માન્ચેસ્ટરમાં યોજાનારી આગામી ટેસ્ટ મેચમાં જસપ્રીત બુમરાહ રમશે કે નહીં તે અંગે સતત ચર્ચા ચાલી રહી છે. ભારત અને ઈંગ્લેન્ડ વચ્ચેની ટેસ્ટ શ્રેણીની ચોથી ટેસ્ટ મેચમાં સ્ટાર ફાસ્ટ બોલર રમવા અંગે ચર્ચા ચાલુ છે. બધાની નજર તેના પર છે કે શું બુમરાહને તેના વર્કલોડ મેનેજમેન્ટ હેઠળ માન્ચેસ્ટરમાં આરામ આપવામાં આવશે કે, પછી ટીમ ઈન્ડિયા શ્રેણીની પરિસ્થિતિ જોયા પછી તેને રમાડશે.
ભારત અને ઈંગ્લેન્ડ વચ્ચે ટેસ્ટ શ્રેણીની ચોથી મેચ 23 જુલાઈથી માન્ચેસ્ટરના ઓલ્ડ ટ્રેફોર્ડ મેદાન પર રમાશે. આ મેચમાં બુમરાહના રમવા પર સતત શંકા છે કારણ કે શ્રેણી પહેલા જાહેરાત કરવામાં આવી હતી કે તે વર્કલોડ મેનેજમેન્ટ માટે ફક્ત 3 ટેસ્ટ મેચ રમશે. પ્રથમ 3 મેચમાંથી, બુમરાહ પ્રથમ અને ત્રીજી મેચમાં ભાગ લીધો હતો, જ્યારે તેણે બીજી મેચથી આરામ લીધો હતો.
હવે શ્રેણી દાવ પર લાગી ગઈ છે કારણ કે ઈંગ્લેન્ડ 2-1થી આગળ છે. સવાલો ઉભા થઈ રહ્યા છે કે બુમરાહ ચોથી મેચ રમશે કે નહીં? આનો જવાબ મેચના દિવસે જ ખબર પડશે પરંતુ જો આ દિગ્ગજ ઝડપી બોલર આ મેચમાં રમે છે, તો તે ઈતિહાસ રચી શકે છે. હકીકતમાં, જો બુમરાહ માન્ચેસ્ટર ટેસ્ટમાં એક પણ વિકેટ લે છે, તો તે ઈંગ્લેન્ડમાં પોતાની 50 ટેસ્ટ વિકેટ પૂર્ણ કરશે. આ સાથે, બુમરાહ ઈંગ્લેન્ડની ધરતી પર આ સિદ્ધિ મેળવનાર પ્રથમ ભારતીય બોલર પણ બનશે.
