંચી આગળની કાર્યવાહી હાથ ધરી હતી. આ બનાવે ફરી એકવાર નશામાં વાહન ચલાવવાના જોખમોને ઉજાગર કર્યા છે. નશામાં ડ્રાઈવિંગ કરવાથી નિર્દોષ જીવનું નુકસાન થાય છે તેમજ જાહેર સુરક્ષા માટે ગંભીર ખતરો ઊભો થાય છે. સ્થાનિક લોકોએ દોષિત સામે કડક કાર્યવાહી કરવાની માંગ ઉઠાવી છે.
