Nepal Bus Accident: 23 ફેબ્રુઆરી 2026 નેપાળના ધાડિંગ જિલ્લામાં સોમવારે વહેલી સવારે એક ભયાનક બસ અકસ્માત થયો છે. પોક્હારાથી કાઠમંડુ જઈ રહેલી એક મુસાફર બસ પૃથ્વી હાઇવે પર ગજુરી નજીક (બેનિઘાટ રોરાંગ ગામ પાલિકા-5 નજીક) અચાનક નિયંત્રણ ગુમાવીને ત્રિશુલી નદીમાં પડી ગઈ. આ અકસ્માતમાં ઓછામાં ઓછા 18 લોકોના મોત થયા છે અને 26 થી 28 જેટલા મુસાફરો ગંભીર રીતે ઘાયલ થયા છે.
મૃતકોમાં ન્યુઝીલેન્ડનો એક પુરુષ મુસાફર પણ સામેલ
અકસ્માત રાત્રિના આશરે 1:30 વાગ્યે થયો હતો. નેપાળ સશસ્ત્ર પોલીસ દળના પ્રવક્તા વિષ્ણુ પ્રસાદ ભટ્ટ અનુસાર, ઘટનાસ્થળેથી 17 મૃતદેહો મળી આવ્યા છે અને બાકીના બચાવ કામગીરી દરમિયાન મળ્યા છે. મૃતકોમાં ન્યુઝીલેન્ડનો એક પુરુષ મુસાફર પણ સામેલ છે. ઘાયલોમાં એક જાપાની અને એક ડચ મહિલાનો પણ સમાવેશ થાય છે. બસમાં કુલ 44 થી વધુ મુસાફરો હોવાનું અનુમાન છે.
અકસ્માતનું ચોક્કસ કારણ હજુ સુધી સ્પષ્ટ થયું નથી
નેપાળ આર્મી, સશસ્ત્ર પોલીસ અને સ્થાનિક પોલીસની ટીમોએ તાત્કાલિક બચાવ કામગીરી શરૂ કરી છે. ઘાયલોને નજીકની વિવિધ હોસ્પિટલોમાં ખસેડવામાં આવ્યા છે. પ્રારંભિક તપાસમાં ઓવરસ્પીડિંગ અથવા રસ્તાની ખરાબ સ્થિતિને કારણભૂત માનવામાં આવી રહી છે, પરંતુ અકસ્માતનું ચોક્કસ કારણ હજુ સુધી સ્પષ્ટ થયું નથી. આ પ્રકારના અકસ્માતો નેપાળમાં સામાન્ય છે, જ્યાં પર્વતીય રસ્તાઓ અને ઝડપી ડ્રાઇવિંગને કારણે ઘણીવાર દુર્ઘટનાઓ બને છે.આ દુ:ખદ ઘટનામાં મૃતકોના પરિવારજનો પ્રત્યે ઊંડી સંવેદના!
