ભરૂચની ઐતિહાસિક જુમ્મા મસ્જિદ અંગે જિલ્લા કલેક્ટરનું જાહેરનામું : કાયદો અને વ્યવસ્થા જાળવવા આકરા નિયમો લાગુ

Bharuch News: ભરૂચની ઐતિહાસિક જુમ્મા મસ્જિદના મૂળ સ્વરૂપને લઈને છેલ્લા કેટલાક સમયથી ચાલી રહેલા વિવાદ વચ્ચે વહીવટી તંત્ર દ્વારા એક મોટો નિર્ણય લેવામાં આવ્યો છે. આ રાષ્ટ્રીય સંરક્ષિત સ્મારકની સુરક્ષા, કાયદો અને વ્યવસ્થાની સ્થિતિ જાળવી રાખવા માટે જિલ્લા કલેક્ટર દ્વારા એક મહત્વપૂર્ણ જાહેરનામું બહાર પાડવામાં આવ્યું છે. આ અંતર્ગત મસ્જિદની મુલાકાત લેતા લોકો માટે નવી માર્ગદર્શિકા (ગાઈડલાઈન) અમલમાં મૂકવામાં આવી છે.

વિવાદની પૃષ્ઠભૂમિ અને તાજેતરની કાર્યવાહી

ભરૂચની આ જુમ્મા મસ્જિદના સ્થાપત્યને લઈને મોટો વિવાદ ચાલી રહ્યો છે. હિન્દૂ અને જૈન ધર્મના લોકો દ્વારા એવો દાવો કરવામાં આવ્યો છે કે આ વાસ્તવમાં એક પ્રાચીન જૈન મંદિર છે. આ વિવાદ વચ્ચે થોડા દિવસો અગાઉ જ ભારતીય પુરાતત્વ વિભાગ (ASI) દ્વારા કડક કાર્યવાહી કરવામાં આવી હતી, જેમાં મસ્જિદની અંદર કરવામાં આવેલું ગેરકાયદેસર બાંધકામ તોડી પાડવામાં આવ્યું હતું. આ ઘટના બાદ વિસ્તારમાં તણાવ ન વધે અને સ્મારકની સુરક્ષા જળવાઈ રહે તે માટે કલેક્ટરે આ નવું જાહેરનામું બહાર પાડ્યું છે.

નવી માર્ગદર્શિકાના મુખ્ય મુદ્દાઓ:

• જિલ્લા કલેક્ટરના જાહેરનામા અનુસાર હવેથી સ્મારકની મુલાકાત લેતા તમામ લોકોએ નીચે મુજબના નિયમોનું ચુસ્તપણે પાલન કરવાનું રહેશે:

• સૂચનાઓનું પાલન ફરજિયાત: મસ્જિદની મુલાકાતે આવતા તમામ મુલાકાતીઓએ ત્યાં તૈનાત પોલીસ કર્મચારીઓ અને પુરાતત્વ વિભાગ (ASI) ના અધિકારીઓની સૂચનાઓનું ફરજિયાત પાલન કરવાનું રહેશે.

• ભીડ નિયંત્રણ માટે તબક્કાવાર વ્યવસ્થા: સ્મારકમાં એકસાથે મોટી સંખ્યામાં લોકો એકત્રિત ન થાય તે માટે ભીડ દરમિયાન તબક્કાવાર (Batch-wise) મુલાકાતની વ્યવસ્થા ગોઠવવામાં આવશે.

• નુકસાન પહોંચાડતી પ્રવૃત્તિઓ પર પ્રતિબંધ: આ ઐતિહાસિક અને રાષ્ટ્રીય સંરક્ષિત સ્મારકને કોઈપણ પ્રકારનું નુકસાન પહોંચાડતી તમામ પ્રવૃત્તિઓ પર સખત પ્રતિબંધ મૂકી દેવામાં આવ્યો છે.

• સ્ટ્રક્ચરમાં ફેરફાર પર મનાઈ: મસ્જિદના મૂળ માળખા (Structure) માં કોઈપણ પ્રકારની છેડછાડ કે ફેરફાર કરવા પર સંપૂર્ણ પ્રતિબંધ રહેશે.

કડક કાર્યવાહીની ચેતવણી

વહીવટી તંત્ર દ્વારા સ્પષ્ટ કરવામાં આવ્યું છે કે આ જાહેરનામાના કોઈપણ નિયમનો ભંગ કરનાર અથવા કાયદો હાથમાં લેવાનો પ્રયાસ કરનાર અસામાજિક તત્વો સામે ગુજરાત પોલીસ અધિનિયમ (Gujarat Police Act) હેઠળ કડક કાયદેસરની કાર્યવાહી કરવામાં આવશે. હાલમાં સ્મારકની આસપાસ સુરક્ષા વ્યવસ્થા ચુસ્ત કરી દેવામાં આવી છે અને તંત્ર દ્વારા શાંતિ જાળવી રાખવા માટે અપીલ કરવામાં આવી છે.