રત્ન શાસ્ત્રમાં દરેક ગ્રહ માટે એક વિશેષ રત્ન જણાવવામાં આવ્યું છે અને શનિદેવ માટે નીલમ રત્ન સૌથી પ્રભાવશાળી માનવામાં આવે છે. જ્યોતિષ શાસ્ત્ર અનુસાર નીલમ રત્ન ખૂબ જ શક્તિશાળી છે જે રાતોરાત વ્યક્તિનું ભાગ્ય બદલી શકે છે. જો આ રત્ન કોઈને માફક આવી જાય તો તે વ્યક્તિને અપાર ધન અને સફળતા અપાવે છે પણ જો તે અશુભ અસર કરે તો વ્યક્તિ પાયમાલ થઈ શકે છે. શનિદેવ ન્યાયના દેવતા છે તેથી તેમના રત્નને ધારણ કરતા પહેલા ખાસ સાવચેતી રાખવી પડે છે. અમુક રાશિના જાતકો માટે આ રત્ન પહેરવું હાનિકારક સાબિત થઈ શકે છે.
મેષ રાશિના જાતકો માટે અશુભ
મેષ રાશિના સ્વામી મંગળ છે અને શનિ સાથે તેમનો સંબંધ શત્રુતાભર્યો છે. આ બંને ગ્રહો એકબીજાના વિરોધી સ્વભાવના હોવાથી મેષ રાશિના લોકોએ નીલમ પહેરવાનું ટાળવું જોઈએ. જો તેઓ આ રત્ન પહેરે છે તો તેમને આર્થિક નુકસાન વેઠવું પડી શકે છે. આ ઉપરાંત સ્વાસ્થ્ય સંબંધિત સમસ્યાઓ અને કરિયરમાં પણ અવરોધો આવી શકે છે.
કર્ક રાશિ પર ખરાબ અસર
કર્ક રાશિના સ્વામી ચંદ્રદેવ છે અને શનિ મહારાજ સાથે તેમનો કોઈ મેળ નથી. ચંદ્ર અને શનિ વચ્ચે શત્રુતા હોવાને કારણે કર્ક રાશિના જાતકો માટે નીલમ રત્ન પહેરવું જોખમી હોઈ શકે છે. આ રત્ન પહેરવાથી માનસિક તાણ વધી શકે છે અને માતાના સ્વાસ્થ્ય પર પણ વિપરીત અસર પડી શકે છે.
સિંહ અને વૃશ્ચિક રાશિએ પણ રહેવું દૂર
સિંહ રાશિના સ્વામી સૂર્ય છે જે શનિના પિતા હોવા છતાં બંને વચ્ચે કટ્ટર દુશ્મનાવટ છે. તેથી સિંહ રાશિના લોકોએ પણ નીલમ પહેરવું હિતાવહ નથી. બીજી તરફ વૃશ્ચિક રાશિના સ્વામી મંગળ છે જે શનિના શત્રુ છે. આ રાશિના લોકો જો નીલમ પહેરે તો અકસ્માત અને ધનહાનિ થવાની શક્યતા વધી જાય છે. કોઈપણ રત્ન પહેરતા પહેલા જ્યોતિષની સલાહ લેવી અનિવાર્ય છે.
મીન રાશિ માટે મિશ્ર ફળ
મીન રાશિના સ્વામી ગુરુ છે અને શનિ સાથે તેમનો સંબંધ સમ છે. પરંતુ સામાન્ય રીતે મીન રાશિના જાતકોને પણ નીલમ ન પહેરવાની સલાહ આપવામાં આવે છે. જો કુંડળીમાં શનિની સ્થિતિ ખરાબ હોય તો આ રત્ન નુકસાન કરી શકે છે.
